14 Jul 2017
السياسة فى زمن النخاسة
—————————
اللعبة السياسية مش ممكن تمشى فى إتجاه واحد .. وفهم وإدراك قواعد اللعبة السياسية قد يستعصى أحياناً حتى على خبراء اللعبة نفسها .. إما لأنهم مش ملمين بالصورة الكاملة ، وإما بسبب متغيرات بتحصل خلف الكواليس ، مايعرفهاش إلا اللى بيكونوا قريبييييين اوى .. ويمكن يكونوا كمان داخل نطاق الدائرة الحمراء اللى ماسكة خيوط اللعبة .. فما بالنا بقى بالمواطن العادى ، اللى اقصى معلوماته هو خبر منشور على الإنترنت .. أو شائعة طايرة هنا أو هناك على لسان احد الإعلاميين !!
والمؤسف بجد ، إنك تلاقى البعض بيتعامل بأريحية شديدة جداً فيما يخص العلاقات الدولية ، ويدلوا بدلوه ، ويقول ده صح و ده غلط ، ووصف وتحليل إييه اللى ممكن يتعمل أو لأ ، من خلال علاقته باصحابه .. و ده أكبر غلط .. لأن العلاقات الدولية وطرق التعامل فيها تختلف عن علاقتك بجارك أو زميلك فى العمل .. وماينفعش نتعامل مع صراع دولى بنفس المعطيات والحلول اللى بنتعامل بيها مع خناقة عم عطوة السباك ، و عم محمود البقال !! (مع إحترامنا الشديد طبعا للبقال والسباك اللى هى مهن شريفة واصحابها ناس محترمين) .. وإحنا كنا نشرنا مقال قديم بعنوان “أرنبنا فى منور أنور” 🙂 .. كمجرد مثال على تشابك العلاقات والمصالح الدولية .. وإن كل دولة ممكن تاخد الموقف وعكسه فى نفس الوقت على حسب الوضع والأطراف المتداخلة والمصالح … ألخ ألخ ألخ
قضية الملف القطرى قضية متشابكة جداً .. وتفاصيلها معقدة للغاية .. لإنه داخل فيها أطراف كتيرة ، ومصالح متمازجة ، وصراع مادى ، وناس ماسكين سيديهات على بعض .. لكن أهم شئ هو صراع فرض الإرادة ، ولغة القوة .. والجزء الأبرز فى الموضوع هو التحركات المكوكية اللى بيقوم بيها وزراء خارجية بعض الدول زى ألمانيا وإنجلترا وأميريكا واللى هدفها هو تفكيك التحالف ده بأى شكل .. وبتلاقيهم دايما مركزين على الدول الخليجية ، فى محاولة لتقنين الخلاف وحصره فى إطار الخليج فقط وإعتبار إنه خلاف عادى بين دول الخليج وبعضها .. و ده اللى أفشلته تماماً الامارات والسعوديه والبحرين لما أعلنوا ان الخلاف عربي وليس خليجي .. و ده يرجعنا تانى للمقال اللى نشرناه من 4 ايام ، وتحديداً يوم 10 يوليو بعنوان “المجتمع الدولى .. وإرادة محاربة الإرهاب” .. و ده يثبت بما لا يدع مجال للشك إن المشروع الغربى القائم على تفتيت وهدم دول المنطقة .. أداته الأولى والرئيسية هو تنظيم الإخوان .. وإفتكروا كدة اللى حصل ايام عزل مرسى … مش كانت نفس الزيارات المكوكية دى برضوا !!؟؟ 😉 🙂
وهنلاقى إن اميريكا بالذات بتستغل اللى بيحصل وبتتعامل معاه باسلوب نخّاس من بتوع العصور الجاهلية … لأن اميريكا اللى عملت الإرهاب ودعمته ، عملت كدة علشان ده بيخدم مصلحتها .. ولما بتعلن أو تفكر إنها تواجه الإرهاب .. ده برضوا علشان مصلحتها .. وهو ده السبب إننا بنقول إن امريكا بتنتهج اسلوب النخاسة السياسية لتحقيق أكبر مكاسب ممكنة من اللى بيحصل ده كله ، بدون ماتخسر أى طرف من الأطراف .. لأن أميريكا اللى طلع رئيسها فى خطاب علنى يقول فيه إن الحصار المضروب حول قطر هو بداية النهاية للإرهاب فى المنطقة .. وبعدين تخن صوته وقال “No more funding” .. هى نفس الدولة اللى وزير خارجيتها ريكس تيلرسون وقع من يومين مع قطر ، مذكرة تفاهم لمكافحة الإرهاب 🙂 .. بجد حاجة تضحك … وهى نفس الدولة برضوا اللى وزير خارجيتها ، واخد الطيارة مقايسة ورايح جاى بين الدوحة والكويت والرياض ، علشان يقنع دول المقاطعة ، يغيروا رأيهم … و ده معناه إن فيه ثمن لا يقل عن مليارات الدولارت تم دفعه لأميريكا من تحت الترابيزة بهدف خلخلة جبهة الحصار !! … وفى نفس الوقت .. أميريكا بتحاول يكون لها السبق والهيمنة علشان ماتسمحش لبريطانيا شيطان الإرهاب الأول بالتدخل لأن ترامب عايز يحجم الشيطان الأكبر ويحل محله !
