17 Jul 2018
الوعي الجمعي في مواجهة كتائب الارباك .. !!
——————————————–
-مهاتير محمد رجع 90 مليار دولار للبلد في اول يوم و قبض على الفاسدين
– رئيسية كرواتيا تبيع طائرات الرئاسة و تقضي على الفساد و تنقل اقتصاد كرواتيا الى مقدمة الدول.
-انتشار الرز البلاستيك … مع ظهور البيض البلاستيك في السوق
-الجيش بيستورد رز بلاستيك
-رئيس مصلحة الجمارك طلع برىء و الجيش اللى لفق ليه التهمة عشان مسك لهم شحنة مخدرات
-وزير التموين امر بوضع ماده تنهي على خصوبة الرجال للحد من الزيادة السكانية
-تعليمات وزارية … اللى حيموت في مستشفي حكومي … الدولة حتاخد اعضاؤه تبيعها و تتاجر فيهم
-عصابة لسرقة الاعضاء وراء مقتل اطفال المريوطية
-تركيا بلد خلافة اسلامية و مافيهاش دعارة ولا بيتم فيها حماية مهنة الدعارة بالقانون و حماية حريات الشواذ
-طيارة وقعت في مطار القاهرة وانفجرت و تم غلق المجال الجوى و فيه عشرات الضحايا
-تركيا مسلفة البنك الدولى و اقتصادها مش حينهار
-تشغيل كلمة تحيا مصر بصوت السيسي بدلا من سارينة سيارات الاسعاف
-التلاميذ حيخشوا المدارس بتذاكر قيمتها جنيه واحد عن كل يوم
-وزير النقل سيستورد قطارات تقف تتعدل لوحدها لو اتقلبت
-فرض ضرائب على المواريث
-فرض ضريبة تحصل على دفن الموتي و لا يتم دفنهم الا عند دفعها
-مدير السي اي بي هرب ب 180 مليون جنيه الى الامارات
-طائرة لمصر للطيران اتفتح بابها اثناء رحلتها بس ربنا ستر و نزلت سليمة
-تدخل اي مستشفي في اوروبا تتعالج و تاخد العلاج و يتصلوا بيك يتطمنوا عليك حتي لو مش مؤمن عليك من غير ما تدفع ولا مليم
-مافيش فقراء و لا عشوائيات و لا مشردين و لا ناس بتموت من الجوع في اوروبا
-نشر فيديو تمثيلي و دعائي لرجال المطافىء في كرواتيا على انه حقيقي
-نشر فيديو مفبرك عبارة عن رقص و طبل و زمر بمستشفي على انه رقص على السلام الجمهورى
-غواص مصري يعيش بالدوحه يشارك في عملية انقاذ اطفال الكهف في تايلاند
-التربية و التعليم تقرر عدم صرف تابلت الطلاب الا بعد دفع 600 جنيه
—————————————————————————————————–
مااااااااسورة شائعات ضربت فجأة فى البلد … !!
الحقيقة هى مش فجأة أوى .. لأننا توقعنا الكلام ده .. وحذرنا منه من فترة .. وحذرنا اكثر من الصفحات والجروبات القديمة الميتة اللى كلنا كنا عاملين لها فولو من زمان .. سواء صفحات شعر أو أكل وطبيخ او كوميكس أو صفحات فنية او ثقافية .. ومات التفاعل عليها .. وفجاة لاقيناها بدأت تظهر فى التايم لاين بتاعنا باسماء تانية أو حتى بنفس الأسماء .. وتبث سموم وهجوم على الدولة ومؤسساتها سواء بشكل مباشر أو بشكل غير مباشر بأسلوب دس السم فى العسل .. وإحنا بنستغرب .. الكلام ده كله ظهر على التايم لاين بتاعنا إزاى !!
مجلس الوزراء رصد 60 ألف شائعة ظهرت فى خلال 3 شهور .. يعنى بسم الله ماشاء الله بقى فيه منافسة بين نشر الشائعات ومعدلات الإنجاب .. وكأننا بنتفنن وبنحارب بكل قوتنا علشان ندمر بلدنا بإيدينا مش علشان نحميها ونحافظ عليها !!! … أيوة .. اللى إحنا بنعمله ده ممكن يهد البلد .. وخصوصاً موضوع الشائعات .. أييييوة مرة تانية .. نشر الشائعات بين الناس على طريقة اصل عماد مأكدلى ممكن تهد دولة .. والكلام ده مش مجرد كلام بنملأ بيه مقالات علشان ناس تعمل إعجاب وشير .. لكنه كلام حقيقى .. لأن الشائعات من اهم الادوات اللى بتستخدم فى كسب الحروب وهدم الدول ، من ايام الحروب الكلاسيكية وحروب التتار .. مرورا بالحربين العالميتين الأولى والثانية .. وبعدهم حرب اكتوبر وحرب الخليج .. ووصولا لحروب الجيل الرابع والخامس اللى بدات مع ثورات الخراب العربى وحتى يومنا هذا !!
