12 May 2018
أمريكا/إيران .. الإنسحاب والتأثير ( الجزء الثاني) !
————————————————–
اتكلمنا في المقال السابق بشكل عام عن الانسحاب الامريكي من الاتفاق النووى مع ايران و تبعات القرار ده على المنطقة السياسية و الاقتصادية …. و ختمنا المقال بتاعنا بسؤال مهم ( اذا كانت ايران و اسرائيل اللى هما اصلا حبايب في السر و حلفاء لامريكا … يبقي ازاي حيحاربوا بعض !!!! ) …
و عشان نخش في الموضوع على طول … و زي ما اتعودنا على تأصيل الامور و تفكيك الصورة لعناصر محددة لاعادة تركيبها مره اخرى عشان نشوف الصورة الحقيقية …. و مع ان اصدقائنا القدامي على الصفحة حيلاقوا الكلام ده قلناه بالتفصيل مراراً و تكراراً طوال السنين اللى فاتوا في مقالاتنا و اللى موجودة في قسم المقالات الاستراتيجية في موقع الصفحة الأرشيفي لمقالات الصفحة: ….
…… فتعالوا كدة و واحدة واحدة و تعالي على نفسك و كمل قراية …. و هات كوباية الشاى بتاعتنا و تعالوا نفكر مع بعض واحدة واحدة …. و عشان ماتقعش في فخ الاعلام و الحرب النفسية … تعالي نسأل نفسنا أسئلة محددة و نجاوب عليها بصراحة.
س – هو فعلا ايران حليف لاسرائيل و امريكا ؟؟؟ … أومّال ليه طول السنين اللى فاتت بنسمع ان العدو الرئيسي لأمريكا و اسرائيل هي ايران ؟
جـ – جاوبنا على السؤال ده كتير قبل كده …. و اثبتنا في مقالات سابقة ان العقل المدبر للاستيلاء على ثروات العالم هي انجلترا … و ان امريكا هي العضلات …. و ان نظام ملالي ايران و تنظيم الاخوان المسلمين … ما هم الاّ طفل غير شرعي لحمل سفاح جاء من بذرة شيطانية من صلب الخواجة الانجليزي اللى زرع التنظيمين دول في المنطقة … سواء بحسن الباندا اللى بدأ تنظيمه بـ 500 جنيه من السفارة الانجليزية بمصر … او الخوميني اللى نزل بــ باراشوت من باريس على ايران ليحكمها حكم ديني بقواعد دينية تكاد تتطابق مع نفس الفكر الاخواني …. ( ولاية الفقيه – السمع و الطاعة للمرشد) … ( التقية – التعريض بالكلام ) … ( زواج المتعة بالساعه – جهاد النكاح ) … ( التمتع بالاطفال جنسيا بالتفخيد – التمتع بالاطفال جنسيا بالزواج المبكر من الاطفال) … ( القتل على الهوية بتكفير السني – القتل على الهوية بتكفير الجميع ) … ( دفع الخمس من الدخل للفقية – دفع السدس من الدخل للمرشد ) و غيرها من عشرات الامثلة.
و طوال تاريخ التنظيمين …. تلاقي كلامهم كلام حنجورى شعبوي عن حرق اسرائيل و امريكا و محاربتهم … لكن علي الارض … تلاقي افعالهم لا تصب الا في مصلحة امريكا و اسرائيل … فهم لا يحاربون و لا يستعدون و لا يقتلون الا العرب فقط و لا يعملون لهدم الدول و انظمتها الا الدول العربية اللى هي أصلا معادية لامريكا و اسرائيل …. و اللى دلوقتي بــ يتم استخدامهم على الارض في الحرب بالوكالة لتنفيذ حملات التطهير العرقي لتحضير البلاد العربية لتقسيمها على اسس مذهبية و عرقية … و كلنا نفتكر ان في الوقت اللى كانت امريكا بتحلف بالطلاق انها هــ تضرب ايران … كانت بتسلح ايران بسلاح اسرائيلي في فضيحة ايران جيت…. و غيرها من الامثله الكتييييييييييير اللى السلاح و الحرب الحقيقية لا يستخدم من طرف التنظيمين دول الا ضد الدول العربية و شعوبها … لكن لما ييجوا يواجهوا امريكا و اسرائيل … لا تجد منهم الا الكلام الحنجوري بتاع على القدس رايحين شهداء بالملايين ( طق حنك على رأي اخواتنا الشوام).
