صفعة القرن على مؤخرات أشباه الرجال !!

29 Jan 2020

صفعة القرن على مؤخرات أشباه الرجال !!
——————————————-

إنها حقا صفعة القرن … وليست صفقة القرن

صفعة على مؤخرة كل اللى كذبوا وزايدوا على مصر … هم و كل اللى صدقوهم ، بإن مصر إتنازلت عن سيناء علشان تعمل فيها وطن بديل للفلسطينيين كجزء من صفقة القرن .. وقبضت 10 مليار دولار !! …. هــ تقوللى لأ … ماهو مصر إتنازلت عن الغاز مقابل الخروج من صفقة القرن … هــ أقولك بس يا بابا … و ضم الكذبة دى على الطابور الطويل من الكذب والهبد .. من أول الإينكيلاب يترنح .. لحد أخر المحور كدة وإنت نازل من على الشمال 😉

صفعة على مؤخرة كل الفصائل الفلسطينية المتشرذمة ، اللى بتقطع فى بعض طول الوقت ، وبيتهموا بعض بالخيانة والعمالة .. و بــ يقتتلوا طول الوقت على كرسى السلطة وعلى الإستحواذ على ماسورة الدعم اللى بيصرفها القيادات على نفسهم وعلى أولادهم .. وعايشين فى الفنادق الــ 7 نجوم .. و بيرموا الفتات بعد كدة للقضية الفلسطينية !

صفعة على مؤخرة كل الحنجوريين والمزايدين على مدار سنين طويلة .. بتوع الشعارات اللى مش بتعمل حاجة غير التعبئة الشعبوية للتصفيق أثناء الخطب الحماسية … علشان تصنع أبطال من ورق .. و أصنام من العجوة .. يسجد لها اصحاب الأيديولوجيات الفاسدة و شمامين الكلة .. المدمنين المتعطشين طول الوقت للبنج الثورى والمخدر الدينى 😏

صفعة على مؤخرة المتاجرين بإسم القضية .. أصحاب شعارات “ع القدس رايحين شهدائ بالملايين” و “القدس تنتظر الرجال” و “لبيك يا أقصى” .. وكل الطقاطيق اللذيذة دى … و وقت الجد .. لما إتقال لهم طب تعالوا نوديكم هناك علشان تجاهدوا وتحرروا القدس .. كله عمل من بنها ….. مع الإعتذار طبعا للبنهاوية الأصلاء .. بس القافية حكمت 🙂

صفعة على مؤخرة ابو بكر البغدادى وابو عمر و إبو فجلة و أبو بتنجانة .. وكل الأبوهات .. اصحاب الألقاب الرنانة .. بتوع تنظيم الدولة الإسلامية .. والخلافة المزعومة .. خلافة داعش فى سوريا والعراق .. و دامل فى مصر و ليبيا … المرشد الأفغانى ، والمرشد الإيرانى ، والمرشد الإخوانى ، والتنظيم الدولى … وكل الكاذبين المدلسين المنتفعين أصحاب الفكر الخرب .. والقوة اللى مش بتجاهد إلا فى الدول العربية والإسلامية .. لصالح المشروع الصهيونى .. قولا واحداً .. 🙄

صفعة على مؤخرة كل اللى تطاولوا على الزعيم الراحل “محمد أنور السادات” … و وصفوه بكل ما يشين .. و راحوا عملوا ما يسمى بدول حزب الممانعة فى السبعينات … والنهاردة هم مجرد أشباه دول ، مش عارفين حتى يحافظوا على وحدة أراضيهم .. فى حين إن مصر إستردت أرضها و بــ تمارس سيادتها على كل شبر فيها …