إوعى تستهتر بالشائعات ابداً .. وبتاثيرها على الشعوب ومؤسسات الدول .. و إوعى تفتكر إن اللى بيحصل فى مصر فى الكام شهر اللى فاتوا مجرد صدفة .. لأ .. أبثلوتلى … دى عملية مدروسة وحرب ممنهجة على اعلى مستوى من الإحترافية .. سواء صدقت ده او ماصدقتهوش .. وسواء إعترف بيه بتوع (مش كل حاجة تقولولنا حرب ومؤامرة) أو ماعترفوش بيه … لأن الواقع لا يمكن إنكاره .. والجاهل مش ممكن أبدا يعترف بجهله .. أو يصدق عكس ما يؤمن بيه …. أسف .. قصدى عكس ما تم حشو عقله به ، من مفاهيم مغلوطة .. وقلب للحقائق .. وتدمير للثوابت …. !!
ايام زمان فى الحروب الكلاسيكية كان التتار بيبعتوا جواسيس للبلاد اللى هم عايزين يحتلوها ، والجواسيس دوول بيتكلموا بلغة اهل البلد دى .. وينتشروا بين الناس فى المقاهى والفنادق والحانات والأسواق ويبثوا الشائعات بين عامة الشعب ، وبين من يسمون انفسهم النخبة ، ويفضلوا ينفخوا فى النار ويضربوا فى الروح المعنوية بإستخدام الكذب والشائعات لحد ما البلد تنهار داخلياً وتصبح الشعوب مؤهلة نفسياً للهزيمة .. و ده طبعا غير التمزق الداخلى اللى بيعانى منه المجتمع بفعل كل الشائعات علشان كمان مايبقاش فيه حيل حتى للمقاومة بعد كدة !! 😏
ألمانيا النازية بقيادة وزير اللإعلام بتاعها وإله الحرب النفسية والدعائية فى العصر الحديث “جوزيف جوبلز” كانت بتبعت طائرات ترمى منشورات على دول المواجهة مع ألمانيا ، سواء كان قبل أو اثناء الحرب مع الدول دى .. وكانت المنشورات دى مليئة بالشائعات والأخبار الكاذبة والحض على الإستسلام والخروج على دولتهم اللى باعتهم وفرطت فيهم وتخلت عن حمايتهم .. والقائد العسكرى اللى خان وعمل إييه .. والقائد اللى إنسحب منين لــ فين .. والمسئول الفلانى الفاسد اللى معاه فلوس قد إييه .. ألخ الخ الخ … ومع الوقت إنجلترا بدأت ترد بنفس الأسلوب .. ومش بس كدة .. لكن المخابرات الإنجليزية عملت قناة إذاعية إسمها ألمانيا الحرة وكأنها بــ يتم بثها من داخل ألمانيا .. بتتكلم بالألمانية العامية .. وكان ظاهرها دعم ألمانيا .. وبث نشرات وبيانات تأييد لهتلر والحزب النازى والرايخ الثالث … وإلى الامام يا هتلر ….. وعاشت المانيا ….. لكن كل البيانات والنشرات كانت مدروسة بكل عناية من قسم الحرب النفسية فى المخابرات البريطانية .. وكان الهدف من القناة دى هو دس السم فى العسل ونشر الشائعات الهدامة والأخبار المغلوطة فى خلطة مدروسة شديدة الإحترافية وعكس الظاهر تماماً .. علشان توصل للنتيجة النهائية وهى تدمير الروح المعنوية للشعب الألمانى كله وبالذات داخل قطاعات الشباب اللمتابع بشغف للقناة ده بسبب أسلوبها الحماسى والشعبوى .. ومش للشعب والشباب بس .. ولكن كمان للنخبة ولقيادات الجيش .. وفضلت القناة دة شغالة حتى سقوط برلين وإنتحار هتلر وهزيمة ألمانيا النازية بعد ما حققت نتائج مذهلة فى ضرب الروح المعنوية للشعب الألمانى
إسرائيل زمان كانت بتبعتلك جواسيس .. وبتجند عملاء من اهل البلد .. كل مهمتهم إنهم ينقلوا لضباط الموساد ، حاجة إسمها تقارير ميدانية ، ومؤشرات رأى عام .. وناس تانية كانت بترصد وتبلغ بشكل يومى أتفه الأشياء ، زى اسعار السلع الغذائية ومدى توفر أو نقص السلع دى .. ومدى رضى وسخط الناس .. وفى المقابل يبدأوا فى بث روح الإنهزامية والفرقة ونشر الشائعات والأخبار المغلوطة بأسلوب متدربين عليه كويس أوى ، بهدف ضرب الروح المعنوية للجبهة الداخلية وتدمير التماسك المجتمعى .. واللى منكم شاف مسلسل “دموع فى عيون وقحة” او حتى قرأ الكتاب .. أكيد فاكر إنه تم التلميح فى المسلسل لشئ زى ده … طب و هــ نروح بعيد لييه … أكيد كلنا فاكرين شائعات الجيش الإسرائيلى الذى لا يقهر .. وخط بارليف اللى محتاج قنبلة ذرية لتدميره .. واللى لو كنا صدقناها ، كان زماننا لسة فى مفاوضات إستعادة سيناء المحتلة لحد النهاردة !!