ونلاقى كمان إن مش اميريكا فقط هى اللى بتمارس النخاسة السياسية … لكن كمان اللى بيدعموا قطر .. فــ نلاقى مثلا إن إيران بتدعم قطر بفلوس قطر .. وبتبعت لهم معونات مدفوعة الأجر .. وبترفع تعريفة المرور للطيران القطرى فوق الأجواء الإيرانية .. وبتشترط هى وتركيا إن الدفع فيما يخص اى دعم غذائى لقطر يكون بالدولار 🙂 .. و ده طبعا غير تكاليف إقامة الجنود الأتراك والحرس الثورى الإيرانى اللى بتتكلف مبلغ وقدره ….. هو ده الدعم وإلا بلاش 🙂
لكن الملفت للنظر ، هو ما تقوم به دول المقاطعة .. والتحركات السياسية الإستباقية .. واللى أدت لفشل كل محاولات فك الإرتباط وخلخلة إتحادهم .. من أول الوش الجبس اللى اخده وزير خارجية ألمانيا ، وإتقال له معلش بس إحنا مش فاضيين .. لتجاهل الدور البريطانى وإجهاضه بلعبة تسريبات الــ CNN .. لعدم التجاوب أو حتى محاولة الإهتمام بالتهديدات القطرية بتاعة هــ نسيب مجلس التعاون فى خلال 3 أيام ، واللى لحد النهاردة لسة ماخلصوش =D … والوصول أخيراً لزيارة ريكس تيلرسون وزير خارجية أميريكا اللى شارك في اجتماع سداسي مع وزير الخارجية السعودي عادل الجبير ووزير خارجية مصر سامح شكري، ووزير خارجية البحرين الشيخ خالد بن أحمد آل خليفة، ووزير الدولة الإماراتي للشؤون الخارجية أنور قرقاش، ووزير الدولة لشؤون مجلس الوزراء الكويتي الشيخ محمد عبدالله المبارك الصباح .. واللى قال بعدها المتحدث باسم وزارة الخارجية المصرية أحمد أبوزيد، في بيان، إن “الاجتماع تناول الأبعاد المختلفة للأزمة مع قطر واستعرض كافة التطورات الاخيرة الخاصة بها، حيث أعاد وزير الخارجية (سامح شكري) طرح شواغل مصر حيال موقف قطر الداعم للإرهاب، مؤكدا تمسك مصر بالمطالب التي قدمتها الدول العربية الأربع لقطر”. وأكد شكري أن “التوصل إلى تسوية لهذه الأزمة يظل رهناً بتفاعل قطر الإيجابي مع هذه المطالَب وتوقفها عن دعم الاٍرهاب والجماعات الإرهابية” … و ده اللى خلّى الراجل الطيب بتاع أميريكا يقفل دفاتره ويشحن شنطته ويرجع على أميريكا وصرّح وقال “بذلت قصارى جهدى للوصول إلى حلول دون جدوى ودول المقاطعة رفضت التوقيع على الوثيقة وإشترطت تنفيذ قطر للثلاثة عشر مطلب أولآ” .. ونقلا عن رويترز والعربية قال إنه مش وسيط لكنه جاء فقط لدعم جهود الكويت فى حل الأزمة .. وإن حل الأزمة قد يستغرق وقتاً 🙂 🙂 .. ولاحظوا إنه كان فيه بيان رباعى إستباقى قبل ما يشرّف سيادة الوزير ويجتمع بوزراء الخارجية الخمسة ، واللى أجهض زيارته من الأساس 🙂
