زيارة بوتين .. وعودة السياحة الروسية

12 Feb 2021

زيارة بوتين .. وعودة السياحة الروسية .. !!

——————————————–

على مدار سنين طويلة نشرنا مئات المقالات ، اللى شرحنا فيها على قد مانقدر إزاى ممكن نشوف الصورة الحقيقية ونقدر نستوعبها ، ونفهمها على حقيقتها .. ونقدر نربط الأحداث ببعضها علشان نفهم إنه العالم مافيهوش صدف .. وإنه فيه أسس وقواعد بــ يتم التحرك من خلالها لإستهداف دول بعينها ، مهما بدت الصورة ليك طبيعية وتلقائية !

و لما تيجى تبص على مصر تحديداً وتشوف اللى كان بيحصل معاها ، ومازال ، ولسة هــ يحصل .. هــ تقدر تفهم يعنى إييه عملية إستهداف ممنهج و مستمر لدولة بكل الأشكال والطرق الممكنة بهدف إخضاعها والسيطرة عليها وعلى ثرواتها ومقدراتها ….. أو إسقاطها فى دوامة الفوضى ، برضوا بهدف السيطرة عليها وتحطيم جيشها و كل قدراتها ، وطمس ومحو تراث وحضارة وهوية شعبها ! 😎

و كعادتنا فى تأصيل الأمور .. و لو رجعنا بذاكرتنا للخلف شوية .. أكيد كلنا هــ نتذكر الحادث البشع والأليم اللى حصل فى 31 اكتوبر 2015 ، واللى نتج عنه سقوط طائرة سياحية روسية وإنفجارها ووفاة جميع أفراد طاقمها وكل الركاب اللى كانوا على متنها بعد مغادرة الطائرة بعدة دقائق لمطار شرم الشيخ الدولى !

أنا مش هــ اقولك نظرية مؤامرة علشان بس الموضوع ده بيعمل حرقان لبعض الناس .. برغم إن الموضوع مابقاش مجرد نظرية لكنه اصبح أمر واقع وحقيقة عيشناها وشوفناها بعنينا .. حقيقة لا ينكرها إلا مغرض أو مغيب .. لكن هــ أقولك إن أهم حاجة بــ يتم بيها إستهداف دولة أو نظام بهدف إسقاطه هو الملف الإقتصادى … إعمل أى حاجة تضربلك إقتصاد البلد اللى إنت عايز توقع النظام بتاعها او حتى عايز تضغط عليه حبتين علشان يخضعلك وينفذ اللى إنت عايزه .. إضربله بقى السياحة .. أو شنع على منتجاته من الصادرات علشان توقفها .. أو إستخدم ادواتك من الخونة لتحريض الناس لعمل مظاهرات علشان يبقى فيه حالة عدم إستقرار فــ يزيد عنده مخاطر الإستثمار والإقراض .. أو إعمل عمليات إرهابية فالمستثمر يهرب لأن رأس المال جبان .. ألخ ألخ ألخ

وأهم حاجة فى الملف الإقتصادى هو ملف السياحة .. طب لييه السياحة !؟ .. لأن السياحة مش فى مصر بس لكن فى كل دول العالم وبالذات الدول الغير بترولية .. تعتبر هى حقن الإنعاش اللى بتصب بشكل مباشر فى شرايين إقتصاد الدولة .. أموال وعملة صعبة بــ يتم ضخها مع تأثيرات مباشرة وغير مباشرة على حركة الإقتصاد الكلى للدولة .. بدايةً من فرص عمل لملايين الأسر .. ومصانع مياه واغذية وعاديات ، ومزارع ، و حركة موردين ، واتوبيسات ، وتاكسيات ومكاتب ليموزين ، ومحلات ، وشركات سياحة ، وشركات طيران ، و رواج تجارى … ألخ ألخ ألخ … وبالتالى فــ أى دولة بتخسر كل ده ، بتواجه على طول اثار إقتصادية سلبية بمجرد تاثر الطلب السياحى على الدولة !!

