حرب الاشاعات ما بين المواطن الزومبي و الانتحار القومي – (الجزء السادس)

22 Mar 2019

حرب الاشاعات ما بين المواطن الزومبي و الانتحار القومي – (الجزء السادس)

إشاعة تنازلت عن حقول الغاز في البحر المتوسط الى إسرائيل و اليونان

===========================================

نكمل حديثنا عن حروب الاشاعات و الحرب النفسية التي يقوم بها اعداء الوطن على الشعوب لتدمير نفسها بنفسها …. و كيف ان هدفها ان تدخل المواطن في حلقة مغلقة من الشك و الجدل و العقيم …. حتي تخلق حالة للمواطن انه يستعر من وطنه ، و تؤدي بيه “للإحباط” …. اللى بــ يؤدي الى الشعور بالحزن الشديد ، و أن مفيش حاجة في حياته لها قيمة او أمل ، فــ يتحول الى مواطن منغلق على نفسه دائماً وغير قادر على استقبال أية أفكار إيجابية و الإحساس الدائم بالفشل في الحياة العملية والأسرية … ثم يتحول الى مواطن فاشل مدمر لكل شىء حوله … “كائن زومبي” …. عشان يوصلوا الى الهدف الرئيسي ليهم و هو “الانتحار القومي” ….. فــ يتم تدمير الدولة المصرية بــ إيد المواطن المصري بنفس ذات نفسه … زي انتحار الحيتان في البحر لما بــ يقرروا ينتحروا جميعاً.

 

إشاعة مصر تنازلت عن حقول الغاز في البحر المتوسط الى إسرائيل و اليونان و قبرص :-

—————————————————————————————-

إلحقوا … مصر فرطت في حقوقها البحرية في البحر المتوسط و عملت ترسيم حدود مع اليونان و قبرص تنازلت فيه عن حقول الغاز بتاعتها ليهم … و اسرائيل بــ تتفسح في مياهنا الاقليمية ، و بــ تنقب و بــ تستخرج الغاز بتاعنا و تحت حماية الجيش المصري … و كله عارف و ساكت … حقوق الناس بتضيع … حقوق الغلابة بــ تتباع.

و بغض النظر ان مطلقي و مروجي الاشاعة دي هم نفس الناس و نفس المجموعة اللى أطلقوا مئات الاشاعات و بنفس الآليات و بنفس الدكاترة الخبراء أصحاب البدل و الكرافتات الشيك في القنوات إياها … زي اشاعات حفر قناة السويس و افلاس البنك المركزي و هروب المستثمرين و حقن الخضروات بمواد تقلل خصوبة الرجال و انشقاقات الجيش و ان الجيش بــ يشترى اسلحه خردة و غيرها من مئات الاشاعات … و اللى الناس شافت بعنيها تأكيد كذبهم .

الا اننا لما دورنا على مصدر الاشاعة دي لقينا مصدرها شخص واحد عايش في أمريكا و يدين لقطيع البنا بالولاء و بيخدم على الاجندة بتاعتهم أسمه د. نائل الشافعي و اللى هو دكتور في مجال الاتصالات و نظم المعلومات (مش قانوني و لا جيولوجي و لا حتي سياسي ) … و اللى بــ يعتبر من اكبر النصابين المحترفين في مجال تحريف و تزوير و التدليس على الناس في المعلومات السياسية و الاقتصادية و بــ يشتغل بنفس مبدأ ” يحرفون الكلم عن مواضعه “…. لان الراجل ده عمل حاجه بصراحة جديدة … طبعا بــ تمويل و دعم من جماعة قطيع البنا … أنشأ مكتبة الكترونية تحتوى على آلاف المقالات المعرفية شبيهه بموقع الويكيبيديا كده سماها “المعرفة”…. و الموقع ده اشترك معاه مئات من شباب جماعة الاخوان الارهابية … اللى كتبوا فيها آلاف من المقالات و التوثيق لأحداث تاريخية و علمية بصورة محترفة كلها طبعا من وجهة نظر الجماعة الارهابية … و في اي موضوع يخص مصر سواء تاريخيا او اقتصاديا او تاريخيا …. تلاقي المقال فيه كمية من الكذب و التزوير و التدليس في المعلومات لا نظير لها … و طبعا ده للنيل من الدولة المصرية اللى في اساس أدبيات الجماعة نفسهم تزول من على سطح الكرة الارضية …. و طبعا كان من السهل عليهم انه يحط عنوان موقعه في نتائج أول 10 مواقع بتطلعلك على جوجل لما بتدور على اي موضوع….. و الأغرب … انه عامل صفحة على النت فيها مئات الآلاف من المتابعين … و بيحاضر في امريكا … و بتشوفه على القنوات إياها … و لما يكتب و يتكلم و يكذب و تسأله الناس ايه هو مصدر كلامك … يقولك مصدر كلامي هو مقالات و وثائق موقع المعرفة … اللى هو اصلا بتاعه و هو اللى أنشأه 😊 😊

