منتدى غاز شرق المتوسط .. جون كمان فى المقص

15 Jan 2019

منتدى غاز شرق المتوسط .. جون كمان فى المقص .. !!

—————————————————–

مصر بــ تضرب من جديد .. وأهداف مصر فى الشبكة أصبحت بالجملة 😊

فاكرين لما شرحنا كتير إن كل اللى حصل فى المنطقة من خراب كان بسبب الغاز وبسبب محاولات السيطرة على مصادر الطاقة لصالح الغرب على حساب خراب كل دول المنطقة !؟ .. وكلامنا اللى شرحناه فى أكثر من مقال عن خط غاز نابوكو اللى كان هــ يطلع من قطر ويعدى الأراضى العراقية ثم السورية مرورا بتركيا ووصولا لأوروبا علشان تبقى تركيا الــ HUB اللى بيوزع الغاز على أوروبا وفى نفس الوقت يتم ضرب خط السيل الجنوبى الروسى وبالتالى ضرب روسيا إقتصاديا .. ولما بشار الأسد رفض الكلام ده ، تم تدمير سوريا زى ما إحنا شايفين دلوقتى !!

طب فاكرين من كام سنة كدة لما حصلت الهيصة الكبيرة على إتفاقية ترسيم الحدود البحرية مع قبرص واليونان ، وطلع كل المغرضين ، والخونة واللى باعوا شرفهم مقابل الدولار علشان يبقوا أبواق دعاية وحرب معنوية لأعدائنا ، ومن خلفهم كل من هب و دب من المغيبين وشمامين الكلة يقولوا إن مصر باعت حصتها .. ومصر فرطت فى ثروات الشعب .. وكان عندك غاز وراح .. ألخ ألخ ألخ .. وبعدها بكام شهر تم إكتشاف حقل ظهر ، أكبر حقل فى شرق المتوسط وطلع من نصيب مصر !

طب فاكرين لما قولنا قبل كدة إن الهدف من كل اللى حصل فى مصر ده كان تدمير مصر وتحييد قوتها ، وفى نفس الوقت منعها من الإستفادة من مواردها الإقتصادية ، واللى كان الإخوان هــ يفرطوا فيها بمنتهى السهولة لصالح قطر وتركيا .. زى ما طلع عبد المنعم أبوا الفتوح أحد أكابر ألهة الكلة الإخوانية السنة اللى فاتت لما تركيا هددت قبرص ومصر بالتدخل العسكرى فى شرق المتوسط إعتراضا على إتفاقية الترسم .. وقال إن سياسة مصر خاطئة .. ولازم مصر تروح تقعد مع تركيا وتشوف الأتراك عايزين إييه وتدّيهولهم !؟

طب فاكرين نفس الهيصة بتاعة شرق المتوسط ، لما إتكررت مرة تانية فى إتفاقية ترسيم الحدود البحرية مع السعودية ، وتم اللعب على مشاعر المصريين وتصوير الموضوع على إنه تفريط فى جزر تيران وصنافير ، وكان الهدف منع مصر من الترسيم لإيقاف التوجه المصرى للتنقيب على ثروات مصر فى البحر الأحمر ، واللى التقديرات المبدئية لها بتقول إنها إحتياطات غازية وبترولية هائلة !؟

طب فاكرين لما مصر سلحت نفسها وإشترت حاملتى الطائرات ميسترال والفرقاطات الفرنسية ، والغواصات الألمانية .. وعملت إتفاقيات مع روسيا علشان طائرات التمساح الخاصة بحاملات الطائرات .. و أنشأت أسطولين شمالى وجنوبى لحماية مصر وحدودها وثرواتها فى البحر المتوسط والبحر الأحمر .. وحالة السعار اللى أصابت كل الأبواق المعادية بسبب ده ، والهجوم على مصر والسخرية من إن مصر بتشترى حاملات الطائرات علشان تحارب الإرهابيين فى سيناء .. وطلع كتكوت ناسا الإخوانى يسخر ويسأل ويتساءل “هى مصر بتشترى سلاح ليه” !؟

وأخيرا فاكرين لما الرئيس السيسى طلع فى فبراير سنة 2018 وقال كلمته الشهيرة ، إحنا جبنا جون يامصريين .. وإن مصر اليوم بفضل الله حطت رجليها على أنها تبقى المركز الإقليمي للطاقة في المنطقة .. وقال إن مصر اقتنصت الفرصة دى من دول أخرى في المنطقة كانت تريد أن تصبح المركز الإقليمي للطاقة .. وناس كتير ماصدقتش .. وناس كتير إعتبرت إن ده كان نوع من التهويل .. وناس كتير وقعت فى الفخ وصدقت الدعاية المغرضة والكلام اللى إتقال عن إتافقية الغاز الجديدة مع إسرائيل .. واللى شرحنا كل شئ يخص الموضوع ده فى المقال التالى بعنوان:

الغاز .. والعملية الشاملة المصرية ..