و لو نظرنا بموضوعية على ملف السياحة فى مصر .. هــ نلاقى إن القطاع السياحى تضرر تماما مع بداية إندلاع المظاهرات فى 2011 ، وصولا لحالة الإخلاء التام للسياح (Evacuation) فى فبراير 2011 بقرارات سيادية لمعظم الدول اللى كان لها سائحين فى مصر فى الفترة دى .. ومع تعاظم حالة عدم الإستقرار فى مصر شهر بعد شهر وسنة بعد سنة .. بدأت بعض الدول تضغط عليك فى الملف ده ، بوضع مصر على قائمة المناطق الخطرة واحيانا وضع ضوابط للسفر لمصر أو حظر السفر لها تماما وخصوصا بعد 30 يونيو 2013 بسبب الخلافات السياسة ، والضغط من أجل عودة الإخوان .. وبالتالى تضرر القطاع السياحى بشكل كبير .. لكن اللى خلى القطاع ده قادر يستحمل ويعيش ويكمل ، هو إستمرار تدفق السياحة الروسية إلى مصر بكثافة .. لحد ما وصل الأمر فى 2015 إن السياحة الروسية كانت بتتجاوز حوالى 60% من إجمالى حركة السياحة فى مصر .. 🤔

الرقم اللى وصلت له حجم السياحة الروسية فى مصر كان رقم مرعب .. وبالتالى .. ومع إستمرار حالة الإستهداف لمصر .. فــ كان لازم يتم ضرب السياحة الروسية بشكل مباشر .. وبالتالى تضرب 60% من الدخل السياحى لمصر فى خبطة واحدة …. ويمكن يتسبب كمان فى ضرب العلاقات بين البلدين فيبقى الخير خيرين …. وبالتبعية فــ اللى فاضل من حجم الطلب السياحى على مصر هــ يتأثر بشكل دراماتيكى .. و بكدة يبقى ضربت واحد من أهم شراين حياة الإقتصاد المصرى فى مقتل ! 🙄

و هو ده اللى حصل بعد إسقاط الطائرة الروسية فى 31 أكتوبر 2015 فى عز الموسوم الشتوى .. وإستغلال حادث الطائرة الروسية للهجوم على مصر وتقوم CNN و BBC بشن حملة صحفية إليكترونية .. إستناداً لتقارير مخابراتية من المخابرات الإنجليزية MI5 … قوووم إيييييه !!! .. كل شركات الطيران الخاصة والخطوط البريطانية تقوم بتعليق رحلاتها لشرم الشيخ لمدة أسبوع بأوامر حكومية بناء على المعلومات “الإستخراراتية” 🙂 .. وشوف حكمة ربنا يا مؤمن لما تعلن خطوط طيران إيرفرانس و لوفتهانزا عن تعليق طيارانهم لشرم الشيخ ، بالرغم من إنه مافيش طيران لهم بينزل شرم الشيخ أساساً 😁 .. وكل ده حصل فى خلال 48 ساعة ، بدأت من لحظة وصول الرئيس السيسى لإنجلترا لإجراء مباحثات مع رئيس الوزراء وقتها ديفيد كاميرن !!

وهنا قامت روسيا بحظ الطيران لمصر بالكامل .. وبالتالى ماعادش متبقى من حركة السياحة فى مصر غير السياحة الداخلية وبعض السياحة العربية

طب اللى حصل ده ماحصلش فى طائرة ألمانى وإلا إيطالى والإ اسبانى لييه !؟ .. إشمعنى يعنى طائرة روسية !؟ .. بيتهيألى مش محتاجين نجاوب .. لأن النتيجة اللى ترتبت على سقوط الطائرة هى فى حد ذاتها ، خير إجابة وخير دليل !

