28 Jun 2019
صفقة القرن الأمريكية !!!
————————-
بدأت ورشة البحرين الاقتصادية و اللى بيعرض فيها الأخ كوشنر زوج بنت الحاج أبو حنان “ترامب” على رأى عمرو أديب …، الجزء الإقتصادي من الرؤية الأمريكية لصفقة القرن للحل و التسوية النهائية للقضية الفلسطينية ….. و علشان بدأ الموسم القومي للهبد و المزايدات …. و لأن التكرار يعلم الشطار … خلونا نتكلم تاني و في نقاطك محددة … بس الله يرضي عليكم واحدة واحدة كدة و تعالي على نفسك و هات كوباية الشاي بتاعتنا و كمل قراية للآخر.
• مبدأيا أمريكا دولة عظمي لها أهدافها بيحاول يحققها كل رئيس بس بطريقته …. أوباما إختار حروب الجيل الرابع و الحرب بالوكالة بواسطة جيوش من الكلاب السعرانة الإرهابيين لتحقيق أهداف أمريكا …. في حين أن ترامب معترض تماما على هذا النهج …. لانه رجل أعمال سياسي دماغة كبيرة ، شااااطر جداً ، و عنده أجندة واضحة و معلنة و ماشي فيها بند بند و بنجاح …. فـ أولاً هو كرجل أعمال عارف كويس جداً ان الفلوس بتهرب طول ما فيه إرهاب و ان مينفعش اصرف المليارات على كلاب سعرانة على الأرض لتحقيق أهدافي و بعدين ماعرفش أسيطر عليهم …. طب ما أخد انا أضعاف أضعاف المليارات دي من دول و حكومات مستقرة أحميها بنفوذ الدولة الأمريكية … و أفرض حلولي عن طريق الصفقات الإقتصادية و المصالح المشتركة …. أو العقوبات … و أستخدم أنا الفلوس دي إني أعيد بناء الدولة الأمريكية…. و كل ده من غير حرب و لا وجع دماغ.
• ترامب نفذ كل وعوده الإنتخابية اللى اطلقها بند بند …. قدر يحجّم كوريا الشمالية … و نفذ العقوبات على روسيا … و بــ يواجه الصين تجاريا بعقوبات لاكبر شركاتها ، و بيحاول يمنع إيران من الوصول الى السلاح النووى (هــ نتكلم عن الموضوع ده في المقال القادم) …. و نقل السفارة للقدس ، و اعترف بالجولان زي ما كان بــ يوعد …. و بدأ في عرضه للحل النهائي للقضية الفلسطينية زي ما كان بــ يوعد و يقول …. عشان كدة … بعت جوز بنته رجل الأعمال الى الشرق الأوسط عشان يبدأ لعبة رجال الأعمال انه يرمي بياضه و يخلص أقدم قضية سياسية في المنطقة و بنفس الأسلوب …. أسلوب الصفقات الإقتصادية.
• و كالعاده الله يرضي عليكم عشان المرارة مش ناقصة … 😊 … ماحدش يدخل يزايد و يقول انكم معجبين بيه و عمالين تشكروا فيه و الكلام الخايب ده … احنا بــ نوصف نهج هذا الرجل مش أكتر … سواء كانت سياسته ضد مصلحتنا او معاها .. و كمان قبل ما ندخل في اللى بيحصل دلوقتي في المنامة …. و عشان برضوا السادة المزايدين اللى فلقونا بموضوع صفقة القرن و إن مصر هي اول من تكلمت عن هذا المصطلح …. فياريت بس تهدي على نفسك شويه و تفتكر 3 عناصر مهمين جدا:-
• أولا:- لو كان العرب زمان سمعوا كلام الدولة المصرية و سمعوا كلام الرئيس الشهيد / محمد أنور السادات …. و حضروا مفاوضات كامب ديفيد … كان زمان دلوقتي فيه دولة فلسطينية كاملة السيادة على كامل 40% من الأراضي الفلسطينية عاصمتها القدس الشرقية معترف بيها دوليا …. لكن كالعادة الغباء كان سيد الموقف ساعتها لانهم رفضوا كل حاجه و أرضعوا أجيال عربية كاملة بأكاذيب ان مصر هي الخيانة و انهم حيرموا اسرائيل في البحر ..وكل اللى رفضوا ياخدوه ساعتها …. مش عارفين النهاردة ياخدوا حاجه منه.