س- ازاي بقي … إذا كان ايران هي اللى حاربت اسرائيل في جنوب لبنان و انتصرت عليها و علمتها الادب ؟
جـ – يارااجل … طب عيني في عينك كده 🙂 … طب تعالي نحسبها …. اسرائيل ضربت لبنان و هدمت 90% من بنيتها التحتيه من طرق و مطار و كباري و محطات كهربا و ميه و مواني و منشئات عسكرية … يعني جابتها على الارض …. و لبنان كان لا حول لها و لا قوة …. و الوحيد اللى طلع كسبان من الحرب دي و اللى ماحصلوش حاجة هو حزب الله … و اسرائيل سمحت ليه انه يضربله كام صاروخ و عطت له الـ “سوكسيه” الاعلامي … اللى اتزرع بيه في جنوب لبنان و عايش عليه لغاية دلوقتي …. و اللى يكلمه يعيد عليه نفس الخطاب الاخواني الحنجورى بتاع انا اللى واقف قدام اسرائيل و هــ أحرر القدس و محدش ييجي جنب سلاحي … و بكده نجحت اسرائيل في زرع ايران داخل الجسد البناني و في القلب من معادلة التوازن الاستراتيجي مع الانظمة العربية و ذلك تمهيداً للفترة اللى احنا عايشينها النهاردة .
س- طب هو فيه بالفعل حرب شاملة حتكون بين اسرائيل و ايران … او بين السعودية و ايران ؟
جـ – احنا جاوبنا على السؤال ده قبل كده …. الحروب الشامله الصريحه بين الدول كانت موضه و انتهت خلاص … و الحرب دلوقتي بالوكالة …. و اقصي حاجة ممكن تحصل … مجرد ضربات محدودة استعراضية ابتزازية لبعض الاطراف لجني ارباح سياسية و عسكرية و اقتصادية.
س – طب معلش خليك معايا … هي إييه قوة ايران اللى تخلّي دول الخليج عاملة ليها ألف حساب بالشكل ده ؟
ج- شوف يا سيدي … و مع اننا جاوبنا كتير قبل كدة على السؤال ده …. ايران بتستمد قوتها من العامل النفسي بترسيخ الاعلام لكذبة القوة العسكرية الهائلة اللى بتقول انها تمتلكها و تحسسك انها مخبية تنين مجنح حتطلقه على الخليج بس هي اللى حايشاه عننا …. و ده بتستهدف بيه مريديها اللى بيدينوا بولاؤهم ليها داخل الدول العربية … و ايضا لتخويف المواطنين العرب في الدول العربية …. لكن الحقيقة إيران كقوة عسكرية ، هى قوة ضعيفة جداً …. فالجيش الايراني كان قوي بالفعل حتي اواخر السبعينات و حتي بداية الحرب العراقية الايرانية …. و لكن منذ ذلك التاريخ … وقف الزمن تماماً بالتسليح في ايران مع تطبيق حزمة العقوبات اللى مفروضة عليها من حوالي 40 سنة … فمثلا سلاح الجو و البحرية و المدرعات و غيرها من الاسلحة اللى بيتكون منها الجيش … بــ يتكون من معدات عفا عليها الزمن و كل محاولات التصنيع الايراني اللى بيقولوا عليه ، لا يخرج في حقيقته الا عن مجرد عمرات ببعض التعديلات البسيطة جداً لاطالة عمر هذه المعدات و هذه الاسلحة …. و ده اللى فرض على الجيش الايراني ان تكون القوة الحقيقية له لا تخرج عن تنظيمات الميليشيات اللى بتتحرك على الارض بسرعة في مجموعات صغيرة نسبيا (زي داعش بالظبط) … لكن مايقدروش يواجهوا جيش نظامي في حرب مفتوحة … لان معداتهم قديمة و حيتاّكلوا في أول نص ساعة من الحرب.
