8 Dec 2015
مؤتمر القمة الثلاثى .. والأربعاء الأسود !!!
————————————–
مع كل الأحداث اللى بتحصل فى المنطقة والى نقدر نقول بكل أريحية ، وتأكيد مليون فى المائة أنها كلها مرتبطة ببعضها ، لأن الهدف واحد ، والمخطط واحد ، وشخوص الأعداء واحدة ، والجبهات معروفة وواضحة ، والموقف مشتعل فى كل الإتجاهات ، و الخيوط كلها لو بصيت عليها بموضوعية ، هــ تلاقيها كلها بتتجمّع وتلتقى فى النهاية سواء حالياً أو مستقبلاً عند نقطة واحدة فقط ……. مــــصـــــــر ….
وبالرغم من إن مصر فى قلب الأحداث .. لكن القيادة السياسية بتتحرك بمنتهى الوعى ، والذكاء ، والإتزان …. وبتخطى على رقعة الشطرنج وهى عاملة حساب لكل خطوة من الأطراف الأخرى ، قبل ماتعمل حساب لخطوتها هى .. وعلشان كدة … وفى وسط كل الأحداث المشتعلة دى ، مصر بتفاجئ الكل ، واللى مشغولين كلهم وبيتصارعوا على التورتة السورية ، بخطوة خرج كل الحسابات ، بالإعلان عن إجتماع القمة الثلاثى فى اليونان بين مصر وقبرص واليونان !!
الإجتماع ده هو الإجتماع رقم (3) .. وصفحة كلام فى الصميم كان لها السبق لما اتكلمنا من حوالى سنة وشهر بالضبط فى مقال بعنوان “ضربة كانت من معلم” ، عن أول إجتماع قمة حصل هنا فى مصر بين الأطراف الثلاثة .. واللى إتكلمت عنه المواقع الإخبارية وصحف العالم ، وبالذات الصحف الإسرائيلية ، و التركية واللى قالت إن إجتماع القمة الثلاثى ده يعتبر تحدياً لتركيا .. ووصل الأمر لقيام تركيا بــ تحريك بعض القطع البحرية التركية بالقرب من السواحل القبرصية لأن محور مناقشات المؤتمر كان عن إعادة ترسيم الحدود البحرية والعمل على إنهاء مشكلة تقسيم قبرص .. وبالرغم من كل ده خرج علينا كل الزياطين وكذابين الزفة ومخابيل الإحباط يهاجوا الصفحة ، ويهاجموا الدولة ويتهموا مصر بالتفريط فى ثروات الشعب المصرى … !!
وإستمر الزياطين فى إتهام مصر بإنها بتخطط للتنازل عن حصتها فى أبار شرق المتوسط لصالح اليونان بالرغم من إن الصحف اليونانية اللى صدرت فى الوقت ده ، ما إتكلمتش عن أى إلتزام مؤكد أو أى وعود تم حصول اليونان عليها فى إجتماع القمة مع مصر !!! .. وفى نفس الوقت تجاهل نفس الزياطين دوول إن تركيا بعد الإجتماع ده قلبت الدنيا ، وهددت ، وتوعدت ، ووصل الأمر للتهديد المباشر بضرب أى سفينة تشارك فى التنقيب عن الغاز فى مناطق “المياه الإقتصادية” المتنازع عليها .. وعلى الرغم من كل ده ، وكل الهجوم اللى شنته الصحف التركية والإسرائيلية على المؤتمر ده وعلى مصر بالذات ، إلا إن مصر إلتزمت سياسة الصمت .. أو بمعنى أصح سياسة “دع الكلاب تعوى” .. 🙂
مصر ماكتفتش بالخطوة دى .. لكنها إستكملت تحركاتها وحصل إجتماع قمة تانى خلال الزيارة اللى قام بها الرئيس السيسى فى جولته المتوسطية واللى أعطينا مجرد لمحة عنها فى مقال “الصقر المصرى يحلق ويفرد أجنحته فوق المتوسط” ..
وييجى إجتماع القمة الثلاثى القادم بعد سنة من الإجتماع الأول لتأكيد التعاون الثلاثى بين مصر وقبرص واليونان مع فارق جوهرى وهام جداً .. وهو إن مصر من سنة غير مصر النهاردة !!
– مصر النهاردة عندها إكتشاف غازى داخل المياه الإقليمية هــ يبدأ إنتاجه مع بداية عام 2017 هــ يخليها من أكبر الدول المصدرة للغاز الطبيعى على مستوى العالم .. واللى طلع كولجية المادة الخام للإحباط يقولوا “هو إحنا لسة هــ نستنى لسنة 2017 !!؟؟” 🙂
– مصر النهاردة عندها طائرات رافال اللى قال عليها مدمنى البرسيم إنها بتسخن 🙂 ، جاهزة النهاردة وبدون أى تردد ، لتغطية سماء المتوسط وحماية ثروات مصر والمصريين من اى حد ممكن يفكر ولو للحظة فى تهديد الأمن القومى المصرى !