• ثانيا السبب الرئيسي في فشل أي حل لليوم و نجاح أمريكا في دعم إسرائيل في تنفيذ خططها الإستيطانية و ضم القدس و الجولان …. هو الإنقسام الفلسطيني و ليس شىء آخر … فــ الفلسطينيين أنفسهم أصبحوا أهم سلاح في يد إسرائيل للقضاء على القضية الفلسطينية نفسها … و ده بكل أسف ☹ .. اتكلمنا عليه بالتفصيل في مقالات مفصلة ، هتلاقوا بعضها هنا للى عايز يسترجع معلوماته :-
- الكائن الإخواني الحمساوي … عذرا بن عميتاى
- القدس عربية … و الحنجورية الوطنيه للمزايدين
- نقل السفارة و سفالات الحنجوريين
• ثالثا موقف الدولة المصرية مش سرى و لا فيه صفقات تحت الترابيزة … بالعكس … الموقف المصري وااااضح وضوح الشمس .. ومعلن .. وأخر حاجة كانت فى القمة العربية فى مكة … و هو … اتفاق سلام شامل عادل على اساس دولتين كاملتي السيادة طبقا لحدود 4 يونيو 1967… أي قبل حرب 5 يونيو …. و دولة فلسطينية عاصمتها القدس الشرقية …. و مرجعيته قرار الامم المتحدة رقم 242 …. و المفاوضات هي اللى هــ تحدد مواضيع اقتسام المياه و موضوع اللاجئين و الاشراف القدس ….. و في المقابل ستطبّع الدول العربية تطبيعا كاملا مع اسرائيل و اطلاق المشاريع الاقتصادية و التنموية المشتركة….. و عمر ما مصر هــ تفرض حل على الفلسطينيين غير اللى يوافقوا هم عليه ….
(إشاعة صفقة القرن – بمبدأ كلم الجماعة تلهيك و اللى فيها تجيبه فيك)
————————————————————————
• طب اييه اللى بيحصل في البحرين ؟؟؟ … شوف يا سيدي … ترامب بعت لينا المعدول جوز بنته “كوشنر” اللى هو رجل اعمال علشان يرمي بياضه … و كـ أي تاجر شاطر بـ يفاصل في الصفقة … و الصفقة ليها شق إقتصادي و شق سياسي …. هــ يبدأوا بالخطوط العريضة للشق الإقتصادي الاول … و لو اتوافق عليه … هــ يخلص في الشق السياسي اللى لم يعلن عن تفاصيله …… و الجزء اللى تم الاعلان عنه كالتالي:-
• فيه 50 مليار دولار حيتم ضخهم في المنطقة …. 25 مليار دولار هــ ياخدهم الفلسطينيين في الضفة و غزة … يشبرقوا بيهم نفسهم … يجيبوا بيها مدارس و مصانع و طرق و مساكن و عَجَل و ترابيزات بنج و بيلياردوا و بلاي ستيشن و كل اللى نفسهم فيه 😊 بس يعقلوا كده و احنا نبسطهم.
• هــ يتعمل طريق معلق بين الضفة و غزة عشان حرية التنقل للفلسطينيين و مانبقاش حارمينكم من حاجة.
• مصر هــ تاخد 9 مليار دولار … عشان نساعد الاقتصاد المصري … و سيبكم من الكلام بتاع تبادل الأراضي ده … ماحدش بيقول كده … احنا مش وش ذلك … أبسولوتلي 😊 … إحنا نعمل منطقة تجارة حرة للفلسطينيين في رفح و العريش … و ممكن مطار صغنن كده و ميناء على ما قسم … و نتفق و نحلف بحياة الأخوّه ان ماحدش منهم يتملك أرض … انتوا بس تسيبوهم يتنقلوا براحتهم عشان التجارة و الاستثمار و أهو خير للكل و الأشيا تبقي معدن .
• الأردن هــ تاخد 5 مليار دولار … إبسط يا عم 😊 … بس أغوار الأردن المحتلة تفضل مع إسرائيل و شوية تفاصيل إدارية كدة حنتكلم فيها في الشق السياسي.
• لبنان حتاخد 4 مليار … محدش يعرف لغاية دلوقتي في مقابل إييه.
• موضوع بقي القدس الشرقية و الغربية ده موضه قديمة … إحنا نخليها مدينة موحدة … تحت السيادة و الإدارة الاسرائيلية …. بس ممكن ندي الفلسطينيين الادارة التعليمية للمدارس عشان تعلموا فيها عربي براحتكم …. و هــ نتفق مع بعض كلام رجاله … لا اسرائيلي يشتري ارض من عربي و لا عربي يشتري ارض من اسرائيلي … شوفت بقي … مش حارمينك من حاجه أهو 😊 .
