الخريطة .. المستقبل اللى أفسدته 30 يونيو

19 Feb 2021

الخريطة .. المستقبل اللى أفسدته 30 يونيو !!

——————————————–

من كام يوم كدة .. قامت TGRT التركية وهي قناة تلفزيونية خاصة ، بنشر خريطة فى أحد البرامج التلفزيونية ، واللى المفروض إنها هتبقى خريطة النفوذ التركى فى 2050 .. و عنها وإنطلقت حفلة من التهليل والتكبير من الجماعة ومراكيبهم .. و أيوة كدة وهو ده الشغل و آن الأوان لعودة زمن الخلافة ألخ ألخ من النوعية دى من ترهات الأيديولوجية الفكرية

وبرغم الحديث عن إن مصدر الخريطة هو كتاب (المئة عام المقبلة) للأمريكي جورج فريدمان .. لكن اللى هــ يدقق فى الموضوع ويفكر شوية .. وخصوصا إننا إتعودنا إنه فى الحاجات اللى زى دى مافيش حاجة بتبقى صدفة ابداً .. هــ يلاقى إن نشر الخريطة دى ماكانش شيئ إعتباطى .. لكنه كان فى توقيت مدروس و لأسباب مهمة جداَ:

#السبب_الأول .. الحديث عن الخريطة دى وتسويقها إعلاميا جاء بالتزامن مع تصاعد حدة الخلاف بين تركيا وأوروبا من جانب .. وبين تركيا وروسيا من جانب أخر .. وتصاعد التوتر بين تركيا ودول شرق المتوسط بعد ما تركيا أيقنت إنها بالفعل خرجت من المولد بلا حمص … وبالذات لما يكون الحديث عن الخريطة وتداولها إعلاميا بشكل موسع ، بالتزامن مع الاجتماع الوزارى اللى إنعقد بأثينا بين وزراء كل من مصر واليونان وقبرص وفرنسا والسعودية والبحرين والامارات ،  و بحضور رئيس الوزراء اليونانى، لمناقشة الأوضاع في ⁧شرق المتوسط⁩ والشرق الأوسط

#السبب_الثانى .. التهليل الإعلامى كان مهم جدا لإنه كان رسالة تهدف لرفع الروح المعنوية للقطيع والأتباع بعد الضربات المتتالية اللى تلقاها نظام الأغا سواء فى ليبيا أو سوريا أو إجمالا فى شرق المتوسط .. وبعد عجزه عن تجاوز الخط الأحمر المصرى وتطور الأوضاع بشكل يتعارض مع مصالحه الإستعمارية فى المنطقة .. يعنى الرسالة بتقول للقطيع ماتقلقوش .. وإن دى تركيا فى 2050 … يحيينا ويحيكم ربنا بقى .. تكون ناس ماتت وبلاد قامت وبلاد إتهدت ! 😉🙂

#السبب_الثالث .. رسالة لكل الأطراف .. رسالة لأميريكا فى ثوبها الجديد ، بإننا لسة فاكرين ومكملين وع العهد هــ نحافظ 😁 .. وياريت ماتنسوش إننا رجالتكم …. رسالة لأوروبا على طريقة فيها لأخفيها لأننا جايين جايين ….. رسالة إبتزاز لروسيا والصين إوعوا تتجاهلونا أو تفكروا إننا راحت علينا ..

الأجمل بالنسبة لنا واللى خلانا أول ما شوفنا الخريطة ضحكنا من قلبنا بشدة .. إن الأميريكى جورج فريدمان مؤلف كتاب (المئة عام المقبلة) .. أصلا جايب الخريطة دى من مركز الدراسات الاستراتيجية والأمنية الأمريكي “ستراتفور” بإعتبار إنها خريطة إفتراضية لمناطق نفوذ تركيا في عام 2050 … و حط تحت جملة “مناطق نفوذ تركية” دى مليون خط … يعنى الأراضى دى كلها مش هــ تكون هى الدولة التركية .. لكنها هــ تكون عبارة عن دول تخضع للنفوذ التركى .. أو بمعنى اصح هــ تكون شكلها الخارجى دول مستقلة .. لكن الإدارة ومركز صنع القرار هيبقى فى أنقرة … !

