مصر تنتصر تانى وثالث .. ولسة

22 Feb 2021

مصر تنتصر تانى وثالث .. ولسة !!

———————————-

بعد الإعلان ثم عودة تشغيل محطة دمياط لإسالة الغاز .. صرحت وكالة بلومبرج بإن مصر هتصبح من أكبر عشرة دول مصدرة للغاز فى العالم بنهاية 2021 .. وهتبقى أهم مورّد للغاز بالنسبة لأوروبا …. والكلام ده سواء بالنسبة لحجم الغاز اللى هــ تنتجه مصر بعد ماحققت الإكتفاء الذاتى وهــ تبدأ تصدر لأوروبا بالفعل .. أو بالنسبة للغاز اللى هــ ييجى لمحطات الإسالة المصرية علشان يتم تصديره تانى من خلالنا بإعتبارنا HUB الغاز فى المنطقة !

و فى نفس الوقت استقبل بالأمس رئيس الوزراء الإسرائيلي بنيامين نتانياهو، في مقر رئاسة الوزراء ، وزير البترول والثروة المعدنية المصري، طارق الملا، في زيارة هي الأولى لوزير مصري منذ سنوات .. فى حضور رئيس هيئة الأمن القومي الإسرائيلى ووزير الطاقة والمياه .. بالإضافة إلى رئيس الشركة المصرية القابضة للغازات الطبيعية مجدي جلال وسفيرة إسرائيل لدى مصر والسفير المصري لدى إسرائيل … و ده بهدف توقيع إتفاقية تصدير الغاز الإسرائيلى لمصر لمدة 15 سنة بهدف تسييله فى محطات الإسالة المصرية .. و من ثم إعادة تصديرة مرة أخرى عن طريق مصر إلى دول أوروبا !

الخطوة دى من شأنها إنها تقضى تماما على فكرة خط “إيست ميد” اللى وقعته اسرائيل مع قبرص واليونان .. و اللى الإعلام المعادى صدعونا بيه وقالوا إن إتفاقية الخط ده ، طعنة فى ظهر مصر ، وإن مصر خلاص مش هــ تبقى HUB الغاز فى المنطقة .. وإن موضوع الغاز المصرى ده فنكوش .. وإن حقل ظهر ده أكذوبة .. ومافيش حاجة إسمها الإكتفاء الذاتى لمصر من الغاز بدليل إننا هنستورد الغاز من إسرائيل

مصر مش بتلعب .. والغاز اللى إنت إكتشفته والبنية التحتية اللى إنت بتمتلكها وطورتها وبتشغلها .. جعلت أى فكرة لمنافسة مصر فى شرق المتوسط مايبقاش له أى جدوى إقتصادية ….. على الأقل فى الوقت الحالى

وعلشان كدة لما الرئيس طلع من كام سنة وقال “إحنا جبنا جون يامصريين” .. ماكانش بيقول كدة على سبيل الهزار .. لأ .. ده كان إقرار واقع

الخطوات اللى أخدتها مصر .. والتحالفات والإتفاقيات اللى ربطت بيها الإدارة المصرية مصالح العالم مع مصر خلال الــ 5 سنوات الماضية وفى ظل الظروف اللى كنا بــ نمر بيها .. يعتبر بالفعل معجزة .. هيتحدث عنها تاريخ مصر الحديث للأجيال القادمة

و لهذا حديث أخر فى مقالنا القادم بإذن الله

مبروك لمصر ..

وحفظ الله مصر برئيسها وجيشها وشعبها

#ملحوظة:- تركيا كانت هتموت علشان تفوز بالدييل ده .. وعلشان كدة توقعوا حملة ضارية من قنوات الخونة للتشكيك فى مصر والتشكيك فى الحدث كله .. 🙂

#مقالات_ذات_صلة:

لمشاهدة الفيديو و متابعة تعليقاتكم