صفعة على مؤخرة خليفة المدمنين ، وكل مؤيديه .. صاحب أكبر مستوى تبادل تجارى وعسكرى مع إسرائيل ، بعد أميريكا … الخليفة المزعوم اللى بيحاول يستعيد امجاد اسلافه الهمج اللى إستخدموا حجة نشر الإسلام علشان يعملوا دولة على حساب الدول المسلمة .. وياريتهم نهضوا بيها .. لكنهم أفقروها ودمروها وجهّلوها حتى أصبحت كالجسد بالا حياة … والنهاردة جاى يعيد نفس السيناريو ، وبدل ما يجاهد علشان يحرر القدس زى ما بيقول هو و أتباعه .. راح يعمل كدة فى سوريا وليبيا والعراق ولسة بيحاول فى مصر .. ويقولك أنا بأستعيد إرث اجدادى .. وأمجاد بنى عثمان .. طب ماتبص بصة كدة الأول على فلسطين ياعم الحج 🙄

صفعة على مؤخرة كل اللى ماعملوش حاجة للقضية الفلسطينية سواء من أصحاب القضية أو من غيرهم .. غير إنهم يشتموا فى مصر … و كل مرة الوضع يتدهور .. و كل مرة يدخلوا مباحثات .. و يخرجوا منها .. و يفشلوا فى تحقيق أى نتائج … يقوموا يشتموا فى مصر .. و أهو زى ما قولنالكم فى مقالنا الأخير من يومين … إنهم أول ما هــ يفوقوا من صفعة القرن ، مش هــ يلاقوا حاجة يعملوها غير إنهم يشتموا فى مصر .. وأهو حصل …. طب ماتفتكروا مؤتمر ميناهاوس اللى رفضتم تحضروا فيه .. كان زمان الموضوع خلص .. و كان زمان عندكم دولة …. لكن نعمل إييه بقى فى الغباء !

طب خصيمكم النبى … ماتجربوا تعملوا حاجة مفيدة غير إنكم تشتموا فى مصر … على رأى الحاج الطيب أينشتاين لما قال “الغباء هو فعل نفس الشيء مرتين بنفس الاسلوب ونفس الخطوات وانتظار نتائج مختلفة” ….. إنتم بقى .. بسم الله ماشاء الله … تفوقتم على الغباء نفسه .. لأنكم بقالكم أكثر من 40 سنة بتعملوا نفس الشيئ .. ولسة على امل إنكم تحققوا نتائج مختلفة !!!

إحنا مش هــ ندخل فى تفاصيل ما تم إعلانه عن ما يسمى صفقة القرن .. لأن اللى إتقال لا يصلح اصلا للكلام عنه ، أو مناقشة تفاصيله … و هدف كل اللى بــ يتعمل ده مفهوم ومعروف .. و هو تأمين إسرائيل للأبد … بــ تعليق جزرة التنمية الإقتصادية فى الشرق الأوسط بعد التخريب المتعمد اللى حصل لكل دول المنطقة .. علشان نعيش كدة أسرة حلوة كيوت مع بعدشينا … قبل الإنسحاب الأميريكى التام من المنطقة … والكلام ده إحنا شرحناه بالتفصيل فى مقال سابق ، هــ تلاقوا اللينك بتاعه فى نهاية المقال ده

و علشان ما نطولش عليكم .. ونلاقى ناس بتزايد تانى علينا و على مصر .. وتقول إن مصر راضية عن صفقة القرن .. أو صفعة القرن دى … والدليل هو بيان الخارجية الأخير … هــ نقولك ببساطة خالص .. إن بيان الخارجية المصرية الأخير إختصارا كدة مابيقولش أكثر من اللى إحنا قولناه فى البراجراف اللى قبل اللى فات … ياجماعة الإعلان ده إعلان منفرد … وطالما كل اللى إتعمل على مدار السنين اللى فاتت ماجابش نتيجة … فــ ياريت بقى تسيبكم من الإنقسام ، و تتلموا كدة وتتوحدوا … و تجربوا تقعدوا مع بعض كدة وجها لوجه … وتوصلوا لحل نهائى … لأن دى الفرصة الأخيرة للجلوس على طاولة المفاوضات .. قبل ماتنتهى البقية المتبقية من القضية.

