04 Sep 2017
مصر و البريكس الذى كان .. والأن .. !!
————————————-
شوفوا بقى ……
أى حد يفتكر ان كل دولة من دول العالم مش بتدوّر على مصلحتها وحماية أمنها القومى كضرورة ملحّة واولوية قصوى يبقى غلطان .. و أى حد يفتكر إن دول العالم لما بتدخل فى تحالفات سواء إقتصادية أو سياسية أو إستراتيجية بتعمل كدة علشان نبقى اسرة كدة حلوين مع بعضينا ، يبقى غلطان .. و أى حد يفتكر أو يعتقد مجرد إعتقاد إن تحالفات مجموعة البريكس وفكرة إنشائها من الأساس هى مجرد تحالف إقتصادى وإتفاقيات وتبادل تجارى وخلاص ، يبقى لازم يعيد التفكير من أول وجديد فى منظوره للأمور العامة ، ومستوى إدراكه لما يحدث على الساحة العالمية فيما يسمى بالنظام العالمى والعلاقات الدولية ! .. واللى قاله الرئيس الصينى إمبارح والنهاردة فى الكلمتين اللى ألقاهم فى جلسات قمة مجموعة البريكس بيقولوا كدة ..
مجموعة البريكس الظاهر منها إنها مجرد تحالف إقتصادى بين اقتصاديات ناشئة من 2008 ، وتم تفعيل الدور الإقتصادى لها فى 2011 .. لكن مش ممكن طبعاً يكون فيه كيان إقتصادى مالوش توجهات سياسية تعمل كمظلة للكيان الإقتصادى ده .. ويكون عنده كمان قوة تحميه وقت اللزوم … وفى الوقت اللى كان فيه المعسكر الغربى بيتهيأ فى (2011 – 2013) للإجهاز على منطقة الشرق الأوسط والإستئثار بخيراتها .. كانت دول البريكس بتجهز نفسها للمواجهة ، لأن مع سقوط الشرق الأوسط وبالذات مصر ثم دول الخليج ، كان الدور هــ يكون على روسيا ثم دول الشرق الأقصى .. وعلشان كدة روسيا إستأسدت فى سوريا .. والصين وروسيا وقفوا مع مصر ودعموها فى 30 يونيو .. ودعموا موقفها فى مجلس الأمن ، ومنعوه بالفعل من إصدار قرار ضد مصر بعد ما رفضوا عقد جلسة طارئة من الأساس .. وتلميح روسيا إنه فى حالة الإصرار على عقد الجلسة الطارئة ، سيتم إستخدام حق الفيتو للتصويت ضد أى قرار ضد مصر .. و ده بيؤكد كلامنا للمرة المليون إن 30 يونيو كانت النقطة المفصلية اللى قلبت النظام العالمى كله … وإحنا مش هــ نعيد الكلام تانى لأننا أفردنا له مساحات كبيرة ونشرنا مقالات كتيرة بتشرح بالتفصيل الأوضاع الدولية دى .. وهــ تلاقوها على موقع الصفحة الجديد بتواريخ النشر فى مجموعة المقالات الإستراتيجية
دول البريكس فى 2008 كان إجمالى الناتج القوى لهم كدول منفردة لا يتعدى بأى حال من الأحوال 12% من إجمالى الناتج العالمى .. والنهاردة .. وبعد 10 سنوات من عمر التحالف وصل الناتج المحلى للمجموعة إلى ما يقارب ربع الناتج العالمى ونسبة إسهامات فى نمو الاقتصاد العالمى تجاوزت الــ 50% .. لطاقة بشرية تصل إلى 42% من تعداد سكان العالم زى ما ذكرنا فى مقالنا السابق واللى هــ تلاقوا اللينك بتاعه فى نهاية المقال .. و ده تطور إقتصادى قوى للمجموعة وبــ يشكل خطر كبير على الدول الكبرى .. وخصوصا لما نعرف إنه موجه لمجموعة السبعة الكبار اللى هى الدول الصناعية الكبرى (فرنسا، ألمانيا، إيطاليا، اليابان، المملكة المتحدة، الولايات المتحدة الأمريكية وكندا) .. و ده معناه كيان إقتصادى موازى يدعم النظام العالمى الجديد ويهدم نظرية القطب الأوحد فى العالم اللى بــ تتزعمه الولايات المتحدة الأميريكية