الراجل ده بدأ ينشر كلام كتير من سنين على موضوع الغاز و قام جايب خريطة من “جوجل إريرث” اللى على الشمال في الصورة ، وقام لاعب فيها بـ أيده و حاطط عليها أماكن هو مخترعها لاماكن الحقول و قام محرك حقول الغاز الاسرائيلية لفاياثان و تامار ناحية مصر و مقربها من دمياط (الصور الصحيحة اللى على اليمين) … و بعد كده بدأ يتكلم بمنتهي الثقة على ان حقول الغاز الاسرائيلية داخل الحدود المصرية … طب ايه دليلك … يقولك خرائط موقع المعرفة اللى هو أصلا المالك بتاعه 😊 و طبعا كانت كتائب القطيع و قنواتهم الاعلامية بتروج لكلامه و لمقالاته بشكل مكثف زي ما بيعملوا مع كلام اي حد منهم بيروج اشاعات 😊

و لما مصر أقرت اتفاقية ترسيم الحدود مع اليونان و قبرص و اللى انهت على أحلام قواد تركيا و خليفتهم المزعوم في الاستيلاء على كنوز البحر المتوسط من الطاقة … هاج و ماج و قام مكمل و باني على أكاذيبه ان مصر بعد ما تخلت عن حقول الغاز بتاعتها لصالح اسرائيل … قامت مكملة و أهدت حقول غاز تانيه لقبرص و اليونان …. 😊 😊 …

و عشان مانكملش كتير في الهبل اللى بيتقال ده …. و مع اننا اتكلمنا كتيييير عن موضوع ترسيم الحدود البحرية … فــ إحنا هــ نشرح تاني يعني ايه ترسيم حدود بحرية … لأن في الإعادة إفادة.

تعيين و ترسيم الحدود البحرية أمر معقد جداً و فني للغاية … و لا يحتمل التأويل و لا الآراء و لا حتي الغلط …. لان اللى بيحميه و يحدده إتفاقية دولية اسمها “إتفاقية الأمم المتحده للبحار” و اللى كل دول العالم موقعة عليها إلا عدد محدود من الدول زي مثلا تركيا و ده بسبب ان تركيا لو وقعت عليها يبقي بــ تثبت على نفسها احتلال قبرص ، و إن وجودها فيها غير قانوني … و الاتفاقية دي بتحدد بالتفصيل الممل ازاي يتم ترسيم الحدود البحريه بين دولتين … و ازاي يتم اقتسام ما في باطنها من معادن … و لو دولتين مثلا تنازعوا على جزيرة في النص ما بينهم … الاتفاقية دي فيها معايير موحدة بتحدد لمن تؤول ملكية الجزيرة دي حسب طبعا معايير جيولوجية و طبيعة الارض و المسافه من كل شاطىء و حاجات و تفاصيل تانيه كتيييييير … يعني ترسيم الحدود البحرية مش بيتعمل لا بالمزاج و لا حسب الاهواء و عشان يتم تعيين و ترسيم الحدود البحرية بين دولتين … ممكن اللجان المختصة بالعملية دي تشتغل على الارض 10 او 15 سنه لغاية لما تخلص شغلها و تطلع اول خريطة مبدأية …. طب ليه الوقت الطويل ده … و إييه التعقيد في العمليه دي ؟؟؟؟ .

شوف يا سيدي و بإختصار و تبسيط شديد… عملية ترسيم الحدود البحرية بــ تمر بمرحلتين … أولا وضع نقاط الاساس اللى هي ان كل دولة تحط نقاط باحداثيات واضحة على آخر نقطة على الشط بتاعها عشان تحدد آخر مكان لها على اليابسة … و لما الدولتين يوافقوا عليها … يبدأو في ترسيم الحدود برسم خط وهمي على الخرائط في منتصف المياه ما بينهم .

فمثلا في عملية وضع نقط الأساس … تخيل نفسك في اسكندرية … اللجنة دي بتمشي على طول الشط و تحط مثلا نقطة على شط البحر على الكورنيش كل 100 متر … فمثلا لو حطوا نقطه على جزيرة ميامي … يبقي مصر بتقول ان الجزيره دي داخل حدودها … و لو اكتفت اللجنة بوضع نقط الاساس على الشط بس و طلعوا جزيره ميامي من خط نقاط الاساس … يبقي مصر بتقول ان الجزيره دي مش تبعها … و يفضلوا يمشوا كده مع تعرجات الساحل و الكورنيش لغاية لما يخلصوا الساحل كله …

