ايقاف المساعدات الامريكيه و حرب تكسير العظام

26 Aug 2017

ايقاف المساعدات الامريكيه و حرب تكسير العظام

————————————————

من كام يوم اعلن الكونجرس الامريكي ايقاف جزء من المعونه الامريكيه الاقتصاديه لمصر و تخفيضها الى النصف …… و كالعاده و زى كل مره … و لانهم مـ بيزهقوش …. أو الأصح ان دي هي الحاجه الوحيده اللى يقدروا يعملوها لقلة حيلتهم و فشلهم في مهمة تفكيك الدوله المصريه … اخد الميكروفون على طول المجموعه إياها من الخبراء الاستراتيجيين الاقتصاديين و السياسيين و خبراء حموم الانسان …. و قعدوا يولولوا و ينشروا سمومهم في كل حته بنشرهم فيديو لجنة الاستماع في الكونجرس الامريكي اللى كان بيناقش اوضاع حموم الانسان في مصر.

و مع ان خلاص الناس فهمتهم … و لانهم مجموعه من الفشله و الأفاقين اللى بيكذبون كما يتنفسون ….. و مفيش موضوع واحد اتكلموا فيه الا و معداش اسبوع بالكتير الا و انكشف كذبهم …. و بقي تأثيرهم صفر …. فاحنا مش بنرد عليهم …. لكن زي ما اتعودنا اننا نفهم الصوره بالعقل و المنطق بعد تفكيكها و اعادة تركيب قطع البازل … تعالوا نتكلم بهدوء لان اللى بيفهم بيرتاح و يريح  🙂

و مع ان اللى بيتقال دلوقتي مش جديد … و أصدقاؤنا اللى معانا من زمان عرفوا ازاي يحللوا الاخبار دي كويس …. لكن برده في الاعاده افاده 🙂 …. و زي ما اتفقنا اننا الفتره اللى داخلين عليها حنحتاج مقالاتنا القديمه …. و مع اطلاق صفحة الويب الارشيفيه لكل مقالاتنا … فحيكون سهل جدا علينا نرجع للمقالات و الرسايل اللى بنبعتها ليكم بقالنا اكتر من 4 سنوات ……

فاكرين الهوجه بتاعة ريجيني و الزيطة الكبيره اللى اتعملت لما البرلمان الايطالي اوقف تصدير قطع غيار طائرات الاف 16 لمصر 🙂 …. و ازاي اثبت الخبراء الاستراتيجيين وقتها انهم مجموعه من الافاقين الجهله !!!! … و عشان منعيدش الكلام تاني ….. و اللى مكانش معانا … و لان السياسه بحرها كبيييييير ….. ياريت يراجع مجموعة المقالات اللى في آخر المقال عشان حترتب ليه افكاره تماما 🙂 .

طب ايه بقي الموضوع !!!!! … شوف يا سيدي …… المعونه الامريكيه بدأت مع تنفيذ اتفاقية السلام مع اسرائيل …. و كانت تنقسم الى جزئين … معون عسكريه مقدراها 1.3 مليار دولار … و معونه اقتصاديه مقدارها 850 مليون دولار … و اللى كان بيتم توجيهها لمشاريع البنيه التحتيه .

المعونه العسكريه فضلت زي ما هي حتي يومنا هذا بقيمة 1.3 مليار دولار … اما المعونه الاقتصاديه … فبدأت تتقلص حتي وصلت الى 250 مليون دولار عام 2005 … و اللى بدأت فيه امريكا خطة تنفيذ الخريف العربي بعد انتخابات الرائاسيه في مصر …. فقامت بالاعلان ان مصر دلوقتي اقتصاديا مش محتاجه المعونه …. و ان بداية من 2005 حيتم توجيه المعونه دي لتطوير المجتمع المصري و تنمية الديمقراطيه و نشر قيم حموم الانسان … فالمعونه من هنا و رايح حتروح لمنظمات المجتمع المدني و تدريب و خلق جيل جديد من الشباب اللى بيؤمن بحقوق الانسان و الديمقراطيه المهلبيه…. و بالفعل بدأنا نشوف تمويلات لجمعيات و منظمات اهليه و اللى الناس اكتشفت بنفسها من كام سنة بس انها كانت بتوجه لتنظيمات يساريه تخريبيه و لجماعات الاخوان لخلق قاعده وهمية من المثقفين و الاعلاميين و اصحاب الرأي لتكوين نخبة عميله للغرب هي من ستقود لاحقا المجتمع لتفكيك نفسه بنفسه و هدم الدوله المصريه بأكملها … و اللى كل ده كان تحت عين الدوله المصريه ساعتها و اللى اتكلمنا عليه بالتفصيل في مقال حتلاقوا اللينك بتاعه في اخر المقال في لينكات المراجع.