– مصر النهاردة عندها الترسانة البحرية فى الأسكندرية ، على أعلى مستوى بعد عملية التطوير اللى تمت لها وتم الإعلان عنها فى خلال السنة اللى فاتت واللى طلع علينا مدمنى العهر السياسى يقولوا “إييه لازمة المصاريف دى ، عندنا حاجات أهم” !!
– مصر النهاردة عندها (الفرقاطة فريم) ، و وقعت صفقة 2 حاملة طائرات ميسترال الفرنسية ، جاري التدريب عليها من فترة في فرنسا… بأنظمة رادار وصواريخ وتسليح فرنسية واللى هــ يوصولوا لموانئ مصر شهر مارس القادم .. ومعاهم كمان بدأ توريد صفقة طائرات الــ ” كا-52 ” الروسية علشان بكدة يكون لها السيطرة البحرية الكاملة على مياهنا الإقليمية ، والتواجد بقوة سواء فى المياه الإقتصادية أو فى المياه الدولية .. والهيمنة على منطقة شرق المتوسط بالكامل مع تواجد الدعم الروسى والفرنسى ..
– مصر النهاردة بتتفق على تصنيع كمان 3 كورفيتات جاويند ، .. و هــ يتم استكمالهم في ترسانة الاسكندرية البحرية بأنظمة رادار وتسليح وصواريخ فرنسية متطورة تماماً ..
عرفنا بقى مصر كانت بتعمل إييه بقالها سنة !!؟؟
عرفنا بقى مصر بتتحرك إزاى على رقعة الشطرنج !!؟؟
عرفنا بقى إزاى مصر بتتعامل مع مصالحها إستراتيجياً !!؟؟
عرفنا بقى شوية الفشلة ، وكذابين الزفة ، والنكبة السياسية بتاعتنا اللى بيسموهم نخبة ، وأراجوزات العهر الإعلامى فى فضائيات رجال الأعمال ، إنهم يا إما مغرضين يا إما مش بيشوفوا أبعد من شبر قدامّهم .. ومالهمش شغلانة غير تصدير الإحباط والطاقة السلبية للشعب المصرى وخلاص !!؟؟
و الجميل بقى واللى لازم نعرفه إنه فيه وحدات قتال بحرية وجوية مصرية سبقت الرئيس السيسى إلى اليونان إمبارح والنهاردة لبدأ مناورات حربية مشتركة تستمر عدة ايام ، على سيناريوهات عمليات قتالية مختلفة هــ تقوم بها القوات المصرية واليونانية فيما يعرف بمناورات “ميدوزا 2015” .. بالتزامن مع إنعقاد مؤتمر القمة الثلاثى ،
و مش كدة وبس .. لكن بعد إنتهاء مؤتمر القمة هــ يقوم الرئيس السيسى بالإجتماع مع وزير الدفاع اليونانى لمناقشة التعاون العسكرى المشترك بين مصر واليونان وكيفية مواجهة التحديات والتهديدات اللى بتواجه المنطقة .. والنهاردة هــ يقوم الرئيس السيسى بحضور مؤتمر رجال الأعمال بــ أثينا لمناقشة تطوير مستوى التعاون الإقتصادى وبالذات فيما يخص قطاع الطاقة 🙂 …… واخدلى بالك من الحتة الأخيرة دى يا حاج محمد !!؟؟) .. 😉 =D =D
وطبعاً ناهينا عن القاء التمهيدى النهاردة مع رئيس اليونان ورئيس الوزراء اليونانى .. والمؤتمر الصحفى اللى تم عقده واللى كان فيه رسائل كتيرة موجهة بشكل مباشر وتحمل مؤشرات خطيرة وخصوصاً لما تم الحديث عن القضية الفلسطينية والتنسيق العسكرى والأمنى والإقتصادى ، وعن علاقة مصر مع دول الإتحاد الأوروبى 😉 😉
علشان كدة ، غداً الأربعاء هــ يكون بإذن الله أربعاء إسود على دماغ أردوغان ونيتنياهو … لإن إكتمال التنسيق الثلاثى لرؤساء مصر واليونان وقبرص سواء عرفنا تفاصيله أو ماعرفناش ،.. هــ يكون له أكبر الأثر فى وقف تنامى الحلف التركى الإسرائيلي فى شرق المتوسط .. بشكل ممكن يغير موازيين القوى فى منطقة شرق المتوسط سواء على المستوى السياسى أو العسكرى أو الإقتصادى ..
الغلبة على رقعة الشطرنج لمن يعرف ويدرك كيفية إدارة قواعد اللعبة .. و نحن فقط نراقب ونتعلم كيف يدير الصقور إستراتيجيات الصراع ، و معارك العقول 🙂 🙂