إمبارح وصلنا لإن مصر عملت منتدى غاز شرق المتوسط .. حيث أعلن وزراء الطاقة في 7 دول، إنشاء منتدى بإسم “منتدى غاز شرق المتوسط”، بهدف تاسيس منظمة دولية تحترم حقوق الأعضاء بشأن مواردها الطبيعية بما يتفق ومبادىء القانون الدولى، على أن يكون مقر هذا المنتدى فى العاصمة المصرية، القاهرة، في محاولة للاستفادة من المنطقة الغنية بالطاقة، ولاسيما الغاز .. وقالت وزارة البترول المصرية في بيان إن أهداف المنتدى الجديد هي العمل على إنشاء سوق غاز إقليمية، وترشيد تكلفة البنية التحتية، وتقديم أسعار تنافسية.

طب مين بقى الدول المشاركة فى المنتدى ده !؟

الدول المشاركة في إنشاء المنتدى هى مصر، وإيطاليا، واليونان، وقبرص، والأردن، وإسرائيل، وفلسطين، على أن تكون العضوية مفتوحة لمن يرغب بذلك من دول شرق المتوسط المنتجة أو المستهلكة للغاز، للإنضمام لعضوية المنتدى لاحقا.

وقبل ما أى حد يزايد على دخول إسرائيل ضمن المنتدى ، لازم نبقى فاهمين إن إسرائيل بالفعل لها أبار غاز فى شرق المتوسط ، والجون اللى أحرزته مصر فى فبراير الماضى أجبر إسرائيل إنها توقع معانا إتفاقية لإسالة الغاز بتاعهم فى محطات الإسالة المصرية وهــ ناخد منهم مقابل الإسالة ، وكمان مقابل مرور خطوط الغاز فى الأراضى المصرية .. وكمان إحنا اللى هــ نصدر الغاز بتاعهم لأوروبا .. ومش هم لواحدهم ، لكن كمان الغاز القبرصى … وهنلاقى إن مصر أصرت على ضم فلسطين كدولة للمنتدى لضمان حقوق الشعب الفلسطينى ، برغم إن إسرائيل دايما بتعترض على إعتبار فلسطين دولة فى أى محفل من المحافل الدولية !

و مش كدة وبس .. لكن كمان الرئيس السيسى لسة راجع من زيارة للأردن .. وقعت بعدها مصر والأردن في القاهرة اتفاقيات تزويد المملكة بنحو 50% من احتياجات النظام الكهربائي الأردني من الغاز الطبيعي لعام 2019 .. يعنى مصر فعليا وحرفيا اصبحت مركز إقليمى للطاقة فى المنطقة ، شاء من شاء ، وأبى من أبى .. وأنكر من أنكر 😊 .. و ده بــ يعمل تراجع لمركز قطر الإقتصادى فيما يخص الغاز بالنسبة للعالم .. و بــ يدمر الحلم التركى الأردوغانى تماما فى إن تركيا تتحول لمركز الطاقة فى الشرق الأوسط …

و مش كدة وبس كمان … لكن الدكتور جمال القليوبى أستاذ هندسة البترول والطاقة والبترول وعضو مجلس إدارة جمعية البترول المصرية قال: إن مصر ستتخلص نهائيا من استيراد منتجات البترول خلال 2022، .. و ده لأسباب كتيرة ، ملخصها أولا التوسع فى إنتاج الغاز وإكتفاء مصر ذاتيا منه .. وثانيا العديد من الإجراءات اللى تم إتخاذها على مستوى البنية التحتية لإنتاج البترول ..بالإضافة للتوقعات بإكتشافات بترولية خلال الكام سنة القادمين.

فهمنا بقى لييه الحرب الشرسة على مصر .. كانت .. ومازالت .. وستستمر !!؟ 🤔

والمضحك إن بوابة الحرية والعدالة بــ تطنطن للمناورات العسكرية اللى أعلنت عنها تركيا ، واعلنت على موقعها بعد ساعات قليلة من إعلان إنشاء المنتدى ، أن تركيا تواجه مؤامرات السيسى وأطماع اليونان بأكبر منواورات عسكرية فى تاريخها 😄😄… لأ بجد حصل حصل لنا الرعب والتهديد 🙃😅 …. و ده بالفعل أكبر مثال لمقولة “الــ….. والقافلة تسير” 😉

إفخروا ببلدكم ، وقولوا من قلبكم تحيا مصر .. وثقوا فى قيادتكم السياسية .. وخليكم واقفين دايما فى ظهر بلدكم مصر 😊💚🇪🇬🇪🇬

مقالات مهمة للمراجعة والمتابعة

لمتابعة تعليقاتكم