المهم كان لازم يكون فيه ناس تعمل من وراء الستار تقود العمليه دي و تمولها و يكونوا محطة ارتكاز و توجيه لتنفيذ مخططات التخريب ….. يتحكموا في مفاصل مهمه في الاقتصاد و الاعلام و توجيه المجتمع المصري … و يتم خلق غطاء كافي ليهم امام الرأي العام … ممنوع حد يجيب سيرتهم او يتكلم عنهم … و اللى يجيب سيرة حد فيهم او مكانش بيقدم فروض الولاء و الطاعه لهم و تنفيذ ما يطلبون كان بيتم توجيه الاعلام المرئي و المقروء و الالكتروني لاغتياله معنويا … و كمان كان بيتم اشغال الرأي العام بشخصيات تانيه خالص زي ما كان يطلق عليهم رجال مبارك عشان الناس تسيبهم يشتغلوا و يكملوا مهمتهم في هدوء.

الناس دي كان دورها الاساسي هو التحكم في الاعلام الالكتروني و المرئي و المقروء و الاعلام الفني …. عشان يتم خلق نخبة من مجموعه من الفشله وشواذ الفكر و الفعل و الافاقين و العملاء في مختلف المجالات الادبيه و الفنيه و الاعلاميه … يتم تلميعهم و خلق بطولات او ترسيخ امكانيات وهميه … فتلاقي مثلا واحد جاهل او حرامي او نصاب بقي بقدرة قادر اديب و كاتب قصه او مذيع او سياسي او مفكر اسلامي ….. و بقدرة قادر تلاقي اتعمل مؤتمرات و ندوات و حفلات تكريم و توزيع جوائز عشان يرسخوا في المجتمع ان آراء الناس دي هى الصح و المفروض هم من يقودون الشعب.

الناس دي كانت مدعومه تماما من الخارج … و القيامه تقوم على الدوله لو حد قرب ليهم … اتحكموا في مفاصل الحياه المدنيه للمجتمع المصري تماما … فمنهم من يتحكم تماما في الاعلام و هو اخطرهم على الاطلاق زي الحاج دياب كده 🙂 … و منهم من يتحكم في كل ما يتعلق بـ تكنولوجيا المعلومات و البرمجيات زي مثلا الحاج على فهمى طلبه صاحب راديو شاك و شركة دلتا و كومبيو مي و موبايل شوب …. و منهم من يتحكم في سوق السلع الكهربائيه المعمره … و منهم من يتحكم في سوق الخضار و الفاكهه … إلخ .

و بعد امتصاص الدوله المصريه لآثار المخطط الرهيب لتفتيتها … و فرضت ارادتها على الجميع دوليا و بدأت تقف علي رجلها إقتصاديا … كان لازم الدوله تبدأ في تفكيك خط بارليف اللى اتبني داخل المجتمع المصري لتدميره …. فكان الخراب المستعجل عليهم هو اقرار قانون تنظيم عمل منظمات المجتمع المدني … لان قبل كده كان الموضوع سداح مداح … و مفيش قانون بيجرم او حتي بيدى الحق للدوله انها تراقب اتصال اي منظمه او حتي جمعيه خيريه مصريه او تلقي تمويلات خارجيه.

يعني السبوبه انقطعت ….. مش بس كده… ده تم ادراج 1538 اخوانيا على قوائم الارهاب … منهم ناس قليله جدا مشهوره … و الباقي معظمهم مستخبيين خالص …. او نقدر نقول … ان مصر بدأت بالفعل تفكك اكبر خليه تخريبيه متغلغله داخلها زي السرطان.

المهم و عشان منطولش عليكم …. نيجي بقي لموضوع الكونجرس الامريكي و شغل الدوله العميقه الامريكيه ضد مصر … و الفيديو المشموم اللى النوشتاء و الاخوان فرحانين بيه و عمالين يشيروه و هم ماسكين المناديل و بيعيطوا على حال مصر =D ….. طب ليه قلنا عليه مشموم … لان ابطاله هم المنبع الرئيسي و القاده الحقيقيين لكل شمامين الكله اللى شوفناهم طوال السنين اللى فاتت 🙂 .

اللى حصل هو جزء صغير جدا من حرب تكسير العظام و فرض الارادات بين الدوله المصريه و قادة اهل الشر و من يديرون الحرب اللى شغاله على الارض في المنطقه اللى شغاله بقالها اكتر من 7 سنين و اللى الناس للاسف شافت جزء صغير منها في موضوع ريجيني و اللى اتكلمنا عليه في المقال اللى اللينك بتاعه في اخر المقال … و اللى شايفينه دلوقتي في قصة تعطيل المعونه الاقتصاديه اللى هي اصلا مش معونه اقتصاديه و لكن تمويل صريح للجماعات التخريبيه .