• و خللى بالكم … الفلوس دي ممكن تزيد و تتضاعف … كل ما تلعب و تتعاون أكتر … تكسب فلوس أكتر 😊 … ماشي يا عم كوشنر … طب أمريكا حتدفع المليارات دي في مقابل إييه ؟؟؟ … قالك :- لا يا حبيبي … مين قالك ان أمريكا اللى هــ تدفع … دي دول و متبرعين هم اللى هــ يمولوا الصفقة دي 😊 …. ( كمااااان أمريكا مش حتدفع 😃 😃 😃 ).
• طب يعني لو حد وافق … يستلم الفلوس على طول ؟؟؟ … قالك لاااااا … دول حيتم دفعهم على أقساط على 10 سنين … أه … محدش يشتري سمك في مية يا حبيبي … إحنا هــ نراقب بشكل شهري سلوك الدول اللى هــ توافق … و قبل معاد كل قسط …. كل ما كانوا كيوت و حبوبين … هــ ندفع ليهم القسط و اللى هــ يدير الموضوع ده مستشاريين عالميين و رجال أعمال هــ ينقلوا المنطقة نقلة نوعية كبييييرة …. ( يا حبيييييبي 😃 😃 😃 ) …
• و كل يوم بــ يتضح أفكار أكتر و التوجه رايح لفين … و الجميل و الأحلي بقي …. إن إسرائيل بتعلن رفضها للكثير من الأفكار دي … و أمريكا بتقول ماتقلقوش … أنا هــ حاول أضغط عليها و أقنعها … بس ماتزعلوهش انتوا بس … 😃 😃 😃
بعيدا بقي عن الكلام ده … إحنا حابّين نرد في نقط محددة و في كلمتين و رد غطاهم :-
– أمريكا و اللى بيديروها الآن تجار …. و اللى بيحصل ده جس نبض بيشوف ميتك اييه و رد فعلك اييه ….. هــ تيجي معاه بالفصال في الفلوس و لا يمَوِّت البيعة و يقولك مش نافعه ولا يقولك هو كده و اضرب دماغك في الحيط و خد و هات و هات و خد … كل ده عشان يشوف آخرك ايه …. لكن تظل النقطة الفاصلة في الكلام ده كله هم الفلسطينيين أنفسهم … هــ يتوحدوا عشان خاطر قضيتهم و لا كل مجموعة فيهم هــ تقول إدوني أرض اعمل عليها دولة و طظ في القضية زي الوضع الحالي … و نضحك على الناس بالمظلومية و بالمزايدة التاريخية على الدولة المصرية و الشعب المصري كالعادة.
– مصر أعلنت بوضوح إن أراضيها لم و لن تكون أصلا محل نقاش في أي تسوية سياسية بأي شكل من الأشكال … و لسه من يومين كان فيه تصريح رسمي للسيد / سامح شكري قايل الكلام ده على خلفية لقاؤه مع نظيره الروسي.
– مصر شاركت في المؤتمر بتمثيل متدني ( وكيل وزارة المالية) … و ده طبيعي و مش معناه إننا موافقين على اللى بيتقال … إحنا عايزين كلام و ورق رسمي … عشان مصر دولة كبيرة و ردها بيكون على كلام رسمي و ليس احاديث صحفية.
– الـ 9 مليار دولار اللى على عشر سنين … يعني 900 مليون دولار في السنة … احنا بــ نقزز بيهم لب الصبح …. اللى اتصرف على سيناء في 3 سنين بس حوالي 24 مليار دولار …. فـ لا 9 مليار و لا 9 تريليون يجبروا مصر على الدخول في مثل هذه الصفقات المعتوهة …. إحنا هدِّينا الدنيا على 1 كيلو متر مربع في طابا فى الثمانينات … و رفضنا مليارات الدولارت … و رفضنا الدعم الاقتصادي و ماعملناش زي الأردن اللى العملة بتاعتها النهاردة اقوى من الدولار بسبب التنازل عن أغوار الأردن و تجنيس الفلسطينيين.
– إسرائيل أو امريكا يقولوا و يخططوا اللى هم عايزينه و اللى يتناسب مع مصالحهم … ده حقهم … و احنا حقنا ناخد المواقف اللى تتوافق مع مصالح الأمن القومي المصري و مصالح شعبها الوطنيه …. و سابقا .. لا أمريكا و لا إسرائيل و لا أوروبا عرفوا يفرضوا علينا القبول بحل لا يرضينا … و استرجعنا أراضنا كاملةً.
– العمليات الإرهابية هــ تزيد جداً الفترة الجاية و بالذات في العريش و رفح للضغط على مصر بكل الوسائل للقبول بالصفقة … فالناس اللى هــ تزيط الأيام الجاية مالهومش مكان وسطينا … و هــ نتعامل معاهم بكل القسوة … وقت الحرب مفيش مياعة و لا سفسطة و لا تنظير.