30 Jul 2019
القول الفصل عن مصر وصفقة القرن .. !!
فكّر .. أربط .. حلل ..
——————————————–
صفقة القرن هــ يتم الإعلان عنها فى مارس القادم ..
صفقة القرن خلاص خلصت و الــ CNN طلعت تسريبات
لأ معلش ..أصلنا عندنا غسيل فى مارس .. و هــ نأجلها شوية لشهر إبريل
لأ يا كماحة .. إنتوا بتقولوا إييه .. مصر مالهاش دعوة بصفقة القرن وسيناء خارج أى نقاش
لأ معلش بقى .. أصلنا عندنا تنفيض فى إبريل .. و هــ نأجل الإعلان عن الصفقة لبعد العيد الصغير …
خلاص بقى .. أخر الكلام هــ يبقى فى مؤتمر البحرين فى اخر يونيو و هــ نقعد كلنا كدة مع بعدشينا ونسمّى باسم الله …
لأ معلش أصل مؤتمر البحرين ده طلع فشنك ، و معظم الأطراف كان عندهم بوولة دوينوا على القهوة ، فــ هنعمل قعدة عرب تانية بعد ما كوشنر يعمل لفة كمان فى المنتشيكة ….
والسحلب فات فات ، وفى ذيله 7 كسفات 😁
مش هو ده السياق اللى مشيت فيه عملية الإعلان عن صفقة القرن ؟؟
مش التسريبات اللى طلعت من الــ CNN وتم تداولها على كل مواقع السوشيال ميديا .. واللى نشرها و روج لها الأستاذ خالد بلحة . أو عبده مشتاق اللى بــ يدلل على نفسه فى كل الفضائيات علشان يؤكد إن مصر باعت سيناء !!؟؟
طب هو كان لييه الإعلان والتأجيل .. والتسريب والتأجيل .. والتراجع و المطمطة .. والإعلان والنفى .. ألخ الخ الخ … ليه كان كل ده !!؟؟
هى العقدة فين بالضبط !!؟؟
العقدة حضرتك هى مصر … أيوة … مصر و مش أى حد تانى !!
طب إزاى !!؟؟
بص يا سيسى .. قصدى يا سيدى .. لازم نرجع شوية كدة بظهرنا مع بداية 2019 وإرهاصات الإعلان عن صفقة القرن .. هــ نلاقى إن الموضوع كله بــ يصب فى إتجاه واحد … إشعال الموقف حوالين مصر … يعنى هــ نلاقى تصعيد أليكترونى تجاه مصر فى كل الإتجاهات .. وحملة ممنهجة من الشائعات بشكل مكثف .. و ده طبعا غير العمليات الإرهابية ومحاولات إختراق الحدود اللى بــ يتم إحباطها كل شوية .. ثم التصريح بتأجيل الإعلان عن صفقة القرن لشهر إبريل بدلاً من مارس …. وفجأة يطلع لنا قرار ترامبى أميريكى فى الأسبوع الأخير من شهر مارس بإعتراف أميريكا بسيادة إسرائيل على مرتفعات الجولان السورية 😕
وبدانا نسمع عن نقل الدواعش لأماكن غير معروفة خارج سوريا … و فجأة الدنيا سخنت فى الملف الليبى .. وبدأت سلسلة تصريحات نارية من كل الأطراف فيما يخص ليبيا … ونسمع عن سفن محملة بالأسلحة بــ يتم القبض عليها فى المتوسط كانت متجهة لليبيا… وبالتزامن مع الكلام ده يتم إشعال الموقف فى الجزائر .. وتبدأ الصحف والمواقع والقنوات إياها ، حملة مكثفة لدعم الفوضى _قصدى الثورة_ فى الجزائر … وشوف الصدف يا مؤمن لما تلاقى موقع زى الــ BBC .. بــ يحذر الجزائرين من ظهور سيسى جديد فى الجزائر وتكرار تجربة مصر الوحشة الإخييى اللى بوظت الثورة فى مصر ياعينى …
يتم تأجيل الإعلان عن صفقة القرن للمرة الثانية لما بعد عيد الفطر مباشرة …. الموقف يزداد إشتعالا فى الجزائر .. وتكثيف الحملة الأليكترونية على مصر .. وخصوصاً بعد تسريبات الــ CNN اللى بتقول إن سيناء جزء من صفقة القرن .. ويبدأ شلة الأفاقين فى إشعال السوشيال ميديا مع ظهور تقارير عن سوء أوضاع الفلسطينين فى قطاع غزة … و كأن هناك محاولة للربط … و كل ده و مصر ساكتة … ومافيش غير تصريحات سابقة سواء للخارجية المصرية أو للرئيس السيسى ، بــ تعبر عن موقف مصر الثابت تجاه القضية الفلسطينية وكيفية حلها … و فضلت مصر ساكتة .. ساااكتة .. ساااااكتة ….. !!