العراق سقطت فى الإعلام والميديا قبل ماتسقط بالفعل بحوالى اسبوع .. واكيد كلنا مش هــ ننسى شائعات سقوط مطار بغداد وهروب الجيش العراقى .. وصولات وجولات “محمد سعيد الصحاف” وزير الإعلام العراقى اللى كان مش ملاحق ياعينى على تكذيب الشائعات لحد ما العراق سقطت فعلياً !!
وطبعا مش محتاجين نتكلم عن كم الشائعات اللى تم تداولها فى مصر من قبل يناير 2011 وحتى اللحظة دى .. !!
هم بقى دلوقتى لا محتاجين يرموا عليك منشورات .. ولا يبعتولك جواسيس تجمع معلومات وتبث شائعات .. ولا حاجة من دى أبداً … هم زرعوا جواك (جوة المجتمع يعنى) أفكار مريضة ، وعقول مغيبة ، وتوجهات هدامة ، وفرق وجماعات سواء متأسلمة أو يسارية أفكارهم ماتفرقش عن بعض كتير فيما يخص الوطن والولاء والإنتماء للغير .. وبعدين رمولك فى حجرك السوشيال ميديا ، ووسائل التواصل ، والقنوات الفضائية الموجهة .. اللى انت بتاخد منها وبتنشر بيها ومنها على طريقة عماد مأكدلى .. وهم قاعدين يتفرجوا عليك ويضحكوا عليك وانت بتستخدم السلاح اللى إدهولك علشان تدمر بيه نفسك بنفسك !!!
طب إييه رأيكم إن موقع الفيفا نفسه قال إنه رصد العديد من الشائعات اللى تخص كثير من المنتخبات المشاركة فى كأس العالم ، لكن أكثر فريق طالته الشائعات كان هو المنتخب المصرى … طب مش ده الكلام اللى قولناه فى وقتها .. وقولنا إن ده حملة ممنهجة هدفها إحباط المنتخب بلاعبيه وإدارييه .. بغض النظر عن المستوى الغير المرضى اللى ظهر به منتخبنا فى البطولة !! .. طب إذا كان ده بيتعمل على المستوى الدعائى والرياضى فيما يخص الفرق الرياضية .. فما بالك بقى بدولة أو منطقة بحالها عايزين يهدوها ويدمروها من أجل تنفيذ مخططات معينة للسيطرة على المنطقة دى ، لخدمة أطراف ودول معينة ، ولنهب ثروات وخيرات المنطقة !!
حرب الشائعات لا تقل فى خطورتها عن حرب الإرهاب والمواجهات المباشرة بالدبابات والطائرات والرصاص الحى .. ولو بصيت وركزت شوية ، هــ تلاقى نفسك بنشرك للشائعات والكلام المغلوط وروح الإنهزامية بالشكل ده ، بقيت واقف فى صف عدوك بدل ماتكون ضده .. لأنك بتعمل بالضبط اللى هو عايزك تعمله .. وإوعى تفتكر إن اللى بيعمل كدة وبيضربك فى كل لحظة ، مجرد شوية عيال قاعدين وراء الكيبورد بيشتغلوا بشكل عشوائى من كتر الزووولم والكمع والكهر اللى هم عايشين فيه .. لأ .. أبثلوتلى تانى 😊 .. هم فعلا شوية عيال .. بس بيشتغلوا بأسلوب عمل إحترافى بتوجيهات الغير .. سواء كانوا فاهمين ده أو مش فاهمينه .. والمصيبة الأكبر بقى .. إنك تلاقى حتى المؤيدين للدولة بيسقطوا فى نفس الفخ وياخدوا منهم ويصدقوا وينشروا !!!
