21 Nov 2017
المواطن و النخبه الوطنيه ما بين السعر و القيمه
———————————————-
الفرق بين السعر و القيمه كانت من اهم قيم المجتمع اللى كان التركيز عليها لضرب اركان المجتمع و اهم المداخل لتمكين مجموعه من الافاقين و النصابين و المرضي النفسيين عبيد الاضواء …. ليزيحوا الطبقه المثقفه الوطنيه و يحلوا محلها ليكونوا نخبة مزيفه تقود المجتمع الى الضياع….. يعني ايه !!!!!!
لما اجي اسال حضرتك و اقولك ….. تكلفة سعر كيلو الطماطم بكام … حتقولي مثلا ب 6 جنيه
طب تكلفة سعر الشقه دي بكام …. حتقولي مثلا سعرها حسب موقعها و مساحتها بمليون جنيه
طب سعر محمد صلاح النهارده كام ….. حتقولي حوالي 40 مليون يورو
طب سعر الخبير الالماني الدكتور “س” في جراحة العظام …. حتقولي لو جبناه مصر لمدة اسبوع حيكون تكلفة سعره X دولار
طب لما اسالك طب سعر دكتور مجدي يعقوب كام …. !!!!!!! مش حتعرف ترد
طب سعر تمثال رمسيس الثاني كام …. !!!!!! … طب سعر مومياء حتشبسوت كام …. !!!!!! طب سعر الشهيد احمدالمنسي بكام …. !!!!!!
اكيد مش حتلاقي رد …. لان في اشياء و اشخاص تخطوا مرحلة السعر و اصبحوا قيمه لا تقدر بثمن .
للاسف ناس كتير فقدوا البوصله و فقدوا التمييز بين السعر و القيمه … فالسعر هو مدي نجاحك في عملك الشخصي و مجالك … اما القيمه فهي ما قدمته لمجتمعك و بلدك باستخدام مقدرات نجاحك ….. و اذا اسقطنا هذا الكلام على بعض المنتمين الى الطبقه المثقفه او ما يسموا انفسهم النخبه … تلاقيه يقولك انا مدير بنك كبير … انا دكتور جامعه … انا اعظم لاعب في تاريخ مصر …. انا اكتر شاب دمي خفيف و بعمل كوميكس حكايه … انا مذيع مشهور و مواهبي طاغيه ….. انا اشهر مغني … انا عالم كبير في اكبر جامعات امريكا …. طب نيجي نسأله … حضرتك باستخدام مقدراتك دي … ايه اللى قدمته لمجتمعك !!!!!!
هل استخدمت قدراتك الكبيره دي في اضافة شىء لشعبك او مجتمعك او دولتك … و لا كنت اناني تبحث عن مصلحتك فقط ؟؟؟ …. او وصل بيك الامر انك لم تترك فرصه الا و استخدمتها لطعن وطنك و التنظير عليها و دعم اي فرصه لهدم مؤسساتها عمليا و معنويا !!!!!
فرق كبيييير بين ممثل سعره كبييييير و في مهرجان عالمي انه يستظرف على بلد و يهينها امام الاجانب مع ان سعره كبير لكن قيمته صفر …. و بين ممثل تاني اعماله كانت رساله لبناء المجتمع حتي و ان لم ترجع له مكسب يعيش منه …. و ده لان قيمته كبيره
فرق كبير بين عالم في ناسا لم يترك فرصه في الغرب الا و هاجم بلده و ادعي عليها بالكذب مستغلا سعره الكبير مع انه جاهل بالسياسه و قيمته في مجتمعه صفر …. و عالم اخر في ناسا حارب طوال 30 سنه مع البيروقراطيه و اعداء النجاح في وطنه حتي نجح في البدء في تنفيذ ممر التنميه و وضعها كاستراتيجيه لخدمه الاجيال القادمه و وضع علمه تحت امر و طلب مجتمعه …. و ده لان قيمته كبيره .
فرق كبير بين لاعب كره يعتبر من انجح اللاعبين في تاريخ الكره المصريه و سعره كان كبير جدا …. لكن استغل دخله و شهرته في دعم الجماعات الارهابيه معنويا و ماديا و ده خاللي قيمته لمجتمعه صفر …. و لاعب كره آخر بالرغم من ان سعره الاكبر في تاريخ مصر … الا انه لم يترك فرصه الا و دعم وطنه و ساهم في دعم مجتمعه…. و ده لان قيمته كبيره.
فرق كبير بين طبيب كبير حاربه اعداء النجاح في السلك الوظيفي في الجامعه او اصابه مرض نفسي ضد دولته … فهرب و هاجم وطنه من الخارج او تحول الى ارهابي في الداخل او الخارج و ده لان قيمته صفر ….. و بين طبيب اخر حارب لسنوات كتير البيروقراطيه و اعداء النجاح لغاية لما نجح انه يفتح في اسوان اكبر مستشفي مجانيه في العالم لعمليات قلب الاطفال …. و ده لانه قيمته كبيره .
فرق كبير بين مثقف ناجح في شغله و كل اللى بيعمله انه بينظر و يشاور بصباعه و يقول إخيييه …. و بين عامل و صانع و زارع بينزل من الفجر و بيشتغل و يبني بلده و بيحاول يغير من مجتمعه الى الافضل بغض النظر عن ما يواجهه من مشاكل ….. و ده نفس الفرق بين السعر و القيمه.
فرق كبير بين شاب عايش في مجتمعه بيصرخ و يعاني من مشاكل بلده و بينظر عليها و هو قاعد على القهوه يفتي … و بين شاب اجنبي نزل على نفس البلد و نفس الظروف و هو معدم … لكن مقعدش على القهوه … اشتغل في نفس الظروف و نجح و اصبح صاحب عمل و مسكن و ظروف معيشيه جيده … لانه قرر انه يعمل لنفسه قيمه و ينجح حتي و ان اشتغل في غير تخصصه …. عن السوريين اتحدث
فرق كبير من اللى بيربي اطفاله على كره الوطن و رموزها و علمها و جيشها و هو بيقنعهم انه عشان تحب بلدك لازم تشتمها عشان تهدها … و بين اللى بيربي اطفاله على حب الوطن و مؤسساتها حتي و ان اختلف مع نظامها عشان ينشىء جيل نافع لبده و وطنه في المستقبل.
فرق كبيييير بين شاب هايف كل نجاحه في الحياه انه يسخًر كل امكانياته في عمل كوميكس على بلده و جيشه و يضيع بقيت وقته في شتيمة بلده على النت … و بين شباب تاني معندوش وقت للهيافه و بيشتغل و بيواصل الليل مع النهارد بطول مصر و عرضها في بناء مشاريع حتخدمه و تخدم اطفاله او بحراسة حدودها.
فرق كبيييييير جدا بين سعر كيلو الطماطم … و قيمة تمثال رمسيس الثاني. … و للاسف ما اكثر الطماطم على سطح نخبة المجتمع المصري
تحياتنا
بعض المرجعيات من المقالات السابقة
====================
الهويه المصريه و اليسار المصري المتعفن 1
الهويه المصريه و اليسار المصري المتعفن 2
الهويه المصريه و اليسار المصري المتعفن 3
الهويه المصريه و اليسار المصري المتعفن 4