– طب مش هو ده اللى إحنا بنتكلم عنه على الصفحة دى بقالنا سنين .. وأصدقائنا اللى معانا من زمان أكيد لما شافوا الخريطة ضحكوا من قلبهم بشدة زينا لأن الكلام ماكانش جديد بالنسبة لهم !؟

– طب مش هو ده المشروع الكبير اللى جت 30 يونيو وضربت فيه كرسى فى الكلوب !؟

– طب مش هو ده مشروع الهباب العربى اللى كان بــ يتخطط له وكان اللى هــ يحكم كل دول المنطقة بعد ما تتفكك جيوشها ، و تتقسم وتتقطع حتت .. أنظمة إخوانية وجماعات ظلامية ومليشيا مسلحة زى فى مصر وليبيا وسوريا والسودان والعراق وكل دول الخليج العربى و هيبقى الولاء الأول والأخير فى الدول دى للى كانوا بيطبلوا له وبيقولوا عليه وبيوصفوه من زمان بإنه خليفتهم .. خليفة الــ ….. المدمنين !!! 😉

– مش ده يفسرلك اللى كان بيقوله أول جاسوس مدنى منتخب .. “حلايب وشلاتين تبقى معانا أو مع السودان مش مهم إحنا إخوات .. مش ده يفسرلك التخطيط لتقطيع سيناء ومنح جزء منها للفلسطينين بديلا لغزة .. وإحنا كلنا إخوات مافيهاش حاجة يعنى !! .. مش ده يفسرلك كلام القيادى الإخوانى عبد المنعم ابو الفتوح لما قال بعد إكتشاف الغاز فى شرق المتوسط .. “وإحنا نعادى تركيا لييه !؟ .. مانقعد معاهم ونشوفهم عايزين إييه .. وهم ياخدوا حتة وإحنا ناخد حتة وتخلص المشكلة” 🤔

– مش ده يأكد كلامنا اللى ذكرناه فى مقالات كتيرة من أكثر من 4 سنين عن مخطط تدمير المنطقة وتفتيتها والإستيلاء على ثرواتها وإسقاط كل الدول والشعوب فى صراعات وإنقسامات لا تنتهى بإقامة أنظمة دينية ترسخ لإعلان دولة الكيان الإســ…. عن نفسها كدولة دينية ايضا .. وده اللى كان بيتم التحضير للإعلان عنه بالفعل فى 2013 لولا 30 يونيو !

– مش هو ده اللى بسببه وقفت دول الخليج بقيادة السعودية والإمارات بكل قوة مع مصر .. ودعمت روسيا والصين موقف مصر فى المحافل الدولية ومجلس الأمن ، واللى وصل لحد التلويح بإستخدام حق الفيتو لو تم إتخاذ أى خطوات عقابية عسكرية ضد مصر لأنهم كانوا شايفين وعارفين إنه لو كان تم إجهاض 30 يونيو .. كان المخطط ده هــ يشكل تهديد صريح عليهم … أيوة ده مش مجرد تهديد لكن كانوا هــ يدخلوا فى حالة فوضى وإقتتال وصراعات لا تنتهى إلا بتدميرهم وسقوطهم

أيوة زى ما قولنا قبل كدة … كانت هــ تبدأ بعد السيطرة التامة على الشرق الأوسط ، ومد خط الغاز من قطر لأوروبا مروراً بالعراق سوريا تركيا .. وبالتالى ضرب الإقتصاد الروسى فى مقتل .. علشان تبدأ بعدها عملية تمرير الإرهابيين لروسيا عن طريق الجنوب ، واللى هــ ينضم له مجاهدين الشيشان ، وكل التيارات وكوادر التأسلم السياسى والتطرف فى كل أوروبا الشرقية اللى كانوا جزء من الإتحاد السوفيتى السابق .. وتبدأ عملية إستنزاف عسكرى أمنى لروسيا الكافرة بالتوازى مع الإستنزاف الإقتصادى تنتهى بإسقاط الدب الروسى تماماً ، وإغراق روسيا فى الفوضى ضمن مسلسل الفوضى الخلاقة !