الدوله العميقة في امريكا بعد الخازوق المغرى اللى اخدوه بنجاح ترامب و خروج اوباما و هيلاري من قيادة اتخاذ القرار … و كمان نجاح الدوله المصريه في فرض ارادتها في المنطقة و ايقاف و بداية هدم مخطط هدم المنطقة بالكامل بقيادة مصر ….. و مش بس كده … بداية مصر في تفكيك ادواتهم اللى بيشتغلوا بيها على الارض في داخل مصر …. قامت الدولة العميقة هناك مظبطة جلسة الاستماع اللى نظمها الكونجرس لمناقشة تطبيق تخفيض المعونات الاقتصاديه الامريكيه لدول العالم جميعا …. و اللى حتقوم بتخفيضها بنسبة 29% … فيقوموا حاطين مصر في الصوره في نفس البروجابندا اللى اتعملت قبل كده مع الطليان لما طلع قرار خايب للاستهلاك المحلي بوقف تصدير قطع غيار طائرات الاف 16 🙂

المساعدات العسكريه 1.3 مليار دولار زي ما هي و محدش قرب منها … اما المساعدات الاقتصادية اللى اصلا مش بتوجه للمساعدات الاقتصاديه 🙂 … قالوا حنأجلها خالص عشان يا حرام حقوق الانسان و حقوق جمعيات المجتمع المدني اللى هما جواسيس اصلا و اللى الدوله يتضيق على انشطتهم التخريبيه و بتراقبهم 🙂

فجابوا 3 معلمين كبار هم من قادوا جلسة الاستماع دي … طب مين هم بقي اللى قعدوا يعيطوا على حقوق حرية الرأي و التعبير و حقوق الانسان  !!!! …. خد عندك بقي عشان لما حد يشيرلك الفيديو تعرف ترد عليه 🙂

اول بطله هي الحاجه “ميشيل دن ” و دي حضرتك كبيره الباحثين في معهد كارينجي بتاع عمرو حمزاوي و اللى اتمنعت من دخول مصر اول لما تولي السيسي الحكم في 2014 و اللى اسست حركة “المصريون الجدد ” لمناهضة اعادة ترشيح عبد الفتاح السيسي رئيسا مره اخرى …… و اللى جوزها يبقي الحاج “تشارلز دن” اللى هو مدير برامج افريقيا و الشرق الاوسط لمنظمة فريدوم هاوس … فاكرينها ؟؟؟؟  🙂 🙂

اما التاني فهو “توم ميلونيسكي” و ده كان مساعد هيلاري كلينتون لشئون نشر الديمقراطيه و حقوق الانسان و هو الضيف الدائم في قنوات يتامي البنا المموله من قطر و تركيا زي قنوات الجزيره و العربي الجديد … و يعتبر من اهم المدافعين عن الاخوان و دائما بيوصفهم انها جماعه مظلومه تسعي لاحترام حقوق الانسان و نشر الديمقراطيه باستخدام الاسلام الوسطي .

اما التالت فهو “إيلوت ابراهام” و هو يهدودي صهيوني و خبير في الامن القومي و يعتبر من اكبر اللاعبين و الداعمين للتنظيمات المسلحه المعتدلة الكيوت الجميله اللى موجوده في سوريا و ليبيا =D =D

يعني من الااخر كده مين يشهد للعروسه 🙂 🙂 …  و دول مكانوش بيعملوا شغل المعلم الابنه … لا … دول كانوا محروقين و بيحاربو لاخر نفس عشان يلحقوا شقي عمرهم و خط بارليف اللى بيتهد داخل القاهره دلوقتي بهدوء و بطىء و بأقل الخسائر على المجتمع المصري ….. و برده االى حصل هو محاولة ضرب اسفين بين ادارة ترامبا و الادارة المصريه بنفس طريقة الاسفين بتاع قرار التصويت بتاع مجلس الامن بتاع فلسطين و اللى مصر سحبته و اتقدم تاني و اتوافق عليه غصب عن عين امريكا و مصر لعبت بيهم الكوره ساعتها 🙂

و عشان تبقوا عارفين الفتره اللى جايه ممكن نسمع اخبار عبيطه الهدف منها حضرتك زي حقوق الانسان و الاختفاء القصري  و علاقات مصر بكوريا و علاقتها بهتلر و موسيليني … و ممكن توصل ان يتهمونا بان مصر هي اللى اكلت الجبنه  🙂

طب يعني ترامب حلو و جميل …. اقول لحضرتك السياسه مفيهاش حلو و وحش …. فوز ترامب هى هدنه مع قادة اهل الشر بعتهالنا ربنا لمدة اربع سنوات لغاية لما نقف علي رجلينا و نرسخ فرض اراتدتنا في المنطقه ….. و نسيبهم مشغولين مع بعض و نستفاد من الموقف … و بصراحه مصر بتلعب باحترافيه و طالعه كسبانه من الجميع

معلش طولنا عليكم …. لكن ياريت راجعوا المقالات اللى موجوده تحت و اربطوا بينها و بين الاحداث الحاليه  🙂

تحياتنا

 

المراجع

———

لمتابعة تعليقاتكم