موقف مصر واضح وصريح .. وأعلنته قبل كدة أكثر من مرة .. و فى محافل دولية مختلفة:
الحل العادل للقضية الفلسطينة هو قيام الدولة الفلسطينية على حدود 1967 وتكون القدس الشرقية عاصمة لدولة فلسطين … و لايمكن القبول بأى حال من الأحوال بأى حل للقضية بدون موافقة أصحاب القضية أنفسهم !

و فى النهاية … ياريت بس ماحدش يقوللى فين العرب وحكام العرب .. وموقف مخجل .. ومافيش حد عمل حاجة .. والجامعة العربية ما إتحركتش … معلش يعنى فى اللى هــ أقوله … هو ولامؤاخذة يعنى .. لسه فاضل عرب !؟؟ … ياريت تبص حواليك وتشوف بعينك ..نتاج ما تم تسميته إصطلاحاً بالربيع العربى !!! … لأ حلو الربيع بجد … الربيع اللى لسة لحد دلوقتى عندنا ناس أول ماتقول دى كانت مؤامرة تم فيها إستغلال الشعوب نفسها فى تدمير نفسها .. تلاقى الأخ من دوول يروح ناكش شعره ، و متخن صوته .. و يقولك .. لو سمحت .. ما أسمحلكش … دى ثورات طاهرة .. و هــ تفضل طول عمرها طاهرة …. !!! 😁

عايز تعرف إسرائيل واميريكا بيحاولوا يضربوا عرض الحائط بكل ما يخص القضية الفلسطينية لييه !؟… عايز تعرف الإعلان المنفرد ده لييه .. و يا تقبل يا تلبس علشان خارجين !!؟؟ … طب لييه الوهن العربى ده كله …. ياريت تقوللى فين الجيش العراقى !؟ .. طب الجيش السورى !؟ .. طب الجيش الليبى !؟ .. طب الجيش اليمنى !؟ … طب الجيش اللبنانى !؟ .. طب ياترى السودان وتونس والجزائر عاملين إزاى دلوقتى !!؟؟ …. مش دى الدول اللى انت ساهمت فى إسقاطها …. جاى النهاردة تقول هى فيين ؟؟؟

وإلا يكونش قصدك الجيش المصرى !!؟؟ … الجيش اللى انت طول الوقت بتشتم فيه وبتقول عليه جيش المكرونة والجمبرى …. لأ معلش … كان عندنا وخلص .. مصر مش بتتعامل بالحنجوريات بتاعتكم .. مصر بتتحرك بثقل سياسى و ردع عسكرى صلب … وإنتهى خلاص الزمن اللى العرب بتحارب فيه لحد أخر جندى مصر !!! … مصر إستعادت أرضها بالحرب والسلام .. و بــ تقوى جيشها .. وبتفرض سيطرتها على محيطها الإقليمى .. وبتحاول تملاء الفراغ الإستراتيجى اللى خلفته الثورات العربية بعد ما دمرت كل جيوش المنطقة اللى إنت نفسك ساعدت فى إسقاطها …

و طالما المزايدين كدة كدة بــ يشتموا فى مصر وجيش مصر ، و بــ يقولوا إن القدس تنتظر الرجال …
طب تمام .. ادينا مستنيين بقى نشوف الــ لامؤاخذة الرجال هــ يعملوا إييه

و أخيرا … و قولاً واحداً …
مصر لم ولن توافق على أى شيئ يمس الثوابت المصرية والعقيدة القتالية للجيش المصرى … و أى حد عايز يزياد على مصر … براحته … بس خليكم دايما فاكرين .. إن الرؤية المصرية .. بتكون هى الرؤية الصحيحة دايما .. من غير أى مزايدات ، أو حنجوريات …

و كل ماتنسى .. خلى “صفعة القرن” تفكرك

تحياتنا لحضراتكم .. وحفظ الله مصر

مقالات ذات صلة:
—————–

لمتابعة تعليقاتكم