و ده يرجعنا تانى للكلمتين اللى ألقاهم الرئيس الصينى شي جين بينغ على مدار يومين واللى بــ يوضحوا إن قمة البريكس المرة دى مش مجرد قمة إقتصادية عادية ، لكنها بمثابة تدشين للنظام العالمى الجديد اللى إحنا بنتكلم عنه هنا على صفحتكم “كلام فى الصميم” بقالنا 3 سنوات” … وتعالوا كدة نستعرض بعض ما قاله الرئيس الصينى ، واللى المفروض إنه بيقوله فى قمة إقتصادية .. و … وكدزة 😉
- دول مجموعة البريكس تتمسك بتعددية الأقطاب ، و تدعم نظاماً عالمياً يقوم على العدالة والمساوة
- إن مجموعة دول البريكس تسعي إلى بذل جهودها علي الساحة الدولية لتحقيق العدالة في القضايا العالمية
- دول البريكس دورها مؤسس للنظام الدولي وتعمل علي مكافحة الإرهاب وحفظ السلام، كما أنها عازمة علي تعزيز التواصل حول القضايا العالمية
- ضرورة التعاون الأمني بين دول بريكس ، كما أن التمسك بمكافحة الإرهاب سيقضي على الارهابيين في المناطق كافة
- دول البريكس تتمسك بالانفتاح والشمولية علي المستوي الدولي وتفعيل التعاون مع الدول النامية والناشئة وإقامة آلية حوار فاعلة لذلك، كما يجب التأكيد علي ضرورة تفعيل الحوار بين الجنوب والشمال في العالم ومواجهة التحديات الموجودة !
- ضرورة أن يتم توسيع نطاق تأثير “بريكس وبريكس بلس” في العالم من أجل استفادة العالم كله، كما أن قمة شيامين تشهد تجمعات بين اقتصاديات دول ناشئة ودول نامية
- أن الهيكل الاقتصادي العالمي تغير بشكل عميق من حيث زيادة الأزمة المالية، و دول بريكس تنظر إلي المستقبل وتعمل على إصلاح الهيكل الاقتصادي العالمي وإيجاد نقاط جديدة للتنمية وطرق جديدة أيضا
- هناك استثمارات وصلت إلى 127 مليار دولار بين دول القمة، وتوجد خطط عمل من شأنها تعميق التعاون بين دول البريكس، ومنها التعاون السياسى الذى يحقق نتائج إيجابية
- دول البريكس يجب أن تعمل على إستقرار جميع دول الشرق الأوسط .. وندعم العراق كدولة واحدة ضد التحديات التى تواجهها وندعم إستقرارها
- دول مجموعة البريكس جاهزة للعمل الجاد والتدخل لحل مشكلة الشرق الأوسط والقضية الفلسطينية
والسؤال هنا اللى بــ يطرح نفسه .. هل ياترى ده كلام عادى انه يتم طرحه فى منتدى أو قمة إقتصادية .. أم أنه نظام عالمى يرسخ لوجوده ويقوم بتقديم قائمة مبدئية بأهم الملفات والقضايا التى سيقوم بالتعامل معها !!؟ 😊 … ومش كدة وبس .. ده كمان فيه تنسيق لإنشاء منظومة إعلامية قوية، لتأييد ونقل ما تملكه دول المجموعة من أفكار وما تتخذه من مواقف تجاه القضايا المحلية والعالمية، وكان الرئيس بوتين سبق وأشار في أحد أحاديثه الصحفية على هامش “قمة العشرين” في نوفمبر الماضي، للحرب غير المعلنة من جانب الولايات المتحدة ضد روسيا وما تمارسه من ضغوط سياسية، وما تشنه أيضا من حروب إعلامية من خلال ما تملكه من وسائل الإعلام المحلية والعالمية، وإن الدول الناشئة والنامية مايعرفوش حاجة عن روسيا والصين والهند غير من الإعلام الأميريكى .. ويمكن هو ده السبب فى التفكير فى إنشاء منظومة بريكس للإعلام ، .. ونحب بس ننوه إن “وكالة سبوتنيك” الروسية بكل ما تملكه من إمكانيات وقنوات ناطقة بعدة لغات كانت عقدت إتفاق تعاون مع “مؤسسة الاهرام” أكبر وأقدم المؤسسات الصحفية المصرية والعربية كهدف للخروج من وطأة التبعية للوكالات الغربية … و ده معناه إن المجموعة اللى المفروض إنها مجموعة إقتصادية عندها خطة وهدف لتسيّد العالم من خلال نظام عالمى جديد .. مش مجرد تحقيق نمو إقتصادى
