22 Jul 2019
تصعيد الفنكوش .. وسياسة حافة الهاوية !!
——————————————-
تانى .. و تالت .. و رابع .. تتصاعد حدة الأزمة فى منطقة الشرق الأوسط او بالتحديد فى منطقة الخليج العربى .. وتتصاعد حدة التصريحات .. وكمان التحركات .. سواء السياسية أو العسكرية .. ومع التصاعد ده ، بــ يزداد التوتر ، وتزداد حالة القلق ، وتزداد المخاوف من زيادة التصعيد والإتجاه لسيناريو حرب شاملة محتملة فى الشرق الوسط تأكل الأخضر واليابس !
و طبعاً بعد اللى حصل من إيران .. وإحتجاز سفينة بريطانية فى مضيق هرمز بمنطقة الخليج .. والناس جالهم حالة من الهلع .. إن كدة بقى ناقوس الخطر بدأ يدق … وإن الحرب أصبحت وشيكة …. لكن كل ده قلق من غير داعى .. لأن حالة التصعيد دى عبارة عن فنكوش كبير ، ضمن سياسة حافة الهاوية اللى إحنا إتكلمنا عنها قبل كدة !!
مبدأيا كدة مافيش حرب محتملة فى القريب العاجل .. ولو حدث شئ ، فــ زى ما قولنا وشرحنا قبل كدة ، إنه هــ يكون فى إطار ضربة محدودة حفظا لماء الوجه مش أكثر … و مع فرض .. مجرد فرض جدلى .. إن المنطقة مرشحة لسيناريو الحرب الشاملة … فالسيناريو ده مؤجل تماماً لما بعد يناير 2021 … وإيران عارفة كدة كويس.
إيران بــ تتاجر بالوضع الحالى زى أى مرابى .. و بـــ يحاولوا يضغطوا قدر الإمكان إعتماداً على سياسة النفس الطويل .. لأنهم عارفين إن دورهم فى المنطقة أوشك على الإنتهاء بالنسبة للغرب … و كمان إعتماداً على عدة نقاط فى غاية الأهمية لازم ناخدها فى الحسبان:
أولا … إيران بتلعب لعبة شد وجذب ، وهى عارفة إن الدول الكبرى مش عايزة تتورط فى سيناريو حرب شاملة لأن إقتصادهم والإقتصاد العالمى عموما لا يسمح بكدة .. و فى نفس الوقت هم عارفين إن لعبة المصالح وتوازنات القوى هــ تخلى أى عمل عسكرى شامل ضدها هـو ضرب من الجنون ، لأن روسيا والصين مش هــ يقبلوا بكدة وهــ يستخدموا مجلس الأمن لإجهاض أى قرار ضد إيران … مش حباً فى إيران لكن لعبة مصالح مش أكثر 😉
ثانيا … إيران عارفة إن بريطانيا مشغولة فى إجراءات إنتقال السلطة من تريزا ماى لمن سيخلفها … والإجراءات السريعة دى وحالة تغيير الجلد ، عاملة حالة من عدم التوازن بالنسبة لبريطانيا .. وعلشان كدة مش ممكن ترتكب أى حماقة أو تقوم بعمل عسكرى فى الظروف دى ! .. مع الأخذ بعين الإعتبار إن أوروبا رافضين لأى إجراء عسكرى أو تصعيد ضد إيران وعلى رأسهم فرنسا وألمانيا 🙂
ثالثا … إيران عارفة إن أميريكا مقدمة على مرحلة الشلل المفصلى قريب جداً … لأن رئيس الولايات المتحدة دونالد ترامب مقدم على إنتخابات رئاسية فى نوفمبر 2020 .. و هو لحد دلوقتى منتصر فى كثير من الملفات … و بــ يتمتع بحالة رضا من اللوبى اليهودى وقطاع كبير من الشعب … وكرجل أعمال ناجح وسياسى محنك (أيوة ترامب مش شخص أحمق عكس ما الميديا بتحاول تصوره بفعل فاعل) .. مش عايز يتورط فى شئ يضيع أى مكتسبات حصل عليها أو يحط نفسه فى مرمى سهام المزايدات من التيارات والجهات المعادية له فى الداخل الأميريكى سواء من الكونجرس أو من بعض مؤسسات الدولة .. واللى ممكن يستغلها الحزب المنافس علشان ينجح بيها المرشح بتاعه فى الإنتخابات القادمة !
واللى يأكد كلامنا ده ، إنه برغم إحتجاز إيران للباخرة البريطانية ، وكمان إنزال علم المملكة ووضع علم إيران عليها فيما يعتبر فى العرف العالمي إهانة بالغة لبريطانيا .. إلا إن كل اللى عملته إنجلترا هو قيام المتحدث باسم رئيسة وزراء بريطانيا، تيريزا ماي بمطالبة إيران، بالإفراج فوراً عن الناقلة، ستينا إمبيرو، وطاقمها، واصفاً احتجازها في مضيق هرمز بأنه غير قانوني …. يعنى تمخض الجبل فولد فأراً 🙃
بريطانيا عملت كدة وهى حاطة عنيها على الرد الأميريكى اللى ممكن يرفع عنها الحرج أو يكون فيه تصرف عنيف يوفر عليها التورط فى مواجهة .. وأكيد طبعا مش محتاجة ذكاء علشان نبقى على يقين إنه كان فيه إتصالات و نقاشات فى الكواليس .. لكن الرد الأميريكى فى الحقيقة كان قمة المسخرة .. لأن في تصريحات لقناة «فوكس نيوز» الأمريكية النهاردة .. أكد وزير الخارجية الأميريكي، مايك بومبيو، أن «بريطانيا تتحمل مسؤولية الحفاظ على سفنها فى مياه الخليج»، ووجه كلامه للبريطانيين وقال: «احموا سفنكم بأنفسكم» … و شدد بومبيو نقلا عن وكالة رويترز على أن واشنطن «لا تريد حرباً مع إيران» .. 😁😁
اللعبة فعلا شيقة ومسلية … و زى ما قولنالكم من زمان حضروا الفشار قبل ما يشح فى السوق .. علشان هــ نستمتع بالفرجة 🙂🙂 .. وياريت بس اصدقائنا يراجعوا المقالات التالية علشان تبقى الصورة كاملة قدامكم:
و فى النهاية .. والشيئ بالشيئ يذكر بالنسبة لبريطانيا العظمى اللى عرفت بقدرة قادر كدة أو بمعلومات إستخباراتية إنه فيه إحتمالية لعمليات إرهابية فى مصر فقامت إحترازياً بحظ الطيران للقاهرة … لكن فى نفس الوقت ماقدرتش تعرف عن طريق معلومات إستخباراتية برضوا إن إيران هــ تحتجز الباخرة بتاعتهم فى مضيق هرمز علشان تقوم إحترازيا بحمايتها …. إشى خيااال ياناااااس 😁😁 .. واضح كدة إن اللى بيحصل فى ليبيا ، و دورنا هناك حارقهم اوى … وربنا يكون مع الجيش الليبى اللى بدأ المرحلة التانية من معركة تحرير طرابلس من عدة ساعات … وبإذن الله تكمل على خير
إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.