وبعد إسقاط روسيا .. تبدأ عملية حصار الشرق الأقصى ، وبالذات الصين والهند بنفس أسلوب إسقاط الشرق الأوسط ، وهو إثارة وإشعال الطائفية وتوجيه المجاهدين لمحاربة التنين الصينى الكافر ..، والحجة طبعا جاهزة وهو رفع الظلم عن المضطهدين .. وبالمرة نلعب على وتيرة إعادة أمجاد الخلافة الإسلامية مرة تانية .. وماننساش إن تعداد المسلمين فى الصين والهند بالملايين .. وبالتالى تبدأ عملية تأكل الدول دى من الداخل عن طريق تغييب وعى الشعوب من منطلق طائفى زى ما حصل فى مصر وسوريا والعراق واليمن .. وتسقط الصين والهند فى فوضى مدمرة برضوا .. وخصوصا إننا بنتكلم عن دولتين فيهم ربع سكان العالم تقريبا .. يعنى موجات الفوضى هــ تكون لا نهائية ، وتخرج عن نطاق إمكانية السيطرة عليها بأى شكل من الأشكال لمدة سنين ويمكن قرون لأنها هــ تمتد كمان لكل الدول المجاورة .. فى الوقت اللى يكون الغرب فيه بيتمتع بثروات العالم.

والخريطة مابتكذبش .. أيوة دى الخريطة اللى هم نشروها بنفسهم .. الخريطة اللى بتقول إن الرقعة دى من الأرض كانت هــ تبقى حدودها مباشرة مع روسيا والصين .. يعنى مافيش أسهل من جمع الملايين من المغيبين وتصديرهم للدول المستهدفة بتمريرهم من على الحدود المباشرة بيننا وبينهم .. ويبقوا يقابلونا بقى كمان 500 سنة من الفوضى ! 🙄

و هو ده اللى يفسرلك لييه حالة الجنون اللى فيها الأغا العثمانلى وكوادر الجماعة .. وعامل حالة الكره والعداء الشديد ده بينهم وبين مصر .. لأنه بيحاولوا بكل الطرق والأشكال العودة بعقارب الساعة للوراء لما قبل 30 يونيو و مش عارفين .. وخصوصا بعد تراجع أصحاب المخطط عن دعم الجماعة و دعم نظام الأغا حتى لو كان التراجع ده مش بشكل كامل .. لييه .. لأنهم فشلوا فى تحقيق اللى كان متخطط لهم يعملوه لمصلحة أصحاب المخطط …. وطبعا السبب 30 يونيو

فى النهاية .. ماعندناش حاجة نقولها .. ولا اى تعليق مناسب يخص موضوع الخريطة ده غير إننا كل يوم بنكتشف إننا كنا على الحق المبين .. و مانملكش غير كلمات شكر نقولها ..

🔹 شكراً لكل واحد أمن ببلده مصر ووقف فى ظهرها وظهر جيشها

🔹 شكرا لكل مصرى غيور على بلده مد إيده وسند بقوة لأجل ما البلد دى تكمل وتوصل لبر الأمان

🔹 شكرا لكل مصرى إمتلك الوعى الكافى إنه يشوف المؤامرة ويصدق اللى بيتقال .. وصبر وقاوح لحد ما كل الحقائق إتكشفت وأصبحت واضحة بشكل لا ينكره إلا مغيب أو مغرض أو حاقد

حفظ الله مصر وشعبها من كل سوء

#ملحوظة:

اللينكات التالية لمقالات قديمة ذات صلة .. ياريت تقروها وتستمتعوا وتتذكروا حالة الجدال والتشكك زمان لما المقالات دى إتكتبت وإتنشرت ..

لمتابعة تعليقاتكم