إستنزاف على أرض الواقع .. !!

17 Feb 2020

إستنزاف على أرض الواقع .. !!
———————————

هى إزاى روسيا ماتردش على تركيا فى موضوع إغتيال السفير الروسى فى أنقرة !؟
هى إزاى روسيا سكتت على إسقاط الطائرة الروسية المقاتلة بصاروخ تركى !؟
هى إزاى دول أوروبا ساكتين على نقل المقاتلين السوريين إلى ليبيا !؟
هى إزاى مصر ساكتة على تركيا واللى هى بتعمله فى ليبيا !؟
هى إزاى الصين ساكتة على مزايدات تركيا عليهم فى موضوع الإيجور !؟
هى إزاااااااااى … ألخ ألخ ألخ ..

الأسئلة دى كلها ، وتساؤلات كتيرة دايما بيتم طرحها من البعض ، فيما يخص الشأن العام ، العالمى ، وعلاقات الدول ببعضها البعض … والحقيقة إن طرح مثل هذه الأسئلة مش غلط .. و مش عيب … بالعكس … ده بــ يخلى الناس تحاول تبحث و تحلل و تفهم الأوضاع على حقيقتها … لكن الخطأ دايما بــ ييجى من حاجة واحدة فقط .. هو محاولة فهم الحقائق والأفعال وردود الأفعال .. عن طريق إسقاط العلاقات وأسلوب التعامل بين الدول ، على العلاقات بيننا وبين بعض على مستوى الأفراد !! .. و ده شيئ مستحيل ..

طب لييه !؟ … لأن العلاقات بين الدول وبعضها علاقات متشابكة جدا .. بــ تحكمها المصالح .. والرؤى المستقبلية .. وموازين القوى .. والتوازنات الإقليمية .. والدولية … والعلاقات الإقتصادية .. والميزان التجارى … و شبكة العلاقات الدولية لدى كل دولة ، ومدى الإستفادة من التحالفات الدولية .. ألخ ألخ ألخ …. فــ ماتستغربش أبدا لما تلاقى رد فعل دولة ما على تصرف دولة أخرى ، بــ يبقى مخالف لتوقعاتك .. أو مخالف للنسق العام لردود الأفعال !

النظام التركى فى الفترة الماضية كان ومازال بــ يتبع سياسة البلطجة … البلطجة السياسية والعسكرية .. واللعب على كل الحبال ، فى أسلوب إبتزازى رخيص …. وكأنه بيحاول طول الوقت يوصل رسالة للكل ، مؤداها على سبيل المثال .. هاااااا يابوتين هــ تعمللى اللى أنا عايزه و أبقى معاك .. وإلا أروح للناحية الثانية !!؟ … هااااا يا أوروبا هتعملولى اللى أنا عايزه وإلا أفتح لكم الحدود ، وأفتح عليكم الدواعش … و هكذا وهكذا …. و فى المقابل بــ يتبع أسلوب خطابى شعبوى للقواعد بتاعته ومؤيديه وبهاليله سواء فى الداخل التركى أو خارجه .. علشان يفضل محافظ على تأييد البهاليل المستمتعين بحقن المخدر اللى بياخدوها … والكلام ده شرحناه فى مقال سابق بعنوان:

الحنجورية الأيديولوجية .. الشيطان يعظ .. !“ولا عــزاء للـمـغـيـّبـيـن”

طب علشان مانطولش عليكم دلوقتى … إييه اللى بيحصل بالنسبة لتركيا سواء فى سوريا أو فى ليبيا ؟؟

لازم الأول نبقى فاهمين ، إن التظام التركى فى الوقت الحالى بيعانى من أزمة إقتصادية طاحنة .. و ده مش كلامنا .. لكن كلام مؤسسات دولية وتقارير إعلامية نقلا عن المؤسسات الإقتصادية الدولية زى البنك الدولى ومؤسسات التصنيف الإئتمانى اللى إتكلمت من فترة عن خفض التصنيف الإئتمانى التركى … وتخطى مستوى الدين الخارجى حاجز الــ 450 مليار دولار بما يتجاوز المستويات الأمنة للديون الخارجية ، وإرتفاع البطالة لما يتجاوز 13.5% وإرتفاع مستويات التضخم بشكل مرعب ، وهبوط الليرة التركية لأدنى مستوياتها متخطية حاجز الــ 6 ليرة مقابل الدولار .. و كمان ما يتم تداوله عن عمليات تخارج إقتصادية من الإقتصاد التركى للشركات الكبرى .. وكل ده مؤشرات بتقول إن الوضع ماشى فى سكة اللى يروح و مايرجعش ..