والأسلوب الجديد بقى فى إطلاق الشائعات اللى ماشى اليومين دول ، تلاقى واحد جايب صورة لأى مسئول .. ويلطع عليها لوجو أى موقع مشهور ، زى اليوم السابع أو الوطن أو صدى البلد أو الأهرام أو العبرى اليوم (قصدى المصرى اليوم 😉 ) .. ويروح حاطط عليها أى كلام مالوش معنى ولا له أى أساس من الصحة ، وينشره بإعتباره تصريح رسمى من مصدر موثوق منه .. والدليل أهو .. نقلا عن موقع إخبارى محترم .. والناس هات يا شير .. لكن تسأل عن مصدر الخبر باللينك بتاعه ، تلاقى صوت صرصور الحقل اليتيم .. زى تصريح وزير التموين اللى إنتشر بإن الوزارة بالتنسيق مع وزارة الصحة هــ تحط حاجات على العيش والمواد التموينية علشان تقلل القدرة على الإنجاب .. وزى تصريح وزيرة الصحة إن سرينة الإسعاف هــ تتغير وتبقى تحيا مصر بصوت الرئيس السيسى … وغيرها كتير أوى مما لا يمكن حصره هنا .. والمنتشر بشكل كبير على كل صفحات السوشيال ميديا
أنا عارف إن الموضوع صعب مش سهل .. واللعبة متشعبة بشكل كبير ، وللأسف بتأثر على الجميع ، وخصوصاً فى غياب إعلام وطنى حقيقى وجاد فى مواجهة هذا الكم الهائل من الشائعات …. وعارف كمان إن فيه ناس بتضعف قدام اللايك والشير ، ومش بتقدر تقاوم إنها ماتشاركش فى الهيصة .. لكن ركز شوية وفكر وإفهم .. إن كل خبر أو معلومة غلط أو شائعة بتساهم فى نشرها ، إنت كدة بتخدم عدوك .. ومش كدة وبس .. لكن ده إنت بتسمحله يستخدمك فى تدمير وطنك !! .. وإذا كنا زى ما قلت بنعانى من غياب الإعلام الوطنى .. وإذا كنت عايز تبقى انت اللإعلام البديل والظهير الشعبى الحقيقى للدولة ، فلازم تفكر مليون مرة قبل ما تصدق أو تنشر أو تساهم فى نشر معلومة أو خبر مالوش أى أساس من الصحة
سلاح الوعى هو اللى أنقذ مصر من الضياع فى الكام سنة اللى فاتوا .. ومازال هو السلاح اللى بيحمى ظهرك وظهر جيشك وكل الأجهزة الأمنية اللى بتقاتل بشراسة فى معركة وطنك .. ولو سلاح الوعى ده إنهار .. يبقى ظهرنا إتكشف .. وساعتها .. ماحدش يعرف الضربة هاتجيلنا منين وشكلها إييه .. لكن الأكيد إنها هــ تكون ضربة قاسمة .. و .. وقاضية …
لكن الشئ الإيجابى والمضيئ فى الموضوع كله إن معدل الشائعات المهول والغير مسبوق ده واللى إتفتح علينا من كل حتة .. وفى كل الموضوعات .. وعلى كافة المستويات .. يخليك تتأكد ببساطة خالص ان اللي بيحصل ده مش طبيعي ومش عادي و مقصود بيه إنت .. إنت وبس … و ده معناه إنهم مش قادرين يعملوا معاك حاجة غير كدة ، وإنهم فشلوا فى كل حاجة تانية ممكن تتعمل معاك ، .. فشلوا فى هدم الدولة إقتصادياً .. فشلوا فى حصارك سياسياً .. فشلوا فى ملف الإرهاب .. فشلوا فى ملف التقسيم .. فشلوا فى ملف اللاجئين وإستغلالهم سلاح ضدك .. فشلوا فى هدم كل المشروعات التنموية القومية أو حتى إيقافها لأجل غير مسمى .. فشلوا فى تفتيت الجيش ووقف صفقات التسليح .. فشلوا فى تحويل سيناء لمستنقع إرهابى يستنزف الجيش والشرطة .. فشلوا فى كل حاجة و فى كل مخطط بيعملوه ضد مصر .. ومش فاضل لهم سلاح غير سلاح الشائعات والكلام على السوشيال ميديا .. وفلان قال ، وعماد مأكدلى … وطبعا سلاح الكلام ده إنتم عارفين بنسميه عندنا فى مصر إييه .. 😉😄 !!! .. لأن هو ده تمامهم 🙂
الوعى يا مصريين ..
الوعى يا مصريين ..
الوعى يا مصريين ..
مرجعيات قديمة عن الشائعات تم نشرها سابقا .. برجاء القراءة .. ويا سبحان الله .. وكأن التاريخ يعيد نفسه 😊