مصر ودول المقاطعة يديرون ملف المقاطعة زى ما ذكرنا قبل كدة بحرفية شديدة جداً … وبيتعاملوا مع معطيات الأزمة بكل ذكاء وحزم .. وبيتم محاصرة الأفعى من كل الإتجاهات … وإحنا لما نشرنا من يومين صورة وخبر إستقبال الرئيس السيسى لوزراء الإعلام العرب وإجتماعه معاهم مع تعليق ساخر مننا “تشرب شاى بالياسمين !!؟” .. فوجئنا إن كتير من الأصدقاء مافهموش الخبر .. والبعض أساء تفسير التعليق الساخر !! … يمكن لأنهم ربطوه بفيلم الفنان عادل إمام .. وإعتبروا إن التعليق معناه إن مصر بتدفع رشوة لطرف من الأطراف .. وكمان البعض غضب “غضب محمود” غيرةً على بلده .. وقال إن مصر دولة شريفة ومابتعملش كدة .. و ده صحيح .. لكن المعنى المقصود كان مرتبط بتصريحات بعض وزراء الخارجية العرب ، زى مثلا تصريح وزير خارجية السعودية اللى قال “قطر سعت لشق الصف العربى” .. وقال “لا مجال بعد اليوم للسكوت على خطر الإرهاب” .. وتصريح وزير الإعلام السوداني، أحمد بلال عثمان “قناة الجزيرة تتمسك بخط إعلامي واضح هو إسقاط النظام وإثارة الفوضى في مصر، وهذا خطأ لن نسمح به” 🙂 … !!
فى السياسة ، ممكن كلام كتير يحمل ما يفوق معناه المباشر .. وشرب الشاى بالياسمين معناه إنك بتنجح تضم لك اصوات مختلفة ، تتكلم بإسمك وبالنيابة عنك .. وخصوصاً لما يكون اللى بيتكلموا دول هم وزراء الإعلام فى بلادهم .. مع الوضع فى الإعتبار ، إن أهم ضلع .. أو الضلع الرئيسى فى حروب الجيل الرابع ، هى الحرب الإعلامية .. وإلا ماكانتش قناة الجزيرة ، هى واحدة من المطالب الــ 13 لدول المقاطعة 😉 🙂
الصراع مع الإرهاب ومن يدعمه ومن يموله ، ومن يحرك من يموله ، لن ينتهى بين يوم وليلة .. وإرجعوا لكلامنا فى مقالنا يوم 2 يوليو بعنوان “قطر والعد التنازلى” ومقالنا يوم 5 يوليو بعنوان “البيان الختامى ” ..
هــ تلاقو إن الكلام كله ماشى مع سياق إن اللعب مع الأفعى محتاج صبر .. لأنه تاااانى وببساطة خالص إنت قررت تواجه أو تكسر الأداة الرئيسية لدعم الإرهاب الدولى .. يعنى حطيت رجلك على رقبة الأفعى … وهى عمالة تفلفص منك .. وتضرب بذيلها .. وتلف جسمها على القدم إللى بتضغط بقوة على العنق .. و بــ تبخ سمها من بعيد .. و بــ تصرخ وتهدد .. وتستخدم كل أسلحتها للهروب … لكن فى اللحظة إللى انت تقرر فيها تشيل رجلك من على رقبة الأفعى … او حتى تخفف الضغط شوية .. هتكون اللدغة قاتلة 🙂 … وعلشان كدة قولنا فى مقالنا السابق عن الموضوع ده ، ان الإجراءات إللى أخدتها دول المواجهة .. وردود الأفعال من الجانب القطرى، واللى كان معمول حسابها كويس جداً .. اخدت الملف كله لمرحلة اللاعودة ….. وطبعا مش عايزين نتكلم عن العمليات الإرهابية اللى بتحصل زى حادث إغتيال جنود فى السعودية .. وأحداث القليوبية والعريش ورفح فى مصر .. واخرهم اللى حصل النهاردة فى البدرشين .. لأنهم بيرفسوا فى كل الإتجاهات علشان هم موجوعين أوى ….