طب مصر بقى فين من الكلام ده كله !!؟؟
مصر حجزت مقعدها من زمان ضمن الدول المؤسسة للنظام العالمى الجديد .. و ده شرحناه فى عدة مقالات سابقة .. مش كدولة عادية داخل إطار النظام العالمى .. ولكن كعضو فاعل فى النظام العالمى اللى بيتم تشكيله الأن ، ولو شئنا الدقة لقلنا أن مصر ستصبح قطب من الأقطاب العالمية بحلول 2030 بإذن الله
حضور مصر محفل دولى زى ده وبدعوة من الدولة المنظمة ، ومن الرئيس الحالى لمجموعة البريكس يعتبر قمة التقدير لدور مصر الدولى .. وأعتقد إننا نشرنا النهاردة ترتيب أعلام الدول اللى حضرت القمة واللى جاء فيها ترتيب مصر الأول بعد الدول الأعضاء فى مجموعة البريكس .. و ده يعكس مدى التقدير لمكانة مصر ، وقدرتها على التاثير إيجابياً وعمل إضافة نوعية لقدرات دول المجموعة .. و ده غير لو دخلت مصر فى إطار مجموعة بريكس بلاس زى ما نوه الرئيس الصينى بأسلوب غير مباشر .. وخصوصا إنه طلب من الحاضرين التصفيق مرة اخرى للرئيس المصرى بعد ما إنتهى من إلقاء كلمته
حضور مصر قمة دول البريكس أعطى مصر الفرصة لتسويق نفسها وبرنامجها الإقتصادى بشكل فعّال وقوى .. وكان كانت فرصة لعقد لقاءات قمة ثنائية مع بعض رؤساء دول المجموعة .. ولقاءات الوفود الإقتصادية ، وبالذات الوفد الصينى برئاسة رئيس المجلس الصينى للتجارة الدولية .. وإوعوا تنسوا الإسهامات الصينية فى العاصمة الإدارية الجديدة وفى محور التنمية المصرى .. واللى يخلينا نحط فى إعتبارنا إن تنامى المصالح الإقتصادية والإستثمارات الأجنبية فى مصر .. مش بس بيعمل على إنعاش الإقتصاد المصرى .. لكن كمان بيعمل حائط صد ضد أى مؤامرات ممكن تحاك ضد مصر ، لأن وقت اللزوم ، هــ تلاقى الدول دى واقفة معاك ، إذا ما كانش علشانك ، فــ هيكون لحماية مصالحها الإقتصادية
حديث الرئيس السيسى عن خطة مصر 2030 .. واللى تعتبر جزء من خطة أفريقيا 2063 .. مش مجرد حديث إعتباطى .. لكنه بــ يوضح وبيبعث رسالة للعالم إن الطريق إترسم خلاص .. والنظام العالمى الجديد اللى مصر فى القلب منه بيفرض رؤيته على ماهو قادم
و زى ما قولنا قبل كدة .. النظام العالمى الجديد قادم لا محالة .. وضربة البداية كانت فى يونيو 2013 ، شاء ذلك من شاء ، وأبى من أبى .. والإضرابات اللى بتحصل فى البرازيل والهند والحصار الإقتصادى لروسيا هى كلها محاولات لضرب أى تقدم على الصعيد الإقتصادى فى النظام الموازى .. وكل طرف وله ادواته اللى بيلعب بيها .. و ….
ولهذا حديث أخر .. وقريب بإذن الله
و زى ما نوهنا مع تدشين موقع صفحتكم الأيكترونى الجديد إننا هــ نحتاج المقالات القديمة كتير .. فــ برجاء مراجعة الأتى: