25 Nov 2017
الإرهاب فى بئر العبد … ما بين أيدولوجيا الشعب و القبيلة
———————————————————-
بسم الله الرحمن الرحيم
“يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ”
صدق الله العظيم
الآيه 13 من سورة الحجرات فيها حل اللوغاريتم اللى حير العالم طوال آلاف السنين و هو ….. ليه مصر ؟؟ اشمعني مصر هي اللى بيتحطم علي صخرتها كل و أى مؤامره على المنطقه بالكامل … مهما بلغ قوة المعتدي او ضعف مصر وقت الاعتداء.
لان ربنا لما خلق الناس … صنفهم الى صنفين …. شعوب …. و قبائل …. و لو بصيت على كل دول المنطقه اللى حواليك حتلاقيهم قبائل مش شعب…. سنه و شيعه … سنه و موارنه و شيعه و دروز …. تركمان و اكراد و عرب …. شمال و جنوب …. عرب و امازيغ …. قبايل و أسر ….
إلا مصر ….. فهي الدولة الوحيدة اللى شعب …. شعب متوحد طوال آلاف السنين له حضارته و ثقافته و خبراته المتراكمه … فــ عمرك ما تلاقي خلاف او كان هناك حروب بين نسيج الشعب المصري…. مسلم مسيحي فلاح صعيدي سواحلي حضري بدوى نوبي …. الكل نسيج واحد وشعب واحد ولائه التام لدولته و ليس لتصنيفه …
و عشان كده … اطلق الغرب على مصر و جيشه مصطلح “the rock” او “الصخره” …. لان كل و أي محاوله لخلق خلاف بين نسيج الشعب بائت بالفشل الذريع … و عشان كده … كان التركيز رهييييب طوال الفترة الماضية على نشر أيدولوجيه القبائل داخل المجتمع المصري بأي و كل وسيلة …. لان ده هو الوسيلة الوحيدة لتدمير و القضاء على الدوله الراسخه في المنطقه من الآف السنين …. و ده اللى فااااااشلين فيه حتي الان و الحمد لله.
ايدولوجية القبائل ممكن اختصارها انك يكون ولائك و أولوياتك هي قبيلتك قبل دولتك …. يعني ممكن تحرق دولتك او تخونها او تضرب بقوانينها عرض الحائط و تهدد سلامها المجتمعي لو تعارضت مصلحة قبيلتك مع مصلحة دولتك وعلشان كدة لو تفتكروا إن مرسى كان بيطلع ويقول وهو بيخاطب المصريين “أهلى وعشيرتى” .. و ده كان هدف رئيسى من وصول الإخوان للحكم فى مصر ، وهو تفتيت الشعب المصرى وتحويله من شعب إلى شراذم قبلية تمهيدا لتفكيك اللحمة المجتمعية .. ووصولا لتفتيت الجيش وتحويله لجيش طائفى يسهل بعد كدة تقسيمه إلى جيش حر ومواليين وانصار .. وبالتالى تتهد الدولة بعد كسر التيمة اللى مخلية الدولة المصرية ، دولة واحدة وشعب واحد على مر التاريخ والسنين وهى اللحمة الشعبية والنسيج الواحد !!
الكلام ده تم تمويله بمليارات الدولارات على مدي عشرات السنين … و تم تمويل مؤسسات اعلامية و نخبة من الافاقين و الخونه ، قادت هذا التوجه لترسيخ هذه الايدولوجية الدخيلة على مجتمعنا و ثقافتنا داخل المجتمع المصري بكل الوسائل و السبل …. سواء بنشر الافكار و النقاشات و نشر الفتن و القتل و المذابح في بعض الاوقات…. و انت شخصياً هــ تلاقي نفسك انجرفت في وقت من الاوقات لموجة فكر القبائل …. لكن لان جيناتك مأصلة و بوصلتك الوطنية أصيلة… فسرعان ما تعود لرشدك و تلتف حول وطنك و دولتك….. و بإختصار شديد … عايز تعرف ازاي … أقولك .
الديانة ….. من السبعينات كان التركيز كبييييير على ان المسيحيين كفره و وحشين و بيكرهونا و بيخزنوا اسلحه في الكنايس و مربيين اسود مفترسة و تنانين مجنحه عشان يموتوا المسلمين و فتاوي لا انزل الله بها من سلطان .. زي مثلا ما تسلّمش عليهم و ماتعيّدش عليهم و ماتشغلهومش عندك و اتجوز منهم لكن عاملها باحتقار….. و فى المقابل تمرير للمسيحيين فكرة إن المسلمين بيكرهوا المسيحيين و بيقرفوا منهم و مستنيين الفرصه عشان يدبحوهم … و طبعا كان لازم ندفع تمويل و ندرب ناس تعمل كل فتره فتن و قتل و حرق و تفجير …. كانوا بــ يحاولوا يوصلوا ان المسلم يحمي مسلم قتل مسيحي لمجرد انه من قبيلته المسلمه لان شيخه قاله كده … و ان المسيحي ينعزل من المجتمع و يستخبي في كنيسته و يكوّن دولته و قوانينه الخاصه بيها و يضطر يجيب اللى يحميه من بره …. فالهدف كان ان كل مواطن يكون كلام شيخه و قسيسه او قائد قبيلته اوامر تنفذ حتي و لو كانت ضد مصلحة المجتمع … لان مصلحة القبيله اهم من الدولة و المجتمع.
الرياضة …. من سنين و باسلوب علمي ممنهج … تم ترسيخ ان فيه نادي ….. فيه مؤامرة كونيه عليه بيقودها نادي تاني مسخر كل جنسيات حكام الدنيا ضده …. و ان جماهير ناديين تانيين متعاطفين معاه و بيكرهوا جماهير النادي المتآمر اللى فيه جماهير ادنيه تانيه متعاطفه معاه و بتشجعه … و بدل ما نركز ان كل نادي يحل مشاكله و يطور من نفسه و مستواه …. تم انشاء صفحات الكترونيه و جروبات و كيانات على الارض كل وظيفتها نشر رسايل و بوستات و تعليقات و مناقشات مين يقدر يشتم التاني اكتر و يكره التاني اكتر و يستحلف للنادي التاني على اللى هــ يحصل لمشجعيه في الماتش الجاي ….. عشان كده… لما تروح الماتش انت مش رايح تشجع فريقك … انت رايح تشتم الفريق التاني و تشتبك معاه و تحرق عربياته و يا سلام لو كام واحد اتقتل …. فالهدف …. ان انتماؤك لناديك و قبيلتك اهم من قانون دولتك و اهم من مصلحة مجتمعك ……. لان مصلحة القبيله اهم من الدوله و المجتمع.
النجم المفضل …. بنفس الاسلوب العلمى للبرمجة العصبية ….اصبح لكل نجم غنائي او تمثيلي او كروي مريديه و قبيلة ماشية وراه …. يدافعون عنه باستماته … و اللى يتكلم عليه كلمة يتاكل أكل … و مسموح ليه انه يخالف القانون لان اصلا مش مسموح انتقاده …. فــ حتي لو اعتدي على شرطي مرور او رفض التفتيش في المطار او اصدر شيك بدون رصيد او ضرب مواطن في الشارع او وصل بيه الامر لإنتماؤه لجماعه ارهابيه و اثبتت المحكمه بالوثائق و المستندات بتحويلات بنكيه من حسابه المشرف عليها البنك المركزي بقيامه بتمويل جماعات إرهابيه قتلت شهداء من الجيش و الشرطه و المدنيين و يتّمت اطفال و خربت اقتصاد البلد و قطعت ارزاق الناس … كل ده مش مشكله لانك بقيت عبد لقبيلتك و انتماؤك لنجمك المفضل اللى بقي خط احمر بالنسبة ليك … فالهدف …. ان انتماؤك لنجمك و قبيلتك اهم من قانون دولتك و اهم من مصلحة مجتمعك ……. لان مصلحة القبيله اهم من الدوله و المجتمع.
المهنة و الوظيفة …. بنفس الاسلوب اصبحت كل الوظائف خط احمر لا يطبق عليها القانون … الصحفي خط احمر …. المحامي خط احمر … الطبيب خط احمر … المهندس خط احمر …. الاعلامي خط احمر … القضاه خط احمر ….. المستشارين خط احمر … الساده النواب خط احمر و غيرها كتيييير من الخطوط الحمراء … و لو حد تجرأ و حاول بس يطبق القانون … كل واحد يستنجد بقيبلته و تقوم الدنيا …. فالهدف … ان انتمائك لوظيفتك و قبيلتك اهم من قانون دولتك و اهم من مصلحة مجتمعك ……. لان مصلحة القبيله اهم من الدوله و المجتمع.
التصنيف المكاني …. باستخدام الفن و الافلام و الاشاعات و حتي النكت …. اصبح عندنا فلاح لئيم و دنيء … و صعيدي غبى و ساذج … و سواحلي بق و بتاع كلام … و دمياطي بخيل … و بدوى خائن … و نوبي بواب … و غيرها كتيييييير من الصطلحات الدنيئه و الوضيعة و اللى حاولوا يرسخوها و يقنعوا بيها كل مجموعه ان المجموعات التانيه مش طاقاكم و بيقولوا عليكم الكلام ده …. و ده عشان كل مجموعه تتقوقع داخلها و تكره الاخرى و في اي مشكله تستنجد بقبيلتها حتي و ان تعارض ده مع المجتمع …. فالهدف ….. ان انتماؤك لقبيلتك اهم من قانون دولتك و اهم من مصلحة مجتمعك ……. لان مصلحة القبيله اهم من الدوله و المجتمع.
الايدولوجية الوطنية …. تم ترسيخ مصطلحات ما انزل الله بها من سلطان …. ده ناصري و ده ساداتي و ده مباركي و ده يساري …. و عشان تكون وطني …. لازم تبقي واحد بس من دول و تكره و تطلع سلسفين جدود الاخرين … و كل قبيله من دول مسخرين كل امكانياتهم و فكرهم و منشوراتهم و مؤلفاتهم مش لبناء المجتمع و العمل على اصلاحه و تقدمه و حمايته من الاخطار … لأ …. لكن لاثبات ان القبائل الاخرى خاينة و فاشلة و انه لازم يرجع حقوق قبيلته المهدرة … حتي و ان ادي الصراع ده لهدم المجتمع بذات نفسه …. فالهدف ….. ان انتمائك لقبيلتك اهم من قانون دولتك و اهم من مصلحة مجتمعك ……. لان مصلحة القبيله اهم من الدوله و المجتمع.
و غيرها كتيييييييييييييييييييير من الامثله اللى اكيد كل واحد لامسها او عاش معاها ….. طب ايه علاقة المقدمه دي بالحادث الارهابي اللى حصل في سيناء بالامس !!!! … اقولك ان ده ليه علاقه وثيقه و لا يتجزأ منها … إزاي … اقولك و في رسايل محدده:-
1- الهدف من كل الاعمال دي هدف واحد … و هو الضغط على الدوله باستخدام حضرتك انه يتم تفريغ سيناء من اهلها بتهجيرهم منها …. و ده صراع ارادات بين اهل الشر و مصر … و ده اللى لقيناه في الرد الرسمي بالامس في كلمة الرئيس …. “ردنا اننا هــ نواصل و هــ نكمل … و هــ نتصدي ليكم”… يعني برضوا … مش هــ نسيب سيناء لحد.
2- كان الضغط و بكل قوه على أهالينا في سيناء طوال السنوات الماضيه كبيييييييييير … بترسيخ مصطلحات كاااااذبه بأنهم جميعا مجموعه من الخونه و المهربين و تجار المخدرات يأوون الارهابيين و يقتلون الجيش …. ده كذب بيًن … عشان ينفذوا الكلام اللى شرحناه فوق … انت في مدينتك تكرههم … و هم في مكانهم يكرهوا الدوله و كل واحد يدور علي قبيلته …. و ده منجحوش فيه من جانب اهالينا في سيناء لكن للاسف العديد من الناس خارج سيناء وقعوا فيي الفخ ده
3- اهالينا في سيناء واجهوا سنوات الاهمال الاقتصادي و الاجتماعي و تسكين عشرات الالاف من المهربين و الارهابيين وسطهم و تهديدهم لهم بالقتل … و تطور الامر الى خطف و ذبح العشرات منهم طوال السنوات الماضيه و قطع خطوط امدادات الخضار و الفاكهه …. و حرق معدات و سيارات و قتل سائقيها لاي مقاول يدخل مدنهم او قراهم لاصلاح طريق او بناء مستشفي او مدرسه او مصنع…. و استهداف ابراج و محولات الكهرباء …. لان الهدف هو ايقاف التعمير و الدفع الى تطفيش الاهالي من اراضيهم … نفس اللى عمله اليهود مع الفلسطينيين زمان .
4- أهالينا في سيناء سطروا بطولات ستكتب لهم من نور في التاريخ الوطني بتعاونهم التام مع الجيش و الشرطه و مواجهة الارهابيين و دفعوا من دمائهم و ابنائهم ثمن بقاء التراب الوطني و غير صحيح نهائيا ما يحاول الاعلام و بعض الجهلاء نشره بين الشعب انهم خونه و انهم بيئه حاضنه للارهاب …. هم مواطنين وطنيين زيهم زي حضرتك بالظبط …. عايش بينهم بعض الاسر اللى معتنقه الفكر التكفيري اللى بيساعدوا الارهابيين و بيدعموهم زي بالظبط جارك الاخواني او زميلك في الشغل اللى كانوا بينزلوا رابعه او بيخبوا سلاح في بيتهم او بينزلوا مظاهرات يحرقوا عربيات و او يفجروا محولات الكهرباء او يزرعوا قنابل … الفرق بس ان المواجهه في المدن اللى انت عايش فيها مختلفه تماماعن البيئه الصحراويه المليئه بالسلاح هناك …. ربنا يكون في عونهم.
5- اهلينا اللى على خط النار في سيناء مش محتاجين من حضرتك و انت قاعد متأمن في مدينتك على الفوتيه متدفي و فاتح التليفزيون غير الدعم المعنوي و الدعاء …. مش تخونهم و تشتمهم … تخيل نفسك عايش لسنين طويله بلا مرافق حقيقيه و لا اهتمام و حتي الخضار و الفاكهه بيخشلك في حراسه الجيش … و الاتصالات و الكهرباء عادي انها تقطع بالايام … و الضرب ممكن يجيلك من اي حته … و مع ذلك بــ تتحدي كل ده … و كل يوم بــ تنزّل اولادك للمدارس عادي و تروح شغلك …. و كل ده مصممين انهم مايسيبوش ارضهم و لا تراب وطنهم … استقيموا يرحمكم الله .
6- المذبحة اللى حصلت … كانت في جامع في قريه غرب العريش …. سكانها لا يتعدي عدة آلاف …. استشهد منهم 305 شهيد في لحظات … يعني اسر بالكامل فقدت العائل و الابن و الحفيد …. و فيه حالات كتير لنساء فقدت كل رجال الاسرة كامله في هذا الحادث …. فــ دعمهم على الاقل معنويا هو فرض عين على حضرتك.
7- ليست مصادفة ان يصدر من صوت الشيطان الاعظم انجلترا و هي الـ BBC التي اصبحت اكبر الداعمين و بوق اعلامي للارهابيين لشرعنة مخططاتهم في المنطقة … ان تنشر بالامس الخبر انه مقتل العشرات المؤيدين للامن و الجيش على يد مسلحين مناهضين للانقلاب في شمال سيناء ….. و بعدها تنشر ان مسلحين اسلاميين يهجمون على جامع تابع لطائفه الصوفيين في شمال سيناء … لان المقصود هنا …. مادام مانفعش مسلمين و مسيحيين … و لا شباب ثورى و امن …. و لا سلطة بتحكم و شعب بيعاني اقتصاديا … يبقي نخليها ان اللى بــ يحصل بقاله سنين ده مش ارهاب …. اللى بــ يحصل ده اقتتال مذهبي و طائفي قبلي بين المسلميين بعضهم البعض …. يبقي نخليها صوفيه و سلفيين رجعيين ….و كل مجموعه تتخفي وراء قبيلتها
8- بلاش ترديد مصطلحات جوامع صوفية خاصة بالصوفيين …. احنا مصريين و بس … لا مسلمين و لا مسيحيين ….. ده غير اننا عمرنا ما سمعنا عن جوامع خاصة بالصوفيين خاااالص … ممكن كنا نسمع ان الجامع ده بناه سلفيين او مستولي عليه الاخوان … لكن صوفيين دي !!!! جديدة ….. و ده طبعا الهدف منه اننا نسيب المجني عليه و المصيبة اللى احنا فيها و الارهاب الخسيس اللى بيواجهنا …. و يقعد الاخ اللى شايف نفسه من السلف الصالح على القهوه او على النت يهاجم الصوفيين و يكفرهم و يخش الصوفيين يدافعوا عن نفسهم … و ثم ننتقل الى الهجوم الفعلي على الارض و نتقاتل ما بيننا كمسلمين بالسلاح … و ده اللى متوقع الفتره الجايه بالكثير من الفتن الجاهزه للتطبيق ….. و فيه معركة جبااااارة من الامن بــ يعملها على الارض في صمت تاااااام عشان يجهض المخططات الشيطانيه دي … و ماتستغربش من الكلام ده و تقول مش ممكن يحصل ….. اللى انت عايشه ده دلوقتي لما كنا بنحكي عليه من سنين كنت بتضحك وتتريق و تقول برضوا مش ممكن يكون التخطيط بالشكل ده و مش ممكن يحصل.
9- تاني مفيش ترديد مصطلحات صوفية و سلفية و أشعرية و الكلام الخايب ده …. احنا مصريين و ضد عدو ارهابي واحد و اللى عايش في القصه دي مالهوش مكان بينا
10- سيناء مش هــ نسيبها و مش حنهجر اهلها … و عدد سكانها هــ تزيد و مش هــ تقل … و مشاريع التنميه مش هــ تقف و الارهاب مش هــ يوقّف طريقنا
11- العمليات الارهابية لما تنتقل الى استهداف المدنيين العزل … ده قمة افلاسهم و محاولة للفت الانتباه انهم لسه موجودين …. لانهم في الرمق الاخير …. و محاولاتهم هــ تزيد الفترة القادمة لأن اجراء الانتخابات القادمة بالنسبة لهم هو اخر مسمار في نعشهم و نعش اللى بــ يمولهم و بــ يسلحهم ….. معركة و هــ نكملها للنهاية
12- تاني مفيش حاجه اسمها صوفيين و سلفيين و سنه و مسلمين …. مفيش غير حاجه واحدة و بس ……. مصريين و إرهابيين. …. اخواتنا المصريين المسيحيين ضربوا اروع الامثلة الوطنية في التاريخ … و اعادوا كتابة التاريخ الوطني من حروف من نور … لانهم تنبهوا الى هذا الفخ مبكراً … و تحملوا الام الدماء في سبيل الوطن …. و الدور الان على باقي الشعب ….. و تاني …. مفيش غير …. مصري و إرهابي .
13- الجيش و الشرطة و الدولة المصرية هــ ترد الصاع صاعيين للممول و المحرض و الداعم … و الاوباش اللى على الارض هــ يتمنوا الموت و مش هــ يلاقوه …. انتقلنا من مرحلة القوة المفرطة … الى مرحلة … القوة الغاشمة … و الله ولي التوفيق.
و آخر حاجة
مافيش حاجة اسمها الاخوان جماعة إرهابية ….. لكن إسمها …. الارهاب جماعة اخوانية
تحيا مصر … تحيا القوة الغاشمة
المرجعيات من المقالات السابقة
=================