في نفس الوقت بتكون فيه لجنة تانية في الدولة المقابلة بتقوم بنفس العملية … و لما تخلص اللجنتين … بــ يتقابلوا و كل لجنة بــ تراجع شغل اللجنة التانية حسب المعاهدات الدولية اللى بــ تحدد الحدود البرية لكل دولة علشان ماحدش يمد إيده و ياخد حاجة مش بتاعته …. بإنه مثلا يحط نقطة أساس داخل البحر و ياخد جزيره تابعة للطرف الآخر و دي معناها انه هــ ياخد أرض حق الدولة التانية … و لما يراجعوا النقط كلها و يوافقوا الاتنين عليها و يتأكدوا ان كل لجنة التزمت بوضع نقاط الاساس حسب معايير اتفاقية الامم المتحده للبحار و حسب خرائط الحدود المعتمدة من الامم المتحدة … يتم توقيع اتفاقيه اسمها اتفاقية نقاط الاساس البحرية …. و يتم ايداعها في الامم المتحده كوثيقة ملزمة للطرفين …. و ده نفس اللى حصل ما بين مصر و قبرص في 2003 … و نفس اللى حصل ما بين مصر و السعودية عام 1990 اللى حددت نقاط الحدود البرية على الشواطىء بين الدولتين ….. بعد كده بــ تيجي المرحلة التانية … و هي ان اللجان دي بتقعد مع بعض و يوصلوا كل نقطة من ساحل كل دولة بالنقط المقابلة لها على ساحل الدولة التانية …. و بعدها يقوموا راسمين خط وهمي في منتصف كل خط ما بين الدولتين على الخريطة و وضع احداثيات مفصله له … يقوم يطلع عندنا الحدود البحرية و يتم التوقيع عليها و ايداعها بالامم المتحدة اللى بــ تراجع عليها و تعتمدها و تصبح وثيقة دولية ملزمة للجميع.

و ده بالفعل اللى حصل مع ترسيم الحدود البحرية مع اليونان و قبرص … و أصبح اكبر حقل غاز في البحر المتوسط “ظهر” داخل الحدود المصرية … و حقل “افروديت” الصغير داخل الحدود القبرصية … يبقي إييه اللى احنا اتنازلنا عنهم لقبرص مش عارف ؟؟؟؟ …. أما اسرائيل فلم يتم اقرار ترسيم الحدود البحرية ما بينا و بينهم و لكن الحسابات المبدئية لخط الحدود البحري المفترض حسب معايير اتفاقية الامم المتحده للبحار … بأي حال من الاحوال و مهما كانت الحسابات … فأن حقلي لفاياثان و تامار هم داخل المياة الاقتصادية الاسرائيلية و مستحيل يكونوا داخل مياهنا احنا …. ده غير إن الحقلين دول امام سواحل اسرائيل و ليس امام سواحل غزة اللى اكيد هــ يكون فيهم حقل للغاز على الاقل و هو هــ يكون ملك الدولة الفلسطينية …. و مصر مش هــ تسمح باستخراج او تصدير اي متر غاز من اي حقل امام سواحل غزة الا بعد ترسيم الحدود ما بينهم و حل المشكلة السياسية هناك … ده غير ان مصر أجبرت اسرائيل ان فلسطين تكون ممثلة في الكيان الجديد “منتدى دول غاز شرق المتوسط” عشان تحفظ حق الفلسطينيين في آبار الغاز المتواجدة امام سواحل غزة.

طب إييه اهمية الترسيم و ليه قطيع الاخوان الارهابية هاجوا و ماجوا علينا بالشكل ده …. لسببين .. أولهم هو ان الخليفة بتاعهم اتركن على الرف بعد ما كان طمعان في الاستيلاء على سبوبة الغاز بتاعتنا كلها و انه يبقي الوكيل الحصري لتصدير الغاز للعالم من المنطقة بتاعتنا … و بالمقابل مصر اقتصادها بــ يتعافي و هــ تبقي اقوى استراتيجياً و اقتصادياً و سياسياً زي ما شرحنا في المقال السابق … و السبب التاني انهم كانوا بيتمنوا اننا نفضل كده مش قادرين نستفاد من ثرواتنا لأنه طبقاً للقانون الدولى ..، مافيش شركة تنقيب على الغاز تقدر تحط استثمارات بالمليارات في مياه دولية الا بوضع قانوني و في مياه تم ترسيم حدودها و اقرارها بالامم المتحدة …. زي ما حصل معانا و بدأنا نستفيد من خيرنا و بدأنا نشوف حقل ظهر و بعده طلع حقل نور … و بعد الترسيم البحري مع السعودية … هــ نبدأ نشوف خلال الكام سنة اللى جاية غاز و بترول في البحر الاحمر يمكن اكتر من اللى في الخليج العربي لما تبدأ شركات التنقيب تشتغل هناك و تطلع خيرات ربنا.

وإلى اللقاء مع تفنيد مزيد من الشائعات اللى اصبحت مع الوقت ثوابت كاذبة بفعل فاعل ، واصبح من الضرورى هدمها ، علشان نقدر نشوف الصورة بشكل صحيح

تحياتنا

لمتابعة تعليقاتكم