ولأن ملف السياحة بــ يتم إستخدامه بشكل سياسى وأمنى .. فــ فضل الموضوع معلق ، وفضلت حملات الشحن والتسخين على مصر من جانب الميديا العالمية مستمرة .. وفضل الملف ده  يمثل أداة ضغط على مصر .. وكل شوية نسمع عن عودة حركة الطيران الروسي والإنجليزى لمصر .. لحد ما الرئيس السيسى وهو بيفتتح قاعدة محمد نجيب العسكرية ، قال تصريح غريب جداً .. إن مصر بتعمل اللى عليها .. والسياحة كدة كدة راجعة … يعنى كأنه بيقول للعالم كله .. سواء بقى روس وإلا إنجليز وإلا ألمان وإلا طلاينة ألخ ألخ ألخ .. بلدنا عندنا وسياحكم عندكم .. ولما تحبوا تيجوا إحنا جاهزين .. لكن ماحدش أبدا هــ يقدر يضغط على مصر ..

طب هل حركة السياحة لمصر كانت واقفة  !؟ .. طبعا لأ .. بالعكس دى بدأت تشتغل تانى بشكل تدريجى من 2017 .. وبدأت تتصاعد بظهور أسواق سياحية جديدة ، وبتحقق أرقام مش بطالة .. لحد ما الأرقام فى 2019 كسرت حاجز اللى تم تحقيقه فى 2010 وهى السنة اللى شهدت أعلى مستوى للرواج السياحى فى مصر … لكن برغم كل شيئ بقيت السياحة الروسية متوقفة بشكل كامل على مصر .. والسياحة الإنجليزية تتحرك على إستحياء فى بعض المناطق السياحية بأرقام قليلة جدا

و مع تصاعد الحديث مؤخراً عن زيارة الرئيس الروسى بوتين لمصر ، والمتوقع إنها تكون فى النصف الأول من شهر مارس القادم 2021 .. عاد الحديث مرة أخرى عن عودة الساحة الروسية … لكن الشيئ المختلف المرة دى .. هو إن الكلام مش مجرد تكهنات ، أو شائعات خارجة من مصر و من الصحف المصرية زى كل مرة .. لكن المرة دى الكلام طالع من هناك .. من عندهم .. من الميديا الروسية .. ومن الشركات اللى بتشتغل فى السوق الروسى .. !

طب لييه برضوا فضلت السياحة الروسية بالذات متوقفة لحد النهاردة برغم إن العلاقات الإستراتيجية بين مصر وروسيا فى اقوى حالاتها .. والعلاقات الشخصية والتوافق بين ثعالب المخابرات السيسى وبوتين مافيش بعد كدة .. هل روسيا كانت بتضغط علشان عايزة قاعدة عسكرية فى مصر ومصر رفضت !؟ .. هل كان فيه ضغوط بسبب ملف الغاز المصرى اللى هــ يتصدر لأوروبا واللى هــ يأثر بشكل كبير على تصدير الغاز الروسى !؟ .. طب هل كان فيه تهديدات أمنية لروسيا إنه فى حالة عودة السياحة الروسية لمصر ، هــ يتم إستهدافها مرة أخرى .. و دى ورقة ممكن يتم إستخدامها لإسقاط بوتين نفسه فى روسيا !؟ .. هل فيه تفاهمات دولية كانت بتتعمل بشكل ما لمصلحة روسيا زى الملف التركى مثلا .. ومصر كانت متفهمة الوضع ومدركة أبعاده .. والدليل إن العلاقات الروسية على مستوى البلدين وعلى المستوى الشخصى للقيادات فضلت فى أعلى مستوياتها واقوى حالاتها .. وكانت بتزيد كمان !؟

