مصر الأمر الواقع فى قمة العشرين !!

29 Jun 2019

مصر الأمر الواقع فى قمة العشرين !!
————————————-

مش المرة الأولى .. ولن تكون الأخيرة .. اللى بــ تشارك فيها مصر فى فعاليات دولية بحجم وأهمية تجمع دولى أممى زى قمة العشرين (G-20) اللى بتشارك فيها مصر فى اليابان بدعوة رسمية من رئيس الوزراء اليابانى نفسه.

و بالرغم من إننا إتكلمنا قبل كدة عن قمة العشرين ، وفوائد مشاركة مصر فيها .. واللى هتلاقوا كل شئ عنها فى لينكات المقالات اللى فى نهاية مقال النهاردة ، إلا إنه فى الإعادة إفادة ..

و للى ما يعرفش … فــ مجموعة العشرين هو منتدى تأسس فى ديسمبر سنة 1999 فى مدينة برلين بسبب الأزمات المالية في التسعينات لما نبهّت الأزمة المالية الآسيوية القوى الاقتصادية العالمية إلى الحاجة إلى دمج الدول الصناعية والاقتصادية الصاعدة فى صنع القرار الاقتصادى والمالى العالمى .. ويمثل هذا المنتدى أكثر من 90% من الناتج العالمي الخام (وهو مجموع الناتج المحلي الخام لجميع بلدان العالم) .. و80% من نسبة التجارة العالمية (بما فى ذلك التجارة الداخلية للاتحاد الأوروبي)، وأيضا تمثل الدول الأعضاء ثلثى سكان العالم .. والغرض من القمة هو تعزيز الاستقرار المالي الدولي و ايجاد فرص للحوار ما بين البلدان الصناعية والبلدان الناشئة ..

وكانت القمة فى البداية بتجتمع على مستوى وزراء المالية ومحافظى البنوك المركزية وقطاع الأعمال فى الدول الأعضاء .. لكن بداية من يوم 15 نوفمبر 2008 ، ولأول مرة في تاريخها، اجتمع رؤساء الدول والحكومات وليس فقط وزراء المالية .. ومن وقتها إكتسبت قمة العشرين شهرتها ومكانتها على مستوى العالم … وتضم المجموعة أعضاء يمثلون 19 دولة وتكتل اقليمى واحد .. وهم الولايات المتحدة، واليابان، والمانيا، وفرنسا، وبريطانيا، وايطاليا، وكندا، وروسيا، والصين، والارجنتين، واستراليا، والبرازيل، والهند، واندونيسيا، والمكسيك، والسعودية، وجنوب افريقيا، وكوريا الجنوبية ، وتركيا … وإعتبرو إن رقم 20 هو التكتل الإقتصادى للإتحاد الأوروبى.

طيب علشان ما نعيدش الكلام تانى … لازم نبقى فاهمين إن العلاقات الدولية بالأساس قائمة على حاجتين مالهمش تالت … لغة المصالح .. والقوة … (إقتصادية – سياسية – عسكرية) … و غير كدة ، ولا حد هــ يعبرك ولا هــ يلتفت ليك .. وخصوصا من القوى الدولية العظمى .. بل بالعكس … دى القوى العالمية ممكن تهرسك فى لحظة لو كانت مصلحتهم فى كدة … لكن علشان تبقى متواجد بشكل دائم فى معظم المحافل الدولية .. وبالذات التجمعات الإقتصادية .. يبقى لازم يكون لك وزن إقتصادى مؤثر .. وقوة سياسية وعسكرية تحمى ده كله …. و ده الوضع اللى اصبحت فيه مصر دلوقتى .. الأمر الواقع اللى فرضته مصر على الأرض … واللى مايشوفش من الفربال يبقى أعمى 🙂

الرئيس السيسى القى كلمته فى القمة أمام كبار رؤساء العالم ، وكبار المسئولين الدولين … و تلقى زيارات فى مقر إقامته لعمل مباحثات ثنائية على هامش انعقاد أعمال قمة مجموعة العشرين مع المستشارة الألمانية انجيلا ميركل .. وجلسة مباحثات فى قمة موسعة مع رئيس وزراء اليابان “شينزو آبي”، وذلك بحضور وفدى البلدين … وكمان إلتقى فى جلسات مباحثات اخرى مع سكرتير عام الأمم المتحدة “أنطونيو جوتيريش” .. و رئيس الوزراء الإيطالى جيوسبي كونتي .. والرئيس الفرنسى ماكرون .. والرئيس الروسى بوتين.

وكمان شارك السيد الرئيس عبد الفتاح السيسي فى القمة الصينية الأفريقية المصغرة على هامش أعمال القمة، والتي جمعته ممثلا لمصر بإعتبارها الرئيس الحالي للاتحاد الأفريقي وكمان بإعتبار إنها الدولة اللى أطلقت السوق الأفريقية المشتركة على أراضيها ..، مع الرئيس الصيني “شي جين بينج”، ورئيس جنوب أفريقيا “سيريل رامافوزا” كعضو دائم في المجموعة، والرئيس السنغالي “ماكي سال” باعتبارها دولة رئاسة لجنة رؤساء الدول والحكومات المعنية بالنيباد واللى مصر عضو فيها برضوا…، وأخيرا سكرتير عام الأمم المتحدة “أنطونيو جوتيريش”.

كل اللى إتكلمنا عنه ، والوضعية الإقتصادية المستقبلية لمصر بين دول العالم بكل كيانته الإقتصادية .. واللى كانت مجرد حلم .. اصبحت الأن أمر واقع بتفرضه مصر على الجميع برؤيتها المستقبلية وسياستها الإقتصادية الإصلاحية .. برغم كل المصاعب والتحديات السياسية و الإقتصادية … و مش كدة وبس .. لكن كمان بتربط مصالح العالم كله بيها … فى الوقت اللى بتكبر سياسيا وعسكريا علشان تقدر تحمى المكتسبات اللى حققتها لحد دلوقتى وتبنى عليها كمان للأفضل.

اللى بقى مش شايف كل ده .. و هــ يدخل يقولك .. معلش أنت بتطبل .. دى مصر رايحة تشحت .. قول له حاضر .. إنت صح .. برافوا … اللى هــ يقولك مصر إييه دى اللى بتتكلم عنها .. ده إحنا على وشك الإفلاس .. قول له حاضر .. إنت صح .. برافوا … اللى يقولك دى الأوضاع زى الزفت .. دى مصر رايحة فى داهية .. هو انت مش شايف الأسعار عاملة إزاى .. ده بقى تصفق له وتقول له .. الله ينور عليك .. برافوا … أما اللى يقولك .. انا بقى كمواطن إستفدت إييه من كل ده … أهو ده بقى تبوسه من بقه وتقول له .. ياسلام على مخك اللى زى البرلانط … برافوا عليك .. دى بلد فاشلة ياعم .. معاك حق 🙂

ماتضيعش وقتك وتتناقش مع الناس دى .. لأنهم مخطوفين ذهنيا بجد … و يكفى إن كل حاجة قالوا عليها غلط طلعت صح .. وكل اللى قالوا عليه فنكوش ، إتحقق وبقى واقع .. وكل اللى قالوا عليه مالوش لازمة ، طلع هو الشئ الصح الوحيد اللى كان لازم يتعمل .. .. وكل اللى راهنوا عليه و بيه ، على إعتبار إن إفلاس مصر اصبح مسألة وقت طلع كله كلام فى الهواء .. والواقع الإقتصادى المصرى بيتحرك للأمام بسرعة الصاروخ بشهادة كل المؤسسات الإقتصادية بلا إستثناء

وللمرة المليون .. كلامنا مش معناه إننا ماعندناش مشاكل ولا تحديات ولا مصاعب .. ابداً … لكن إحنا 100 مليون .. وماتم إنجازه فى خلال 5 سنوات فقط وبشهادة الجميع .. ماكانش ممكن أبدا يتحقق فى اقل من 20 سنة … ويمكن اكثر

ولسة مصر فى السباق لتحقيق حلم 2030

إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.

ياريت حضراتكم تراجعوا المقالات التالية ذات الصلة من على الموقع الرشيفى لصفحتكم كلام فى الصميم:

لمتابعة تعليقاتكم