وفجأة يشتعل الموقف فى ليبيا بإعلان المشير خليفة حفتر عن بدأ عملية طوفان الكرامة … و يتبعه إشتعال الموقف فى السودان بتخلى البشير عن الحكم ثم سقوط نظامه .. ثم الثورة السودانية …. وأصبح الشمال الأفريقى تقريبا كله مشتعل .. وتبدأ الحرب السياسية والمخابراتية وحتى العسكرية بين كل الأطراف لوقف العمليات فى ليبيا ومنع سقوط طرابلس .. وكمان لتحييد الجيش السودانى فى السودان وإخراجه من المعادلة … و فجأة برضوا يطلع المتحدث بإسم الخارجية الأميريكية ، ويهاجم الصحف والمواقع الإخبارية التركية ويقول إن أى حد بيتكلم عن إن سيناء جزء من صفقة القرن هو مخطئ وعليه أن يتحرى مصادر معلوماته !!!!
يتم الإعلان عن موعد جديد لإعلان صفقة القرن بإنها هــ تكون فى اخر يونيو فى مؤتمر البحرين .. و ييجى إجتماع القمة العربية الطارئة فى مكة علشان تعلن فيه مصر بكل صراحة ووضوح موقفها من القضية الفلسطينية واللى كان بــ يؤكد كل التصريحات السابقة ويؤكد على موقف مصر الثابت منها …
لكن قبل إجتماع القمة ده .. و فى وسط كل الأحداث والحراك السياسى والامنى ده كله .. حصل شئ مهم جداً … وللأسف مافيش حد تساءل اييه كان وجه الاستعجال ، و لييه ده حصل فى هذا التوقيت بالذات !؟ ….. حصل انه تم الإستفتاء على تعديل الدستور المصرى وتعديل المادة الخاصة بعدد سنوات الرئاسة ، بالتزامن مع إعادة إنتخاب نتنياهو واللى موجود فى مقعده من 2009 و حتى الأن .. ولسة مكمل معانا شوية حلوين 😁
طب إييه اللى جاب القلعة جنب البحر !!؟؟
الحقيقة لا فيه قلعة ولا فيه بحر .. الكلام ده من وجهة نظر المواطن العادى فقط … أو من وجهة نظر المشككين اللى بيحاولوا يضحكوا علينا .. لكن فى حقيقة الأمر .. كل الملفات منفدة على بعضها .. الملفات السياسية والإقتصادية والعسكرية .. كله كله كله متوصل ببعضه … واى حد يقول غير كدة تقول له “إنت راجل طيب” … معلش مشّوها راجل طيّب 🙂 …. و خصوصا لو نظرنا للشكل العام اللى شهدته عملية الإستفتاء واللى إعترض عليها الكثيرين سواء بسلامة نية أو بسوء نية .. مالناش دعوة .. ومادخلناش فى النيات .. لكن كان المطلوب إن الصورة تبقى قدام العالم واضحة كدة لعدة أسباب .. أهمهم:
أولا … مافيش ثقة هــ تتبنى على المستوى الإقتصادى مع مصر واللى بــ تقع فى وسط منطقة اصبحت بكل أسف موبوئة ومليئة بصراعات وغير مستقرة تماما ، غير بضمان إستقرار سياسى مدعوم بتأييد شعبى !! .. لأن رأس المال جبان .. ومافيش إستثمار او تنمية ممكن تحصل فى دولة غير مستقرة ! 🙂
ثانيا … لأن القصة كلهة مواجهة بين مصر من جهة .. وبين إسرائيل ومن خلفها من جهة اخرى سواء بشكل مباشر او غير مباشر .. و علشان النظام الحالى يقدر يقف فى مواجهة كل التحديات دى ، ويتحرك بأريحية شديدة ، ويقول لأ ، و أه ، و ده يمشى ، و ده مايمشيش ، و ده موافقين عليه ، و ده مش موافقين .. ويبقى ليك ثقل سياسى وامنى فى كل ملفات المنطقة .. فكان لازم امام العالم كله يبقى الرئيس الحالى أو النظام الحالى مؤيد شعبياً بشكل كبير .. وأظن كلنا شوفنا من اول 2013 و لحد النهاردة إن التأييد الشعبى للجيش وللنظام السياسى الحالى هو عقدة العقد .. و هو الصخرة اللى بتتحطم عليها كل محاولات الكيد للدولة المصرية ، أو لتحقيق مكاسب على حساب ماتريد مصر تنفيذه من سياسات تتماشى مع مصلحة الأمن القومى المصرى !
و اخر حاجة بقى دلوقتى بخصوص صفقة القرن ، هو إن مؤتمر البحرين خلاص ماجابش همه .. وهناك جولة اخرى سيقوم بها كوشنر من اجل وضع أليات جديدة وبنود جديدة لتمرير صفقة القرن المزعومة
و برغم كل الضغوط اللى بــ يتم ممارستها على كل الأطراف .. إلا إن لعبة الشطرنج هــ تستمر .. و يبقى الموقف المصرى ثابت ومعلن .. وأنه لن يحدث أى شئ فى القضية ، إلا بموافقة اصحابها
إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.
فى الروابط التالية مقالات سابقة كمرجعيات للى عايز يفهم الصورة بشكل أوضح: