النظام .. الصفقة .. التمهيد

25 May 2019

النظام .. الصفقة .. التمهيد .. !!
————————————

التحركات العالمية وصلت خلاص لمرحلة الغليان .. أو نقدر نقول لمرحلة المخاض .. واللى هــ ينتج عنه ولادة النظام العالمى الجديد بشكل رسمى … بدايةً بصفقة القرن اللى بيقولوا عليها ، واللى هـ يتم الإعلان عنها فى أخر يونيو القادم .. ده إذا ماحصلش حاجة تخلى الإعلان عنها يتأجل لثالث مرة 🙂

حرب إقتصادية معلنة .. ومناوشات عسكرية فى مناطق كثيرة من العالم .. وتنظيمات إرهابية بتتفكك وبــ يعاد تركيبها بأشكال تانية فى مناطق أخرى .. وثورات ومظاهرات مفتعلة فى كل حتة .. وتنظيرات وتراشقات سياسية بين الدول وبعضها وبين التكتلات السياسية وبعضها … وتواؤمات سياسية بتتشكل .. وتحالفات إقتصادية بتتولد … و رؤس كوادر سياسية بــ تطير وبــ يتم إستبدالها … وكروت فاعلة بــ تتحرق … ومخططات بــ تتكشف …. ألخ ألخ ألخ 🙄

تريزا ماى رئيسة وزراء بريطانيا ، زى ما جت بشكل غريب ومفاجئ وبدون إنتخابات جادة … خرجت برضوا بشكل غريب ومفاجئ ، وبإستقالة باكية .. و بــ بديل جاى يشيل الشيلة فى 20 يونيو القادم .. و من الواضح إن البديل معروف وجاهز .. ومافيش مجال نتكلم عنه دلوقتى .. وكأن مهمة تريزا ماى كانت إنهاء ملف البريكزيت .. والأسباب واضحة ، و شرحناها قبل كدة فى مقالات سابقة 😉

الرئيس الفرنسى ماكرون ، اللى جاء فى غفلة من الزمن ، بفوز ساحق وغير متوقع فى الإنتخابات الفرنسية السابقة .. أصبح واضح جدا الأن إن الأرض مش مستقرة تحت رجليه .. وإن تصريحاته فيما يخص فلسطين ، وفيما يخص حلف الناتو والجيش الأوروبى الموحد .. ومناطق النفوذ الفرنسى فى العالم .. وإعادة تشكيل الأقطاب العالمية .. بالإضافة لملف العلاقات الفرنسية المصرية .. وشوية حاجات تانية .. اشعلت الأرض تحت رجليه .. وأكيد إحنا كلنا شايفين السترات الصفراء بتعمل إييه فى فرنسا ، بالإضافة للعمليات الإرهابية طبعاً .. وبات من الواضح إن ماكرون بيخسر أسهمه بشكل كبير .. مع تصاعد أسهم ممثلة اليمين “مارى لوبان” .. القادمة بقوة فى الفترة القادمة .. وماحدش عارف ، هل ممكن توصل للرئاسة وإلا لأ !! 🤔

تيتة ميركل بدأت تواجه صعوبات .. وأصبح الحديث عن عدم إستكمالها لفترتها يتردد بقوة كبيرة .. فى ظل ضغوط إقتصادية وسياسية تواجه الإتحاد الأروبى بشكل عام .. و نحب بس نفكر اصدقائنا بكلامنا القديم اللى قولناه من سنتين عن التوقعات بتفكك الإتحاد الأوروبى فى خلال 5 سنوات من وقت ما تكلمنا عن الموضوع ده 🙂

الإتحاد الأوروبى بيصدر بيان شديد اللهجة ضد تركيا بسبب تحركاتها وتعديها على المياه الإقليمية القبرصية .. وبــ يعلن تضامنه التام مع قبرص … و حلف الناتو بــ يتجاهل إستنجاد الأغا التركى بيه فى مواجهة البيان المصرى وبيان الإتحاد الأوروبى … وكمان فرنسا وإيطاليا وألمانيا بيعلنوا إعتراضهم على تصريحات السراج عن إمكانية إنشاء قاعدة عسكرية تركية فى ليبيا .. ورفضهم التام لأى وجود تركى فى الشمال الأفريقى 😁

الغليان فى منطقة الشرق الأوسط وممارسة سياسة حافة الهاوية .. وحالة التلاسن المتصاعدة بين أميريكا وإيران فى كل المحافل الدولية .. مع إستهداف أميريكا لبعض المليشيات التابعة لإيران خارج نطاق الحدود الإيرانية .. وبالذات فى العراق .. فى الوقت اللى فيه روسيا بترفع الغطاء جزئيا عن إيران بتفاهمات مع أميريكا على طريقة مسك العصايا من المنتصف ، بدون أى تصريحات رسمية .. ولكن فقط .. غض الطرف عن التحرك الأميريكى فى مواجهة إيران … 😉😁

و زى ما قولنا قبل كدة فى مقال سابق بعنوان “التصعيد فى الشرق الأوسط” .. إن نشوب حرب مباشرة موسعة بين أميريكا وإيران غير وارد بالمرة .. و قولنا إنه حتى لو الأمور تطورت .. فــ سيتطور فى إطار ضربة عسكرية محدودة حفظا لماء الوجه زى ما ذكرنا ، ولتبرير التواجد والحشد العسكرى أمام الشارع الأميريكى وأمام الدوائر السياسية … يعنى ممكن الضربة دى تكون داخل إيران و ده مستبعد شوية … أو تكون خارج إيران فى أماكن نفوذ إيرانية … و ده اللى واضح من عملية تمهيد الأرض فى العراق بإعتبارها ممكن تكون مسرح العمليات القادم فى تمثيلية تغيير الكروت الإقليمية اللى كان بــ يتم الإعتماد عليها خلال العقود السابقة .. و آن الأوان للتخلص منها بعد ما إنتهى المبرر من وجودها .. واصبح تغييرها مسألة وقت .. فى الوقت اللى مصر فيه بتقلب منظومة الشرق الأوسط كله .. و بــ تتنامى و تتعملق فى مكانها وبتفرض رؤيتها السياسية والإقتصادية .. وبتجمع خيوط المصالح كلها فى إيديها ، سواء أمنيا أو سياسيا أو إقتصادياً .. من أول الشرق الأوسط ، لأفريقيا ، لأوروبا .. وصولا إلى العملاقين الصينى والروسى .. وفى نفس الوقت بدون خسارة الطرف الأميريكي !!

لقد بدأ تفعيل المراحل النهائية لمسلسل إنسف حمامك القديم وتعالوا نشتغل من أول وجديد على نظافة … و ….

و مش قولنا لكم حضروا الفشار 😉🙂

إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.

فى الروابط التالية مقالات سابقة كمرجعيات للى عايز يفهم الصورة بشكل أوضح:

لمتابعة تعليقاتكم