و ده اللى خلّي ايران تركز على اسلحة استراتيجية زي الصواريخ …. و حتي دي شفناها الفتره اللى فاتت لما استخدمت ضد السعودية …. فهي صواريخ باليستيه ذات مدي و دقه عالية بالفعل … لكن ذات تكنولوجي قديمة … و شبكات الدفاع الجوي السعودي قدرت ببساطة انها تتصدي لكل الصواريخ اللى اطلقت عليها اللى وصلت الى اكتر من 140 صاروخ باليستي.
و عشان نتكلم في المفيد …. و نسيبنا من اللت و العجن ….. قوة ايران الحقيقية مش في القوة العسكرية … لكن فى قوة الايدولوجي اللى ناجحة حتي الان في تسويقها باستخدام الدين و العقيدة و القضايا السياسية اللى بتمس وجدان الشعب العربي … زي موضوع ( تحرير القدس – محاربة امريكا و اسرائيل ) … و غيرها من الخطب الحنجورية …. و هم نجحوا في ده بشكل كبير زي الاخوان بالظبط …. فممكن تلاقي مواطنين عرب يحملون جنسية بلادهم … و شغالين في مختلف الاماكن … لكن ولاؤهم الكامن الخفي ليس لدولتهم … و لكن ولاؤهم للفقيه ( او للمرشد زي الاخوان) … و لو سلمنا جدلا انه حصلت حرب مع ايران … حيكونوا هم راس الحربة ضد دولهم لضربها من الداخل لصالح ايران و الفقيه بتاعهم…. وعشان كده دول الخليج بــ تتعامل مع ايران بصبر كبييييير و باستراتيجية احتوائية و ليس تصادمية بالرغم من الاستفزازات الايرانية.
س- طب ايه علاقة الكلام ده بقرار ترامب بالانسحاب من الاتفاق النووى مع ايران ؟
ج – بقي ده كلام برده …. ده في صلب الموضوع … ازاي بقي !!؟ … شوف يا سيدي في نقط محدده عشان مانعيدش الكلام بتاعنا اللى قلناه بالتفصيل في مقالاتنا القديمة … الخلاصه تكمن في جملة واحدة … ملىء الفراغ الاستراتيجيي …. يعني ايه !!!؟؟ … شوف يا سيدي :-
– فيه نظام عالمي جديد بيتكون دلوقتي … من نظام القطب الواحد الى نظام متعدد الاقطاب … و اللى احنا من اربع سنين فاتو مُصرَين اننا في القلب منه .
– انجلترا و امريكا كانوا بيسابقوا الزمن في فرض نفسهم على النظام ده …. و تنفيذ خطتهم في تقسيم العالم العربي للاستيلاء على ثروات الطاقة اللى فيه … ده غير الثروات البشرية و الثقافية و الحضارية …. ( التفاصيل في مقال اللعبه و الهدف و المشروع القديم … و مقال ……..دائما و ابدا الاجابه في الخريطه:
– لما الخطة بتاعتهم تم ايقافها و تغير مسارها بالزلزال الهائل اللى حصل في 30 يونيو … و قدرت مصر تقف على رجلها و تقود المواجهة ضد هذه الخطة الشيطانية … و لأن الوقت اصبح مش في صالحهم لان عجلة تكوين النظام العالمي ده بدأت في التحرك بقوة و سرعة … فــ كان لازم تتجه بريطانيا و امريكا الى حجز مكانهم في النظام العالمي الجديد بالشكل اللى يحفظ ليهم مكانتهم …. فــ طلعت انجلترا من الاتحاد الاوروبي …. و بدأت امريكا من الانسحاب الاستراتيجي من منطقة الشرق الاوسط:
انجلترا راس الافعي و قائدة محور الشر
الخروج الكبير للانجليز من الاتحاد الاوروبي 1
الخروج الكبير للانجليز من الاتحاد الاوروبي 2
– امريكا بدأت توجه تركيزها الاستراتيجي المستقبلي على وسط و شرق اسيا لمواجهة الصين اللى بتتعملق دلوقتي .. ومعاها روسيا اللى بتزداد قوة … و لأن الاقتصاد الامريكي لا يحتمل وجودها المكثف في منطقتين من العالم … كان لازم امريكا تنكفىء اقتصاديا على نفسها … فبدأت تفك نفسها من اوروبا … و سمعنا كلام كتير ان على اوروبا ان تدفع لامريكا المليارات و إلاّ ستنسحب من حلف الناتو … و بدأت امريكا تخرج من العديد من الاتفاقيات الاقتصادية مع اوروبا و العالم … و بدأنا نسمع مصطلح “امريكا أولا” و “مصلحة المواطن الامريكي أولا”.