طب لو السياحة الروسية رجعت بعد زيارة بوتين .. هل ده معناه إنه فيه متغيرات !؟ .. بمعنى .. هل التهديدات الأمنية إنتهت !؟ .. هل موضوع الغاز إتحل !؟ .. (وهو إتحل بالفعل بدون الدخول فى تفاصيل) … هل الأطراف الأخرى أدركت إن ملف السياحة لم يعد اداة قوية للضغط على مصر بعد قيام مصر بتغير منظومة الإقتصاد بتاعها ، لإقتصاد إنتاجى متنوع بدلا من الإقتصاد الريعى اللى كنا عليه فيما قبل 2013 !؟ .. هل وصول الأخ “بايجون” للحكم فى أميريكا كان السبب فى تقارب من نوع جديد !؟ .. هل كانت روسيا بتطالب بتعويضات مليارية بالدولار ومصر دفعتها أخيرا !؟ .. طب هل اللى دفع التعويضات هى قطر ، فى مقابل عودة جزئية للعلاقات مع مصر بعد مؤتمر العلا الأخير ، واللى ماحدش يعرف إييه اللى تم الإتفاق عليه بين الأطراف فى الكواليس !؟ …

مالناش دعوة إحنا ياموهى 😁

#الخلاصة .. و علشان تقدر تقرب على قد ماتقدر من الصورة الحقيقية لمجريات الأحداث ، يبقى لازم فى البداية تستوعب إنه فيه عالم تانى بيتحرك بيك وحواليك  ، عالم كدة شبه فيلم الــ Matrix للى شافه منكم .. عالم له رجالاته و لاعبيه .. عالم بتدور فيه معارك طاحنة وإنت ماتعرفش عنها حاجة خالص … العالم ده هو الوجه الحقيقى القبيح .. غير الصورة الخارجية اللى بنعيشها كلنا ، واللى بنلاقى فيها نفسنا ، بــ نجرى على المعايش و بــ نربى أولادنا ، و بــ نزور أهلنا ، و بــ نقابل اصحابنا ، وبــ نروح اشغالنا ، وبــ نروح النادى ، وبــ نتفرج على ماتش كورة ، وبــ نرفه عن نفسنا بأى وسيلة ، ومهما إختلف المستوى المادى والإجتماعى سواء بتقعد على القهوة فى حى شعبى علشان تشرب كوباية شاى وتلعب عشرة طاولة وتدفع جنيهات معدودة ، أو بتقضى ايام فى شاليه بملايين فى الساحل الشمالى !

تحزن أو تفرح .. تتخانق مع زميلك أو صديقك أو قريبك أو جارك .. تسافر وترجع …. كل ده حمادة .. و هــ يفضل هو الصورة الخارجية الطيبة اللى بنشوفها مهما كانت قسوتها من وجهة نظرنا .. لأن اللى بــ يدور فى الخلفية و على مستوى القيادات السياسية للدول والأجهزة الأمنية والشركات المتعددة الجنسيات وشبكات المصالح وصراعات بسط النفوذ وفرض الإرادة و السيطرة … ده بقى حمادة تانى خااااالص 😉🙂

من بعد 2011 ، بدأ المصريين يستوعبوا إلى حد ما حقيقة وطبائع الأمور .. وخصوصا بعد الثمن الغالى اللى دفعه المصريين بسبب سنوات عدم الإستقرار ، بــ وصول جماعة إرهابية لسدة الحكم فى مصر ، ثم إسقاطها مع كل التحديات اللى ترتبت على هذا الإسقاط سواء كانت تحديات داخلية أو خارجية … كل ده خلّى الكثير من المصريين يقدروا يفهموا إن الدنيا مابتمشيش بالبساطة اللى إحنا بنشوفها بيها .. وإنه الأمن والأمان والإستقرار مش هو الشيئ العادى لطبائع الأمور .. وإنه لولا رجال الكواليس الخلفية .. كان زمان الصورة إختلفت تماما !

حفظ الله مصر وشعبها من كل سوء

مقالات ذات صلة:

—————–

لمتابعة تعليقاتكم