طبعا بهاليل وحريم السلطان ، هــ يدخلوا يقولوا ، ياعم شوف نفسك الأول .. بص إنت فين ، وتركيا اللى انت بتتكلم عنها فين … طب هو الدولار بكام جنيه مصرى … هع هع هع هع …. 🙂 .. و طبعا اللى بيقول كدة ، هو بس بــ يحاول يبرر لنفسه قدام نفسه شعوره وإحساسه بالدونية المطلقة … و دفاعه المستميت بدافع أيديولوجى بحت … لأنه ببساطة خالص ، كل مؤشرات مصر ماشية فى السكة العكسية .. يعنى سكة صعود مش هبوط .. و ده غير إن اللى بيحصل فى تركيا ده سببه تراجع إقتصادى حقيقى .. من غير أى إصلاح إقتصادى ولا تعويم عملة ، ولا ثورات ومظاهرات ، وحروب مليشيات مسلحة على الحدود زى ما بيحصل فى مصر .. و مع ذلك .. و رغم كل ده .. مصر بتتقدم ..

و دى مقالات قديمة نشرناها تخص الإقتصاد:

مااااااااااعلينا …
نرجع تانى لموضوعنا ونقول إن الروس .. و مش الروس بس .. لكن الأميريكان كمان … سابوا “جرب أحمق بغبغان” يصدق نفسه ، وسابوه يدخل سوريا برجليه ويسقط فى المستنقع .. وبالذات الروس اللى لهم معاه ثأر بايت ، حتى وإن أظهروا العكس … و بعدين صدق نفسه كمان وقالك أروح أعمل إتفاقية أمنية فى ليبيا وأحمى رجالتى هناك .. وطز فى أوروبا ، و طز فى مصر ، وطز فى حفتر … و بعد مؤتمر برلين .. إتساب برضوا يبعث مليشياته لليبيا .. ومايمنعش إن المجتمع الدولى يعمل شوية شغل سياسى كدة على طريقة الشيئ لزوم الشيئ ….

طب والنهاردة النتيجة إييه ؟؟

النتيجة إن إردوغان دلوقتى (ٍStretched up) .. و ده اللفظ المهذب للتوصيف .. بمعنى إنه أصبحت رجله فى إدلب ، ورجله التانية فى مصراتة … وكل الأطراف مدورة الضرب فيه و فى جيشه ومليشياته .. ده غير التلطيش السياسى الدولى .. !!

أردوغان النهاردة بمنتهى الصفاقة بيهاجم فى تصريحاته الجيش السورى اللى بيتقدم فى ريف إدلب ، بدعم روسى قوى … و بيحذره من إنه يتقدم أكثر من كدة ، وإنه لازم يتوقف عن تقدمه ، وإلا هــ يكون فيه رد فعل عنيف .. وكأن الجيش السورى جيش معتدى محتل ، مش جيش بــ يسعى لتحرير أرضه من إيد الإحتلال التركى ….

و إحنا بصراحة مش شايفين أى معنى لمناشدة أردوغان لبوتين وللمجتمع الدولى التدخل للمساعدة في وقف تقدم الجيش السوري فى إدلب بناء على إتفاقية سوتشى ، غير إن أردوغان متبهدل حرفياً … و طبعا لسان حال الرد الروسى كان “والله ما أنا .. دى أوختشى منى” 😁 .. أما فيما يخص ليبيا … بــ برغم كل اللى بيتعمل على المستوى السياسى … والمناقشات فى مجلس الأمن .. إلا إنهم لحد دلوقتى ، ماقدروش يعملوا وقف نهائى لإطلاق النار … والمشير خليفة حفتر ، قائد الجيش الليبى قالها صراحةً .. أنه لا وقف نهائى لإطلاق النار إلا بشروط …

دلوقتى أردوغان مافيش قدامه فى سوريا إلا إنه ، إما ينسحب .. وبالتالى هــ يتفضح ويبقى مهزوم فى نظر الجميع … أو إنه يدعم خطوطه وقواته بأليات ومدرعات .. ويقوم بعملية موسعة .. وساعتها هــ يصطدم أكثر بالجيش السورى بدعم روسى ، و كمان مايضمنش ردود الفعل العالمية … وممكن يتورط أكثر .. ويخسر جزء من جيشه … مع إستمرار حالة الإستنزاف لإقتصاده المنهك

وبالنسبة لــ ليبيا .. فــ لو هو إتورط أكثر فى سوريا ، هيصبح غير قادر على دعم مليشياته المسلحة فى ليبيا ، وبالتالى هـ يخسروا الأرض اللى فى إيديهم ، و مش بعيد يخسروا حياتهم نفسها … وبكدة يبقى البهلول الأحمق خسر فى الجبهتين وخرج بــ “خفى حنين” .. مع خسائر إقتصادية فادحة ايضاً ..

هل هذا هو ما ستسفر عنه الأحداث .. أم إننا سنشاهد تطورات أخرى !؟
ده اللى هــ نشوفه فى الأيام القادمة ..
و ممكن يبقى فيه مستجدات تغير حاجات كتيرة

طب مصر فين بقى من كل ده !!؟؟
إحنا !!؟؟ …. مالناش دعوة يا موهى 🙃🙂😁

تحياتنا للجميع .. وحفظ الله مصر

لمتابعة تعليقاتكم