– المهم عشان كل ده يحصل … و لان الكاوبوى الامريكي فشل في كل محاولاته في فرض او استدراج دول المنطقة لحرب شاملة ، و اللى كانت مصر هي من تقف له بالمرصاد و تقود دول المنطقة لاطفاء اي حرائق متعمدة لجر باقي جيوش المنطقة لحرب يتم فيها القضاء باقي جيوش المنطقة …. و لأن الوقت مش في صالح امريكا استراتيجياً … فلازم يكون فيه كيان يملئ الفراغ الاستراتيجي اللى حتسيبه امريكا ده … فياترى مين الكيان ده … هل هو دولة و لا عدة دول !!!! و بالذات ان الروس لابدين للامريكان في الذره بعد ما نزلوا في المياه الدافئة في البحر المتوسط و حطو رجلهم و مش حيطلعوا فوق تاني … يبقي يا ترى مين ؟؟؟؟ 🙂
– طب مين الدول القوية المستقرة اللى موجودة في المنطقة !!!؟ يا ترى تركيا ؟؟؟؟؟ ….. تركيا انسوها خلاص …. لانها دخلت في سكة اللى يروح ميرجعش بقالهم 5 سنين ….. و ده شرحناه بالتفصيل الممل و حتلاقوا مقالات مفصله في صفحة المقالات الارشيفيه ( المقالات السياسية) …. لكن في الحقيقة المجردة من وجهة النظر الامريكية …. هم ثلاث دول … مصر و السعودية و اسرائيل ….. بس التلاتة مايركبوش مع بعض و بالذات ان مصر و اسرائيل بينهم حرب مع ايقاف التنفيذ و كمان القضية الفلسطينية لسه ماتحلتش …. فكان لازم القضية دي تتحل عشان الدول دي تقدر تشتغل مع بعض وتفضل قائمة لخلق توازن استراتيجي لحفظ السلام و الاستقرار في المنطقة يضحض اي ذريعة للتمدد الروسي في المنطقة ….. ده طبعا من وجهة النظر الامريكيه …. و اللى بتتلاقي فيه مصلحتنا في نقتطين …. اولا حل المشكلة الفلسطينية …. و تحجيم تواجد القوى العظمى في المنطقة و اللى اكيد حيكون من مصلحتنا …. يعني كده العقدة اتحطت في المنشار …. ان لأول مره حل القضية الفلسطينية يبقي هدف لامريكا لصالح مصلحتها الاستراتيجية….. و دي المعجنة اللى شغالة دلوقتي … و هي دي حقيقة صفقة القرن اللى عمالين يتكلموا فيها و الكل بيزايد على التاني بيها.
