ترسيم الحدود البحرية بين مصر واليونان ..

06 Aug 2020

ترسيم الحدود البحرية بين مصر واليونان ..

إنتصار مصرى .. و خط أحمر جديد

—————————————-

فاكرين لما مصر وقعت إتفاقية ترسيم الحدود البحرية مع قبرص .. وحملة العواء والكربلائيات ، وإدعاءات تفريط الإدارة المصرية فى ثروات المصريين ، وضياع الذهب والياقوت والمرجان … ونايل شافعى يعوى .. وشمامين الكلة تصوت .. وخالد على يقولك هــ أرفع قضية لإبطال إتفاقية الترسيم .. ألخ ألخ ألخ .. وطبعا كلهم كانوا بيلعبوا لحساب الخواجة اللى مشغل العثمانلى التركى .. واللى طلع هو كمان يقولك ده باطل وإفتئات على حقوق تركيا وإحنا مش معترفين بالإتفاقية دى .. و يشاء ربنا بعد اسابيع من توقيع الإتفاقية ، إنه يتم إكتشاف حقل ظهر فى المياه الإقتصادية المصرية .. واللى حقق لمصر الإكتفاء الذاتى من الغاز .. وكمان فائض علشان نصدر منه !!!

قووووووم إييييييه … النهاردة بقى مصر واليونان وقعوا إتفاقية ترسيم الحدود البحرية بينهم ، وتعيين المياه الإقتصادية لكل دولة طبقا لإتفاقية الأمم المتحدة لقانون أعالى البحار واللى موقع عليها وملتزم بيها معظم دول العالم منذ بداية الثمانينات .. وكل دول حوض البحر المتوسط وقعت عليها ماعدى تركيا ، بسبب عدم إعترافها بأحقية الجزر اليونانية فى المياه الإقتصادية لدولتها .. يعنى من الأخر كدة ، تركيا مارضيتش توقع على الإتفاقية ، علشان عايزة تبرشط على حقوق اليونان من ناحية الشواطئ اللى بينها وبين تركيا !!

بكدة بقى تكون مصر لها الحق فى التنقيب عن الغاز والبترول فى المياه الإقتصادية البحرية من ناحية اليونان .. و طبعا مش محتاجين نقول إننا هــ نسمع نفس مسلسل العواء والكربلائيات .. وإن مصر فرّطت فى حقوقها البحرية .. و إن تركيا الجميلة الكيوت كانت عايزة تقعد مع مصر ويظبطوا الترسيم (من منظور البرشطة والسرقة طبعا) لكن مصر ما وافقتش … وإن ده ضيع على المصريين الذهب والمرجان والياقوت اللى كان ممكن يلاقوه جوة برطمان الكلة

و بالمناسبة .. اللى يقولك الكلام ده مش مضبوط ومايفرقش مع تركيا ، قول له أينعممم .. كلامك صحيح .. بأمارة الليرة التركية اللى إتهبدت النهاردة فى الأرض .. و كلها يومين وتلاقى “جرب أحمق بغبغان” طالع يجرى على الكفيل بتاعه فى الخليج علشان يلحقه بقرشين يسندوا الليرة

قولنالكم قبل كدة إن مصر بتشتغل على الهادى خالص … و مش بتلعب بطريقة العنتريات .. ولا بتلتفت للعواء والشتائم والإستفزازات … لكنها بتتحرك على رقعة الشطرنج بمنتهى المهارة … و فجأة تلاقيها أخدت حقها تالت و متلّت

و زى ما قال الراحل عبد الرحمن الأبنودى

ومصر عارفة وشايفة وبتصبر..

لكنها في خطفة زمن تعبر..

وتسترد الاسم والعناوين..

دلوقتى بقى مصر رسمت للقرد خط أحمر فى البر (سرت / الجفرة) .. ورسمت خط أحمر فى البحر (الحدود البحرية مصر / قبرص/ اليونان) … خطوطك الحمراء كترت يا قردوا .. ورينا بقى الشطارة و عدى خط منهم ياعم القرد

واللى عايز يعرف معنى الترسيم وكيفيته وبيتعمل إزى ، وفايدته لمصر إييه .. ياريت يراجع المقالات القديمة اللى فى الروابط التالية .. وهتلاقوا المقالات فى ترتيب تنازلى من الأحدث للأقدم .. علشان تعرفوا مصر إشتغلت على الكلام ده من إمتى .. والنهاردة تتويج للشغل ده كله:

إشاعة تنازلت عن حقول الغاز في البحر المتوسط الى إسرائيل و اليونان – مارس 2019

حفظ الله مصر .. وشعب مصر

لمتابعة تعليقاتكم