– لكن نرجع و نقول …. ان الموضوع ده لو قبلنا تنفيذه …. لازم يكون حسب المصلحة و الرؤية المصرية …. مش حاجة تتفرض علينا …. لان القصة بمنتهي البساطة … مصر اعلنت موقفها بصراحة و وضوح …. انا معنديش مشكلة اتعاون مع اسرائيل و نقيم علاقات كاملة معاها … بشرط … القدس الشرقية عاصمة لفلسطين موحده على حدود 1967 …. يعني بكل وضوح ( صفقة القرن حسب الرؤية المصرية هي الارض مقابل السلام ) و بدأت مصر بإجترار الالم و كتم مبررات الانتقام من إخوان غزة …. و سعت جاااااهده في اقرار المصالحة الفلسطينية عشان تعد الفلسطينيين لما هو قادم … عشان يشيلوا شيلتهم و يعملوا دولتهم ……. و السعودية معندهاش مشاكل في ده لان ده هو نفس قرار الجامعة العربية اللى اتوافق عليه بالإجماع قبل كده …. و بالذات ان الغاء الاتفاقية دى حيكون في صالحها تماما لانه حيزيد من الضغط الاقتصادى على ايران اللى عملتها انخفضت للضعف امام الدولار من ٤٥ الف الى ٨٠ الف ريال لكل واحد دولار …. و ده بيمثل كارثة اقتصادية على ايران و هــ يحدّ تماماً من قدرات ايران في تمويل قواتها في اليمن و سوريا و لبنان .
– اسرائيل بتلعب في الازرق كعادتها … فبتعمل كل ما هو في وسعها عشان تفشل المصالحة … و تضيع اكبر قدر ممكن من الوقت …. عشان تضغط على امريكا و تفرض رؤيتها عليها …. فتضطر امريكا إنها تضغط على مصر و العرب بقبول صفقة القرن من وجهة النظر الاسرائيلية و هي ( السلام مقابل الامن … و فكوا دماغكوا خاااالص من موضوع الارض دي) .
– طب بما ان مصر ليها باع كبييير في السياسة و الصبر الاستراتيجي و عارفة كويس جدا اللعبة … و ممشية الكل في المنطقة وراها … فكان لازم نغير أوراق اللعبة و ندخل لاعب جديد نعمل بيه فرقيعة في النص … و هو ايران لملاعبة السعودية و مصر … طبعا على اساس اننا بــ نخاف و لسه مبتدئين 🙂 …..
– و عشان كده حتلاقي الكلام كله مش ضرب ايران في ايران نفسها … لكن ضرب ايران في لبنان و سوريا …. طب يا عم ما تروح تضربها على ارضها …. لأ طبعا …. هو عايز يولع المنطقة دي بالذات عشان يفرض معادلات و أدوات ضغط جديدة جديدة يقدر يستخدمها لصالحه …. و عشان تبقوا عارفين … فيه حرب تكسير عضم هااائله شغاله في الكواليس ناجحه فيها مصر حتي الان في اطفاء ما يحاولون اشعال المنطقه بيه .
و على فكره …. الفراغ الاستراتيجي ده …. اللى كان بيخطط ليه الحاج اوباما انه يملاه بتنظيم الاخوان المسلمين و ميليشياتها …. بتمويل قطرى و ادارة تركية ….. تخيلوا …. داعش و النصره و جند الاسلام و حماس ….. و اخواتهم من حزب الله كانوا هم اللى حيديروا المنطقة 😂😂
عشان بس تعرفوا قيمتكم و ايه اللى عملتوه في 30 يونيو …. و عشان تعرفوا ليه الاخوان بيعملوا المستحيل عشان يلاقوا مكان ليهم في الصورة تانى …. و ليه القرد حيمووووت من مصر.
– لكن نرجع نسأل …. يا تري ايه شكل الكيان اللى هــ يملي الفراغ الاستراتيجي …. فالإجابة مانقدرش نفتي بيها دلوقتي …… لكن اللى واثقين منه … ان كل ما الوقت بيعدي … هو لا في صالح امريكا و لا في صالح اسرائيل …. هو في صالح مصر فقط … و ده اللى هــ يجننهم … لان كل يوم بيعدي … الوزن النسبي لمصر بيثقل اكتر و اكتر بشكل متسارع و خطير ليهم … و بالتالي حجم الرؤية المصرية و دورها في هذا الكيان بيزيد جداً جداً يوم بعد يوم.
تحياتنا